ಡಿಸೆಂಬರ್ 11, 2022
ಆಗಮನಕಾಲದ ಮೂರನೆಯ ಭಾನುವಾರ (ವರ್ಷ A)
ಇಂದಿನ ಪಠಣಗಳು
ಸ್ನಾನಿಕ ಯೊವಾನ್ನನು ಸೆರೆಮನೆಯಲ್ಲಿದ್ದಾಗ ಕ್ರಿಸ್ತನ ಕಾರ್ಯಗಳ ಬಗ್ಗೆ ಕೇಳಿ, ತನ್ನ ಶಿಷ್ಯರನ್ನು ಯೇಸುವಿನ ಬಳಿಗೆ ಕಳುಹಿಸಿ, “ಬರಬೇಕಾದವರು ನೀವೇನಾ, ಅಥವಾ ನಾವು ಬೇರೊಬ್ಬರನ್ನು ಎದುರುನೋಡಬೇಕೇ?” ಎಂದು ಕೇಳಿಸಿದನು. ಮತ್ತಾಯ 11:2–3
ಸಂತ ಸ್ನಾನಿಕ ಯೊವಾನ್ನನು ಈ ಪ್ರಶ್ನೆಯನ್ನು ಕೇಳಲು ತನ್ನ ಶಿಷ್ಯರನ್ನು ಯೇಸುವಿನ ಬಳಿಗೆ ಏಕೆ ಕಳುಹಿಸಿದನು? ಯೊವಾನ್ನನು ಈ ಹಿಂದೆ ಯೇಸುವಿನ ಬಗ್ಗೆ, “ಇಗೋ, ಲೋಕದ ಪಾಪವನ್ನು ಪರಿಹರಿಸುವ ದೇವರ ಕುರಿಮರಿ” (ಯೊವಾನ್ನ 1:29) ಎಂದು ಹೇಳಿದ್ದನ್ನು ನೆನಪಿಸಿಕೊಳ್ಳಿ. ಹಾಗಾದರೆ, ಯೇಸುವೇ “ಲೋಕದ ಪಾಪವನ್ನು ಪರಿಹರಿಸುವ ದೇವರ ಕುರಿಮರಿ” ಎಂದು ಯೊವಾನ್ನನಿಗೆ ತಿಳಿದಿದ್ದರೆ, ಬರಬೇಕಾದವರು ಅವರೇನಾ ಎಂದು ಯೇಸುವನ್ನು ಕೇಳಲು ಅವನು ತನ್ನ ಶಿಷ್ಯರನ್ನು ಏಕೆ ಕಳುಹಿಸಿದನು?
ಧರ್ಮಸಭೆಯ ಪಿತೃಗಳು ಇದಕ್ಕೆ ಅನೇಕ ಕಾರಣಗಳನ್ನು ಪರಿಶೀಲಿಸುತ್ತಾರೆ. ಆದರೆ ಅವರಲ್ಲಿ ಹೆಚ್ಚಿನವರು ಈ ತೀರ್ಮಾನಕ್ಕೆ ಬರುತ್ತಾರೆ: ಯೇಸು ಯಾರೆಂದು ಯೊವಾನ್ನನಿಗೆ ತಿಳಿದಿರಲಿಲ್ಲವೆಂದು ಅವನು ಹೀಗೆ ಮಾಡಲಿಲ್ಲ; ಹೆರೋದನು ತನ್ನನ್ನು ಕೊಂದ ಬಳಿಕ ತನ್ನ ಶಿಷ್ಯರು ನಮ್ಮ ಪ್ರಭುವನ್ನು ಹಿಂಬಾಲಿಸುವಂತಾಗಲಿ ಎಂದು ಅವರ ಒಳಿತಿಗಾಗಿ ಹೀಗೆ ಮಾಡಿದನು. ಹೀಗೆ ತನ್ನ ಶಿಷ್ಯರಿಗೆ ಯೇಸುವಿನ ಕಡೆಗೆ ದಾರಿ ತೋರಿಸಲು ಮತ್ತು ಅವರ ವಿಶ್ವಾಸದ ಬದುಕಿನಲ್ಲಿ ಈ ಹೊಸ ಬದಲಾವಣೆಯನ್ನು ಸ್ವೀಕರಿಸುವಂತೆ ಅವರನ್ನು ಪ್ರೋತ್ಸಾಹಿಸಲು ಅವನು ಪ್ರಯತ್ನಿಸಿದನು.
