2024 സെപ്റ്റംബർ 20, വെള്ളിയാഴ്ച
ഇന്നത്തെ വായനകൾ
ആണ്ടുവട്ടത്തിലെ ഇരുപത്തിനാലാം ആഴ്ചയിലെ വെള്ളിയാഴ്ചത്തെ വായനകൾ
ദൈവരാജ്യത്തിന്റെ സദ്വാർത്ത പ്രസംഗിക്കുകയും പ്രഘോഷിക്കുകയും ചെയ്തുകൊണ്ട് യേശു ഒരു പട്ടണത്തിൽനിന്ന് മറ്റൊന്നിലേക്കും ഒരു ഗ്രാമത്തിൽനിന്ന് മറ്റൊന്നിലേക്കും സഞ്ചരിച്ചു. പന്ത്രണ്ടുപേരും ദുഷ്ടാത്മാക്കളിൽനിന്നും രോഗങ്ങളിൽനിന്നും മോചിതരായ ചില സ്ത്രീകളും അവനോടൊപ്പമുണ്ടായിരുന്നു… ലൂക്കാ 8:1–2
നമ്മുടെ കർത്താവ് ഒരു ദൗത്യത്തിലായിരുന്നു. “ദൈവരാജ്യത്തിന്റെ സദ്വാർത്ത പ്രസംഗിക്കുകയും പ്രഘോഷിക്കുകയും ചെയ്തുകൊണ്ട്” അവിടുന്ന് ഒരു പട്ടണത്തിൽനിന്ന് മറ്റൊന്നിലേക്ക് കാൽനടയായി സഞ്ചരിച്ചു. അവിടുത്തെ സന്ദേശം യഥാർഥത്തിൽ “സദ്വാർത്ത” തന്നെയായിരുന്നു. അവിടുന്ന് രോഗികളെ സുഖപ്പെടുത്തി, പിശാചുക്കളെ പുറത്താക്കി, സർവോപരി പാപങ്ങൾ ക്ഷമിച്ചു. തത്ഫലമായി അനേകർ അവിടുത്തെ അനുഗമിക്കാൻ തുടങ്ങി. യേശു നേരിട്ടു വിളിച്ചവരും പിന്നീട് തന്റെ അപ്പസ്തോലന്മാരായി അയയ്ക്കാനിരുന്നവരുമായ പന്ത്രണ്ടുപേർ മാത്രമല്ല അവിടുത്തെ അനുയായികളായിരുന്നത്; മറ്റുള്ളവരും അവിടുത്തെ അനുഗമിച്ചു. ഇന്നത്തെ സുവിശേഷം മൂന്നു സ്ത്രീകളുടെ പേരുകളും പരാമർശിക്കുന്നു: മഗ്ദലനമറിയം, യൊവാന്ന, സൂസന്ന. നമ്മുടെ കർത്താവിന്റെ ആഴമായ സ്പർശം അനുഭവിക്കുകയും അതിനുള്ള മറുപടിയായി എല്ലാം ഉപേക്ഷിച്ച് അവിടുത്തെ അനുഗമിക്കുകയും ചെയ്തവരിൽ ഏതാനും പേർ മാത്രമാണിവർ.
എല്ലാം ഉപേക്ഷിച്ച് യേശുവിനെ അനുഗമിക്കാനുള്ള ഈ ആദ്യ അനുയായികളുടെ തീരുമാനം, അവിടുത്തെ അനുഗമിക്കുന്നതിനായി നാമും നമ്മുടെ ജീവിതം എത്രത്തോളം സമർപ്പിച്ചിട്ടുണ്ടെന്ന് പരിശോധിക്കാൻ നമ്മെ ക്ഷണിക്കുന്നു. യേശുവിന്റെ പ്രസംഗം കേട്ട അനേകം ആളുകൾക്കിടയിൽ പലവിധ പ്രതികരണങ്ങൾ ഉണ്ടായിരുന്നുവെന്നതിൽ സംശയമില്ല. ചിലർ അവിടുത്തെ നിരസിച്ചു; മറ്റു ചിലർക്ക് അവിടുത്തെക്കുറിച്ച് കൗതുകം തോന്നി; വേറെ ചിലർ അവിടുത്തിൽ വിശ്വസിച്ചെങ്കിലും അവിടുത്തെ ശിഷ്യരാകാൻ തയ്യാറായില്ല; ചിലരാകട്ടെ യേശുവിനും സദ്വാർത്ത പ്രഘോഷിക്കാനുള്ള അവിടുത്തെ ദൗത്യത്തിനും പൂർണ്ണഹൃദയത്തോടെ തങ്ങളെത്തന്നെ സമർപ്പിച്ചു. ഈ അവസാനത്തെ കൂട്ടരെ സംബന്ധിച്ചിടത്തോളം, അവർ കേട്ട സദ്വാർത്ത അവരുടെ ജീവിതത്തെ മാറ്റിമറിച്ചു.
