ಜನವರಿ 18, 2022
ಸಾಮಾನ್ಯ ಕಾಲದ ಎರಡನೇ ವಾರದ ಮಂಗಳವಾರ
ಇಂದಿನ ವಾಚನಗಳು
“ಸಬ್ಬತ್ ದಿನವು ಮನುಷ್ಯನಿಗಾಗಿ ಉಂಟಾಯಿತು, ಮನುಷ್ಯನು ಸಬ್ಬತ್ ದಿನಕ್ಕಾಗಿ ಅಲ್ಲ.” ಮಾರ್ಕ 2:27
ಯೇಸುವಿನ ಶಿಷ್ಯರು ಸಬ್ಬತ್ ದಿನದಂದು ಹೊಲಗಳ ಪಕ್ಕದಲ್ಲಿ ನಡೆದುಹೋಗುವಾಗ ತೆನೆಗಳನ್ನು ಕಿತ್ತದ್ದಕ್ಕಾಗಿ ಅವರನ್ನು ಟೀಕಿಸುತ್ತಿದ್ದ ಕೆಲವು ಫರಿಸಾಯರಿಗೆ ಉತ್ತರವಾಗಿ ಯೇಸು ಈ ಮಾತನ್ನು ಹೇಳಿದರು. ಶಿಷ್ಯರಿಗೆ ಹಸಿವಾಗಿತ್ತು; ಅವರು ತಮಗೆ ಸಹಜವೆನಿಸಿದ್ದನ್ನು ಮಾಡಿದರು. ಆದರೆ ಫರಿಸಾಯರು ಇದನ್ನು ವಿವೇಚನೆಯಿಲ್ಲದೆ ವರ್ತಿಸಲು ಮತ್ತು ಟೀಕಿಸಲು ಒಂದು ಅವಕಾಶವಾಗಿ ಬಳಸಿಕೊಂಡರು. ತೆನೆಗಳನ್ನು ಕೀಳುವ ಮೂಲಕ ಶಿಷ್ಯರು ಸಬ್ಬತ್ ನಿಯಮವನ್ನು ಉಲ್ಲಂಘಿಸುತ್ತಿದ್ದಾರೆ ಎಂದು ಅವರು ಆರೋಪಿಸಿದರು.
ಮೊದಲನೆಯದಾಗಿ, ಸಾಮಾನ್ಯ ವಿವೇಕದ ದೃಷ್ಟಿಯಿಂದ ನೋಡಿದರೆ, ಇದು ಅರ್ಥಹೀನವಾಗಿದೆ. ಶಿಷ್ಯರು ಹೊಲದ ಪಕ್ಕದಲ್ಲಿ ನಡೆದುಹೋಗುವಾಗ ತಿನ್ನುವುದಕ್ಕಾಗಿ ತೆನೆಗಳನ್ನು ಕಿತ್ತರೆಂದು ನಮ್ಮ ಪ್ರೀತಿಯೂ ಅಪಾರ ಕರುಣೆಯೂ ಉಳ್ಳ ದೇವರು ನಿಜವಾಗಿಯೂ ನೊಂದುಕೊಳ್ಳುವರೇ? ಅತಿಯಾದ ಪಾಪಭೀತಿಯ ಮನಸ್ಸು ಹಾಗೆ ಭಾವಿಸಬಹುದು. ಆದರೆ ಇಂತಹ ಕ್ರಿಯೆಯಿಂದ ದೇವರು ನೊಂದುಕೊಳ್ಳುವುದಿಲ್ಲ ಎಂಬುದನ್ನು ನಮ್ಮ ಸಹಜ ವಿವೇಕವೇ ನಮಗೆ ತಿಳಿಸಬೇಕು.