ಯೊವಾನ್ನನು ತನ್ನ ಶಿಷ್ಯರನ್ನು ತಮ್ಮ ಬಳಿಗೆ ಕಳುಹಿಸಿದ ಕಾರಣವನ್ನು ಯೇಸು ಅರ್ಥಮಾಡಿಕೊಂಡರು. ಆದ್ದರಿಂದ, ಆ ಶಿಷ್ಯರು ಸ್ವತಃ ವಿಶ್ವಾಸಕ್ಕೆ ಬರಲು ಅವರಿಗೆ ಬೇಕಾದುದನ್ನು ಯೇಸು ನೀಡಿದರು. ತಾವು ಕ್ರಿಸ್ತನಾಗಿ ಮಾಡಿದ ಕಾರ್ಯಗಳನ್ನು ಅವರು ಸ್ವತಃ ಅರ್ಥಮಾಡಿಕೊಂಡು, ಆ ಮೂಲಕ ವಿಶ್ವಾಸದ ನವೀನತೆಗೆ ಬರಲು ಸಾಧ್ಯವಾಗುವಂತೆ ಯೇಸು ಆ ಕಾರ್ಯಗಳತ್ತ ಅವರ ಗಮನ ಸೆಳೆದರು. ಕುರುಡರು ಮತ್ತೆ ದೃಷ್ಟಿ ಪಡೆಯುತ್ತಾರೆ, ಕುಂಟರು ನಡೆಯುತ್ತಾರೆ, ಕುಷ್ಠರೋಗಿಗಳು ಶುದ್ಧರಾಗುತ್ತಾರೆ, ಕಿವುಡರು ಕೇಳುತ್ತಾರೆ, ಸತ್ತವರು ಎಬ್ಬಿಸಲ್ಪಡುತ್ತಾರೆ ಮತ್ತು ಬಡವರಿಗೆ ಶುಭಸಂದೇಶ ಸಾರಲಾಗುತ್ತದೆ ಎಂಬುದನ್ನು ಯೇಸು ತೋರಿಸಿಕೊಟ್ಟರು. ಪರಲೋಕದಿಂದ ಬಂದ ಇಂತಹ ಅದ್ಭುತ ಸೂಚಕಕಾರ್ಯಗಳನ್ನು ಯಾರು ತಾನೇ ಅಲ್ಲಗಳೆಯಬಲ್ಲರು? ಆದರೆ ಯೇಸು ಇನ್ನೂ ಮುಂದೆ ಹೋಗಿ, ಬಹಳ ಸೂಕ್ಷ್ಮವಾದ ಮಾತೊಂದನ್ನು ಹೇಳಿದರು. “ನನ್ನ ವಿಷಯದಲ್ಲಿ ಎಡವದವನು ಧನ್ಯನು” ಎಂದು ಹೇಳಿದರು. ಆಧ್ಯಾತ್ಮಿಕ ನಾಯಕರ ಈ ಬದಲಾವಣೆಯನ್ನು ಒಪ್ಪಿಕೊಳ್ಳುವಲ್ಲಿ ಈ ಶಿಷ್ಯರು ವೈಯಕ್ತಿಕವಾಗಿ ಅನುಭವಿಸುತ್ತಿದ್ದಂತೆ ತೋರುವ ಹೋರಾಟಕ್ಕಾಗಿ ಯೇಸು ಅವರನ್ನು ಮೃದುವಾಗಿ ತಿದ್ದಿದ ಒಂದು ವಿಧಾನವಾಗಿ ಈ ಮಾತು ಕಾಣುತ್ತದೆ. ಅವರು ಎದುರಿಸುತ್ತಿದ್ದ ಒಂದು ನಿರ್ದಿಷ್ಟ “ಎಡವಟ್ಟನ್ನು” ಯೇಸು ಗುರುತಿಸಿದರು. ಯೊವಾನ್ನನು ಕಡಿಮೆಯಾಗುತ್ತಿರಲು ಯೇಸು ನಿಜವಾಗಿಯೂ ಹೆಚ್ಚಾಗುತ್ತಿದ್ದರು ಎಂಬ ಸಂಗತಿಯೇ ಅವರಿಗೆ “ಎಡವಲು” ಕಾರಣವಾಗಿತ್ತು.
