2021 നവംബർ 9, ചൊവ്വാഴ്ച
റോമിലെ ലാറ്ററൻ ബസിലിക്കയുടെ പ്രതിഷ്ഠയുടെ തിരുനാൾ
യേശു അവരോടു മറുപടി പറഞ്ഞു: “ഈ ദേവാലയം നശിപ്പിക്കുക; മൂന്നു ദിവസത്തിനുള്ളിൽ ഞാൻ അതു വീണ്ടും ഉയർത്തും.” യഹൂദർ ചോദിച്ചു: “ഈ ദേവാലയത്തിന്റെ നിർമാണം നാല്പത്താറു വർഷമായി നടന്നുവരുന്നു; നീ അതു മൂന്നു ദിവസത്തിനുള്ളിൽ ഉയർത്തുമെന്നോ?” എന്നാൽ അവൻ പറഞ്ഞത് തന്റെ ശരീരമാകുന്ന ദേവാലയത്തെക്കുറിച്ചായിരുന്നു. യോഹന്നാൻ 2:19–21
റോമൻ കത്തോലിക്കാസഭയുടെ മുഴുവൻ മാതൃദേവാലയമായ റോമിലെ ലാറ്ററൻ ബസിലിക്കയെ അനുസ്മരിച്ചാണ് നാം ഇന്ന് ആഘോഷിക്കുന്നത്. നാലാം നൂറ്റാണ്ടിൽ ഈ ദേവാലയം റോമിന്റെ മെത്രാനു നൽകപ്പെട്ടു. ലാറ്ററൻ ബസിലിക്ക ജീർണാവസ്ഥയിലായിരുന്ന കാലത്ത് വിശുദ്ധ പത്രോസിന്റെ ബസിലിക്ക നിർമിക്കപ്പെടുന്നതുവരെ അത് മാർപാപ്പയുടെ മുഖ്യ വസതിയായി തുടർന്നു. എങ്കിലും, ഔദ്യോഗികമായി റോമിന്റെ കത്തീഡ്രൽ ദേവാലയമായതിനാൽ ലാറ്ററൻ ബസിലിക്ക ഇന്നും ലോകത്തിലെ ഏറ്റവും പ്രധാനപ്പെട്ട ദേവാലയമായി നിലകൊള്ളുന്നു.
ഈ ദേവാലയത്തെ ആദരിക്കുമ്പോൾ, ഒരു കെട്ടിടത്തെക്കാൾ ഉപരിയായ ഒന്നിനെയാണ് നാം ആദരിക്കുന്നത്. യേശുക്രിസ്തുവിന്റെ ഏക സത്യസഭയുടെ പ്രതീകമാണ് ലാറ്ററൻ ബസിലിക്ക. അതിന്റെ ഉൾഭാഗം മനോഹരവും വിസ്മയാദരങ്ങൾ ഉണർത്തുന്നതുമാണ്. അതിലൂടെ, ക്രിസ്തുവിന്റെ മൗതികശരീരമായ സഭയുടെ സങ്കല്പാതീതമായ സൗന്ദര്യത്തിലേക്ക് നമ്മുടെ ശ്രദ്ധ തിരിയുന്നു.
യേശു ദേവാലയത്തിൽ പ്രവേശിച്ച്, ഒരു ചാട്ടവാറുകൊണ്ട് നാണയമാറ്റക്കാരെയും അവർ ലാഭത്തിനായി വിറ്റുകൊണ്ടിരുന്ന മൃഗങ്ങളെയും പുറത്താക്കുന്നതാണ് ഇന്നത്തെ സുവിശേഷം ചിത്രീകരിക്കുന്നത്. അങ്ങനെ ചെയ്യുമ്പോൾ അവൻ വിളിച്ചുപറഞ്ഞു: “ഇവയെ ഇവിടെനിന്നു കൊണ്ടുപോകുവിൻ; എന്റെ പിതാവിന്റെ ഭവനം ഒരു ചന്തയാക്കുന്നതു നിർത്തുവിൻ.” തുടർന്ന് സങ്കീർത്തനം 69 ഉദ്ധരിക്കപ്പെടുന്നു: അങ്ങയുടെ ഭവനത്തെക്കുറിച്ചുള്ള തീക്ഷ്ണത എന്നെ ദഹിപ്പിക്കും.