നമ്മുടെ കർത്താവിനോടുള്ള നിങ്ങളുടെ പ്രതികരണം എന്താണ്? ഈ ചോദ്യത്തിന് ശരിയായി ഉത്തരം കണ്ടെത്താനുള്ള ഒരു നല്ല മാർഗം, നമ്മുടെ കർത്താവിനും അവിടുത്തെ സദ്വാർത്തയുടെ സന്ദേശത്തിനുമായി നിങ്ങൾ എത്ര സമയവും ഊർജവും സമർപ്പിച്ചിട്ടുണ്ടെന്ന് പരിശോധിക്കുക എന്നതാണ്. അവിടുത്തെ വിശുദ്ധ വചനം വായിക്കാനും അവിടുത്തോട് പ്രാർഥിക്കാനും അവിടുത്തെക്കുറിച്ച് സംസാരിക്കാനും അവിടുന്ന് പഠിപ്പിച്ച വിശ്വാസം പഠിക്കാനും നിങ്ങൾ എത്ര സമയം ചെലവഴിച്ചിട്ടുണ്ട്? ജീവിതത്തിൽ നിങ്ങൾ എടുക്കുന്ന തീരുമാനങ്ങളെ അവിടുത്തെ സന്ദേശം എത്രത്തോളം സ്വാധീനിക്കുന്നു? ക്രൈസ്തവരായിരിക്കുക എന്നത് ജീവിതത്തിന്റെ ഒരു പ്രത്യേക അറയിൽ ഒതുക്കിവയ്ക്കാവുന്ന കാര്യമല്ല. ഓരോ ആഴ്ചയിലും ഏതാനും നിമിഷങ്ങൾ മാത്രം നമ്മുടെ “വിശ്വാസത്തിനുള്ള സമയമായി” മാറ്റിവച്ചിട്ട് ബാക്കി സമയം മറ്റു പ്രവർത്തനങ്ങളിൽ ചെലവഴിക്കാൻ നമുക്കാവില്ല. നമ്മുടെ ജീവിതത്തിന്റെ സാധാരണ ഭാഗമായ പല പ്രവർത്തനങ്ങളുംകൊണ്ട് നമ്മുടെ ദിവസങ്ങൾ നിറഞ്ഞിരിക്കുമെന്നതു ശരിയാണ്. നമ്മുടെ ദിവസങ്ങളുടെ ഏറിയ പങ്കും ആവശ്യപ്പെടുന്ന കടമകളും ഉത്തരവാദിത്വങ്ങളും നമുക്കെല്ലാവർക്കുമുണ്ട്. എന്നാൽ “സമ്പൂർണ്ണമായി സമർപ്പിതരായിരിക്കുക” എന്നു പറയുമ്പോൾ, നാം ചെയ്യുന്ന എല്ലാറ്റിലും യേശുവും അവിടുത്തെ സന്ദേശവും നിറഞ്ഞുനിൽക്കണം എന്നാണ് അർഥം. ജോലി, വീട്ടുജോലികൾ തുടങ്ങിയ നമ്മുടെ സാധാരണ ദൈനംദിന പ്രവർത്തനങ്ങൾപോലും ദൈവമഹത്വത്തിനായും അവിടുത്തെ ദിവ്യഹിതത്തിന് അനുസൃതമായും ചെയ്യേണ്ടതാണ്.