ಅನೇಕ ರೀತಿಗಳಲ್ಲಿ, ನಮ್ಮ ಆಧ್ಯಾತ್ಮಿಕ ಬದುಕಿನಲ್ಲಿ ಬದಲಾವಣೆ ಉಂಟಾದಾಗಲೆಲ್ಲ ಇದು ಸಾಮಾನ್ಯ ಅನುಭವವಾಗಿದೆ. ಏನಾದರೂ ಹೊಸದಾಗಿದ್ದಾಗ, ಅದರ ಬದಲಾವಣೆ ಮತ್ತು ನವೀನತೆಯ ವಿವಿಧ ಅಂಶಗಳೊಂದಿಗೆ ಹೊಂದಿಕೊಳ್ಳಲು ನಾವು ಅನೇಕ ಬಾರಿ ಹೆಣಗಾಡುತ್ತೇವೆ. ಆದರೆ ಕ್ರೈಸ್ತ ಜೀವನವೆಂದರೆ ಬದಲಾವಣೆ, ರೂಪಾಂತರ ಮತ್ತು ಬದುಕಿನ ನವೀನತೆಯೇ ಆಗಿದೆ. ಇದು ಒಳ್ಳೆಯದೇ. ನಾವು ಬದಲಾಗಲು, ರೂಪಾಂತರಗೊಳ್ಳಲು, ಉತ್ತಮವಾದ ಮತ್ತು ಹೊಸ ಸಂಬಂಧಗಳನ್ನು ಬೆಳೆಸಲು, ಪ್ರೀತಿಸುವ ಮತ್ತು ಇತರರಿಗೆ ನೆರವಾಗಲು ಮುಂದಾಗುವ ಹೊಸ ವಿಧಾನಗಳನ್ನು ಕಲಿಯಲು ಪ್ರಯತ್ನಿಸಬೇಕು. ನಮ್ಮ ಪ್ರಭು ನಮ್ಮ ಬದುಕಿನಲ್ಲಿ ತರುವ ಪ್ರತಿಯೊಂದು ಹೊಸ ಅನುಭವವನ್ನೂ ಮನಃಪೂರ್ವಕವಾಗಿ ಸ್ವೀಕರಿಸುವಂತಾಗಬೇಕು.
ಇಂದು, ನಿಮ್ಮ ಆಧ್ಯಾತ್ಮಿಕ ಬದುಕಿನ ಬದಲಾವಣೆಗಳೊಂದಿಗೆ ಹೊಂದಿಕೊಳ್ಳಲು ನೀವು ಯಾವ ರೀತಿಯಲ್ಲಿ ಹೆಣಗಾಡಿದ್ದೀರಿ ಎಂಬುದನ್ನು ಧ್ಯಾನಿಸಿ. ಅನೇಕ ಬಾರಿ, ನಾವು ಯಾವುದರೊಂದಿಗೆ ಹೆಣಗಾಡುತ್ತೇವೋ ಅವು ವಾಸ್ತವದಲ್ಲಿ ನಮ್ಮ ಕ್ರೈಸ್ತ ವಿಶ್ವಾಸ ಮತ್ತು ಪ್ರೀತಿಯನ್ನು ಹೊಸ ಮಟ್ಟದಲ್ಲಿ ಜೀವಿಸಲು ಸಿಗುವ ಅದ್ಭುತ ಅವಕಾಶಗಳಾಗಿರುತ್ತವೆ. ನಿಮ್ಮ ಬದುಕಿನಲ್ಲಿ ಯಾವ ಬದಲಾವಣೆಗಳನ್ನು ಸ್ವೀಕರಿಸಲು ದೇವರು ನಿಮ್ಮನ್ನು ಕರೆಯುತ್ತಿದ್ದಾರೆ ಎಂಬುದನ್ನು ಅರಸಿರಿ. ಅವು ಕಷ್ಟಕರವಾಗಿದ್ದರೂ, ನೀವು ಇನ್ನಷ್ಟು ಪವಿತ್ರವಾದ ಬದುಕನ್ನು ನಡೆಸಲು ಅವೇ ಅತ್ಯಂತ ಖಚಿತವಾದ ಮಾರ್ಗವೆಂಬುದನ್ನು ತಿಳಿದುಕೊಳ್ಳಿ.