യേശു തന്റെ സഭയെ സ്വന്തം ശരീരമായി സ്നേഹിക്കുന്നു—കാരണം സഭ അവിടുത്തെ ശരീരംതന്നെയാണ്. അവിടുത്തെ ശരീരമെന്ന നിലയിൽ, അവിടുത്തെ ഉപകരണങ്ങളായും രക്ഷാകരപ്രവർത്തനത്തിൽ പങ്കാളികളായും പ്രവർത്തിക്കാനാണ് സഭാംഗങ്ങൾ വിളിക്കപ്പെടുകയും അയക്കപ്പെടുകയും ചെയ്തിരിക്കുന്നത്. ഒരു ദേവാലയക്കെട്ടിടത്തെക്കാൾ എത്രയോ ഉപരിയായി, ഇന്ന് നാം സഭയെത്തന്നെയാണ് ആദരിക്കുന്നത്—അതായത്, ക്രിസ്തുവിന്റെ ശരീരത്തിലെ അംഗമായിരിക്കുന്നിടത്തോളം നിങ്ങളെയും നാം ആദരിക്കുന്നു. ഇന്നത്തെ തിരുനാളിനായുള്ള ഈ സുവിശേഷഭാഗത്തിന്റെ വെളിച്ചത്തിൽ, തന്റെ സഭയെ ശുദ്ധീകരിക്കുന്നതിൽ നമ്മുടെ കർത്താവിനുള്ള തീക്ഷ്ണതയെക്കുറിച്ച് നാം ഓർമിപ്പിക്കപ്പെടുന്നു.
സഭ എങ്ങനെയാണ് ശുദ്ധീകരിക്കപ്പെടുന്നത്? സഭാംഗങ്ങൾ ശുദ്ധീകരിക്കപ്പെടുന്നതിലൂടെയാണ് സഭ ശുദ്ധീകരിക്കപ്പെടുന്നത്. അതായത്, തന്റെ ശരീരത്തിലെ അംഗമെന്ന നിലയിൽ നിങ്ങൾക്കുള്ള അത്യന്താപേക്ഷിതമായ ദൗത്യം നിറവേറ്റുന്നതിൽനിന്ന് നിങ്ങളെ തടയുന്ന മാലിന്യം നീക്കി, നിങ്ങളുടെ ആത്മാവിൽനിന്ന് എല്ലാ പാപങ്ങളും പുറത്താക്കാൻ യേശു പരിപൂർണ തീക്ഷ്ണതയോടെ ആഗ്രഹിക്കുന്നു.
ശുദ്ധീകരിക്കപ്പെടാനുള്ള നമ്മുടെ പ്രതിബദ്ധതയിൽ ചിലപ്പോൾ നാം അയവുവരുത്തുന്നു. ചെയ്യുന്ന പാപങ്ങളുമായി എളുപ്പത്തിൽ നാം പൊരുത്തപ്പെട്ടുപോകാം; ഉപേക്ഷിക്കാൻ പ്രയാസമുള്ള ശീലങ്ങൾ വളർത്തിയെടുക്കുകയും ചെയ്യാം. അങ്ങനെ സംഭവിക്കുമ്പോൾ, ദേവാലയശുദ്ധീകരണത്തിന്റെ ഈ സംഭവം ധ്യാനിക്കുകയും നമ്മുടെ സ്വന്തം ആത്മാവിനെ ശുദ്ധീകരിക്കാനുള്ള യേശുവിന്റെ ആഗ്രഹമായി അതിനെ കാണുകയും ചെയ്യുന്നത് ഉപകാരപ്രദമാണ്. നമ്മുടെ കർത്താവിന്റെ ഹൃദയത്തിലുള്ള അചഞ്ചലമായ തീക്ഷ്ണതയാൽ ചിലപ്പോൾ നാം ഉണർത്തപ്പെടുകയും വെല്ലുവിളിക്കപ്പെടുകയും നമ്മുടെ തെറ്റുകളെ അഭിമുഖീകരിക്കാൻ പ്രേരിപ്പിക്കപ്പെടുകയും പ്രോത്സാഹിപ്പിക്കപ്പെടുകയും ചെയ്യേണ്ടതുണ്ട്.