ಈ ಕುರಿತು ಯೇಸು ಕೊನೆಯಲ್ಲಿ ಹೇಳಿದ ಮಾತು ವಿಷಯವನ್ನು ಸ್ಪಷ್ಟಪಡಿಸುತ್ತದೆ. “ಸಬ್ಬತ್ ದಿನವು ಮನುಷ್ಯನಿಗಾಗಿ ಉಂಟಾಯಿತು, ಮನುಷ್ಯನು ಸಬ್ಬತ್ ದಿನಕ್ಕಾಗಿ ಅಲ್ಲ.” ಬೇರೆ ಮಾತಿನಲ್ಲಿ ಹೇಳುವುದಾದರೆ, ಸಬ್ಬತ್ ದಿನದ ಉದ್ದೇಶ ನಮ್ಮ ಮೇಲೆ ಅತಿಯಾದ ಪಾಪಭೀತಿಯ ಹೊರೆಯನ್ನು ಹೇರುವುದಲ್ಲ; ಬದಲಾಗಿ, ವಿಶ್ರಾಂತಿ ಪಡೆಯಲು ಮತ್ತು ದೇವರನ್ನು ಆರಾಧಿಸಲು ನಮ್ಮನ್ನು ಸ್ವತಂತ್ರಗೊಳಿಸುವುದೇ ಆಗಿತ್ತು. ಸಬ್ಬತ್ ದಿನವು ದೇವರು ನಮಗೆ ನೀಡಿದ ಕೊಡುಗೆಯಾಗಿದೆ.
ಇಂದು ನಾವು ಸಬ್ಬತ್ ದಿನವನ್ನು ಆಚರಿಸುವ ರೀತಿಯನ್ನು ನೋಡುವಾಗ, ಇದಕ್ಕೆ ಪ್ರಾಯೋಗಿಕ ಮಹತ್ವವಿದೆ. ಭಾನುವಾರವು ಹೊಸ ಸಬ್ಬತ್ ಆಗಿದ್ದು, ಅದು ವಿಶ್ರಾಂತಿ ಮತ್ತು ಆರಾಧನೆಯ ದಿನವಾಗಿದೆ. ಕೆಲವೊಮ್ಮೆ ನಾವು ಈ ಕರ್ತವ್ಯಗಳನ್ನು ಹೊರೆಗಳೆಂದು ಕಾಣಬಹುದು. ಅತಿಯಾದ ಪಾಪಭೀತಿಯಿಂದ, ಕೇವಲ ಕಾನೂನಿನ ಅಕ್ಷರಕ್ಕೆ ಅಂಟಿಕೊಂಡು ಆಜ್ಞೆಗಳನ್ನು ಪಾಲಿಸುವಂತೆ ನಮ್ಮನ್ನು ಆಹ್ವಾನಿಸಲು ಅವುಗಳನ್ನು ನೀಡಲಾಗಿಲ್ಲ. ಅನುಗ್ರಹದ ಜೀವನಕ್ಕೆ ನಮ್ಮನ್ನು ಆಹ್ವಾನಿಸಲು ಅವುಗಳನ್ನು ನೀಡಲಾಗಿದೆ.