ಪ್ರೀತಿಯ ಪ್ರಭುವೇ, ನಿಮ್ಮನ್ನು ಇನ್ನಷ್ಟು ನಿಷ್ಠೆಯಿಂದ ಹಿಂಬಾಲಿಸಲು, ಬದುಕಿನ ನವೀನತೆಯನ್ನೂ ನಾನು ಎದುರಿಸಲೇಬೇಕಾದ ಬದಲಾವಣೆಗಳನ್ನೂ ಸ್ವೀಕರಿಸುವಂತೆ ನೀವು ನನ್ನನ್ನು ಕರೆಯುತ್ತೀರಿ ಎಂದು ನನಗೆ ತಿಳಿದಿದೆ. ನಿಮ್ಮ ಅನುಗ್ರಹದಲ್ಲಿ ನಾನು ನಿರಂತರವಾಗಿ ಹೊಸ ಸೃಷ್ಟಿಯಾಗುತ್ತಾ ಇರಲು, ನೀವು ನನ್ನನ್ನು ಕರೆಯುವ ಎಲ್ಲವನ್ನೂ ಸ್ವೀಕರಿಸಲು ಮನಸ್ಸು ತೆರೆದಿರುವಂತೆ ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆ ಇಡುತ್ತೇನೆ.
ಭಾನುವಾರದ ಇನ್ನಷ್ಟು ವೀಡಿಯೊ ಧ್ಯಾನಗಳು
ಸಂತ ಅಂದ್ರೇಯರ ಕ್ರಿಸ್ಮಸ್ ನೊವೇನಾ
ಕೆಳಗೆ ನೀಡಿರುವ ಸಂತ ಅಂದ್ರೇಯರ ಕ್ರಿಸ್ಮಸ್ ನೊವೇನಾ ಪ್ರಾರ್ಥನೆಯನ್ನು ಸಾಂಪ್ರದಾಯಿಕವಾಗಿ ನವೆಂಬರ್ 30ರ ಸಂತ ಅಂದ್ರೇಯರ ಹಬ್ಬದಿಂದ ಕ್ರಿಸ್ಮಸ್ ಮುನ್ನಾದಿನದವರೆಗೆ ದಿನಕ್ಕೆ 15 ಬಾರಿ ಪ್ರಾರ್ಥಿಸಲಾಗುತ್ತದೆ.
ನಮ್ಮ ಆಗಮನ ಕಾಲದ ಸಂಪನ್ಮೂಲಗಳನ್ನು ನೋಡಿ!
ಇಂದಿನ ಸಂತರು – ಸಂತ ದಮಾಸುಸ್ I, ಪೋಪ್
ಈ ವರ್ಷ ಭಾನುವಾರದಂದು ಬರುವುದರಿಂದ ಆರಾಧನಾ ಸ್ಮರಣೆಯಾಗಿ ಆಚರಿಸಲಾಗುವುದಿಲ್ಲ
ಮೇಲಿನ ವಿಶೇಷ ಚಿತ್ರ: ಸೆರೆಮನೆಯಲ್ಲಿರುವ ಸಂತ ಸ್ನಾನಿಕ ಯೊವಾನ್ನ, flickr ಮೂಲಕ