യേശു ദേവാലയം ശുദ്ധീകരിക്കുന്നതിന്റെ ഈ ശക്തമായ ചിത്രത്തെക്കുറിച്ച് ഇന്ന് ധ്യാനിക്കുക. അങ്ങനെ ചെയ്യുമ്പോൾ അതിനെ നിങ്ങളുടെ സ്വന്തം ജീവിതവുമായി ബന്ധപ്പെടുത്തുക. ദേവാലയത്തിൽ വിൽക്കുകയും വാങ്ങുകയും ചെയ്തിരുന്നവർ യേശുവിന്റെ തീക്ഷ്ണതയും പ്രവൃത്തികളും കണ്ട് ഞെട്ടിയിട്ടുണ്ടാകണം. നിങ്ങളുടെ പാപങ്ങളിൽ അസ്വസ്ഥതയൊന്നുമില്ലാതെ നിങ്ങൾ കഴിയുന്നുണ്ടെങ്കിൽ, നിങ്ങളെയും ഉണർത്താൻ ഈ വിശുദ്ധമായ ഞെട്ടലിനെ അനുവദിക്കാൻ ശ്രമിക്കുക. നമ്മുടെ കർത്താവിന്റെ തീക്ഷ്ണത നിങ്ങളെ സ്വാധീനിക്കാൻ അനുവദിക്കുക. അവിടുത്തെ വിശുദ്ധസഭയിൽ കൂടുതൽ പൂർണമായി പ്രവർത്തിക്കുന്ന ഒരു അംഗമായിത്തീരാൻ നിങ്ങളെ സ്വതന്ത്രരാക്കുക എന്ന ആഗ്രഹത്തോടെ അവിടുന്ന് ചെയ്യുന്ന ശുദ്ധീകരണപ്രവൃത്തികൾ സ്നേഹത്തിന്റെ പ്രവൃത്തികളാണെന്ന് അറിയുക.
തീക്ഷ്ണതയുള്ള എന്റെ കർത്താവേ, എന്നെയും അങ്ങയുടെ എല്ലാ മക്കളെയും പാപത്തിൽനിന്ന് ശുദ്ധീകരിക്കാനുള്ള അഗാധമായ ആഗ്രഹത്താൽ അങ്ങയുടെ ഹൃദയം ജ്വലിക്കുന്നു. അങ്ങയുടെ ശരീരമായ സഭയിലെ കൂടുതൽ പൂർണനായ ഒരു അംഗമായി എന്നെ മാറ്റാൻ അങ്ങേക്കു കഴിയുന്നതെല്ലാം ചെയ്യാനുള്ള സന്നദ്ധതയും അങ്ങയുടെ അഗാധമായ സ്നേഹവും അങ്ങയുടെ തീക്ഷ്ണത വെളിപ്പെടുത്തുന്നു. പ്രിയ കർത്താവേ, അങ്ങ് എന്നോടു പറയാൻ ആഗ്രഹിക്കുന്നതെല്ലാം സ്വീകരിക്കാൻ എന്റെ മനസ്സും ഇച്ഛാശക്തിയും തുറക്കണമേ. എന്റെ ജീവിതത്തിലെ അങ്ങയുടെ ശുദ്ധീകരണപ്രവർത്തനത്തോടു പ്രതികരിക്കാനുള്ള കൃപ എനിക്കു നൽകണമേ. ഈശോയേ, അങ്ങയിൽ ഞാൻ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ തിരുനാൾ – ലാറ്ററൻ ബസിലിക്കയുടെ പ്രതിഷ്ഠാതിരുനാൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
_-_James_Tissot.jpg){kind=link}