ಹಾಗಾದರೆ ಭಾನುವಾರಗಳಂದು ನಾವು ತಪ್ಪದೆ ದಿವ್ಯಬಲಿಯಲ್ಲಿ ಭಾಗವಹಿಸುವ ಮತ್ತು ವಿಶ್ರಾಂತಿ ಪಡೆಯುವ ಅಗತ್ಯವಿಲ್ಲ ಎಂದರ್ಥವೇ? ಖಂಡಿತವಾಗಿಯೂ ಅಲ್ಲ. ಧರ್ಮಸಭೆಯ ಈ ಆಜ್ಞೆಗಳು ಸ್ಪಷ್ಟವಾಗಿಯೇ ದೇವರ ಚಿತ್ತವಾಗಿವೆ. ನಿಜವಾದ ಪ್ರಶ್ನೆ, ಈ ಆಜ್ಞೆಗಳನ್ನು ನಾವು ಹೇಗೆ ನೋಡುತ್ತೇವೆ ಎಂಬುದಾಗಿದೆ. ಅವುಗಳನ್ನು ಕೇವಲ ಕಾನೂನಿನ ಅವಶ್ಯಕತೆಗಳೆಂದು ನೋಡುವ ಬಲೆಗೆ ಬೀಳದೆ, ನಮ್ಮ ಹಿತಕ್ಕಾಗಿಯೇ ನೀಡಲಾದ ಅನುಗ್ರಹದ ಆಹ್ವಾನಗಳೆಂದು ಸ್ವೀಕರಿಸಿ ಅವುಗಳಂತೆ ಜೀವಿಸಲು ನಾವು ಶ್ರಮಿಸಬೇಕು. ಈ ಆಜ್ಞೆಗಳು ನಮಗಾಗಿಯೇ ಇವೆ. ನಮಗೆ ಸಬ್ಬತ್ ದಿನದ ಅಗತ್ಯವಿರುವುದರಿಂದಲೇ ಅವು ಕಡ್ಡಾಯವಾಗಿವೆ. ನಮಗೆ ಭಾನುವಾರದ ದಿವ್ಯಬಲಿ ಅಗತ್ಯವಿದೆ; ಪ್ರತಿ ವಾರವೂ ವಿಶ್ರಾಂತಿಗಾಗಿ ಒಂದು ದಿನ ಬೇಕಾಗಿದೆ.
ನೀವು ಪ್ರಭುವಿನ ದಿನವನ್ನು ಹೇಗೆ ಆಚರಿಸುತ್ತೀರಿ ಎಂಬುದನ್ನು ಇಂದು ಧ್ಯಾನಿಸಿ. ಆರಾಧಿಸಲು ಮತ್ತು ವಿಶ್ರಾಂತಿ ಪಡೆಯಲು ಇರುವ ಕರೆಯನ್ನು, ದೇವರ ಅನುಗ್ರಹದಿಂದ ನವೀಕೃತರಾಗಿ ಹೊಸ ಚೈತನ್ಯ ಪಡೆಯಲು ಆತನು ನೀಡುವ ಆಹ್ವಾನವೆಂದು ಕಾಣುತ್ತೀರಾ? ಅಥವಾ ಅದನ್ನು ಕೇವಲ ನೆರವೇರಿಸಬೇಕಾದ ಕರ್ತವ್ಯವೆಂದು ಕಾಣುತ್ತೀರಾ? ಇಂದು ಸರಿಯಾದ ಮನೋಭಾವವನ್ನು ಹೊಂದಲು ಪ್ರಯತ್ನಿಸಿ; ಆಗ ಪ್ರಭುವಿನ ದಿನವು ನಿಮಗೆ ಸಂಪೂರ್ಣ ಹೊಸ ಅರ್ಥವನ್ನು ಪಡೆದುಕೊಳ್ಳುತ್ತದೆ.
ನನ್ನನ್ನು ಆಹ್ವಾನಿಸುವ ಪ್ರಭುವೇ, ವಿಶ್ರಾಂತಿ ಪಡೆಯಲು ಮತ್ತು ನಿಮ್ಮನ್ನು ಆರಾಧಿಸಲು ನೂತನ ಸಬ್ಬತ್ ದಿನವನ್ನು ಸ್ಥಾಪಿಸಿದ್ದಕ್ಕಾಗಿ ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ಪ್ರತಿ ಭಾನುವಾರವನ್ನೂ ಕಡ್ಡಾಯ ಹಬ್ಬದ ದಿನವನ್ನೂ ನೀವು ಬಯಸುವ ರೀತಿಯಲ್ಲಿ ಕಳೆಯಲು ನನಗೆ ಸಹಾಯ ಮಾಡಿರಿ. ನಿಮ್ಮನ್ನು ಆರಾಧಿಸಲು ಮತ್ತು ನವೀಕರಣಗೊಳ್ಳಲು ಈ ದಿನಗಳನ್ನು ನೀವು ನೀಡಿದ ಕೊಡುಗೆಯಾಗಿ ಕಾಣಲು ನನಗೆ ಸಹಾಯ ಮಾಡಿರಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಸಾಮಾನ್ಯ ಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