യേശുവിന്റെ ആദ്യ അനുയായികൾ അവിടുത്തോടൊപ്പം പട്ടണങ്ങൾതോറും സഞ്ചരിക്കുകയും തങ്ങളുടെ ദൈനംദിന ജീവിതത്തിന്റെ ഗതി അടിമുടി മാറ്റുകയും ചെയ്തെങ്കിലും, അവർ അപ്പോഴും സാധാരണമായ പല പ്രവർത്തനങ്ങളിലും ഏർപ്പെട്ടിരുന്നിരിക്കണം. എന്നാൽ ആ സാധാരണ പ്രവർത്തനങ്ങൾ ആത്യന്തികമായി ചെയ്തത്, ദൈവവചനം ശ്രവിക്കുകയും അതിനോട് പ്രതികരിക്കുകയും ചെയ്യുക എന്ന തങ്ങളുടെയും മറ്റുള്ളവരുടെയും പരമമായ ദൗത്യം നിറവേറ്റാൻ സഹായിക്കുന്നതിനായിരുന്നു.
നിങ്ങളുടെ ജീവിതത്തിന്റെ ഓരോ ഭാഗവും നമ്മുടെ കർത്താവിനും അവിടുത്തെ ദൗത്യത്തിനുമായി എത്രത്തോളം സമർപ്പിച്ചിട്ടുണ്ടെന്ന് ഇന്ന് വിചിന്തനം ചെയ്യുക. അതിനായി നിങ്ങൾ പരസ്യമായി സുവിശേഷം പ്രഘോഷിക്കുന്ന ഒരാളാകണമെന്നോ ദിവസം മുഴുവൻ പള്ളിയിൽ ചെലവഴിക്കണമെന്നോ അതുപോലുള്ള കാര്യങ്ങൾ ചെയ്യണമെന്നോ നിർബന്ധമില്ല. ഓരോ ദിവസവും ദിവസം മുഴുവൻ നിങ്ങൾ ചെയ്യുന്ന എല്ലാറ്റിലേക്കും യേശുവിനെയും അവിടുത്തെ ദൗത്യത്തെയും ക്ഷണിക്കുക എന്നുമാത്രമാണ് അതിനർഥം. നമ്മുടെ കർത്താവിനെ എത്ര പൂർണ്ണമായി സേവിച്ചാലും അതു മതിയാകുകയില്ല. നിങ്ങളുടെ ദൈനംദിന പ്രവർത്തനങ്ങൾ പരിശോധിക്കുമ്പോൾ, നിങ്ങൾ ചെയ്യുന്ന എല്ലാറ്റിലേക്കും നമ്മുടെ കർത്താവിനെ കൊണ്ടുവരാനുള്ള വഴികൾ അന്വേഷിക്കുക. അങ്ങനെ ചെയ്യുന്നത്, ജീവിതം മുഴുവനും അവിടുത്തേക്ക് സമർപ്പിച്ച വിശ്വസ്ത ശിഷ്യരിൽ ഒരാളായി നിങ്ങളെ യഥാർഥത്തിൽ മാറ്റും.
എന്റെ ദിവ്യനാഥാ, ആത്മാക്കളെ രക്ഷിക്കാനും അങ്ങയുടെ മഹത്വപൂർണ്ണമായ രാജ്യം കെട്ടിപ്പടുക്കാനുമുള്ള ദൗത്യത്തിലാണ് അങ്ങ്. അങ്ങയുടെ വിശുദ്ധ വചനത്താൽ രൂപാന്തരപ്പെടാൻ മാത്രമല്ല, ആ വചനം മറ്റുള്ളവരിലേക്കു പകർന്നുകൊടുക്കാൻ സഹായിക്കാനും എന്നെ ക്ഷണിച്ചതിന് ഞാൻ അങ്ങേക്ക് നന്ദി പറയുന്നു. പ്രിയനാഥാ, എന്റെ ജീവിതം അങ്ങയുടേതാണ്. എന്റെ ദൈനംദിന ജീവിതത്തിന്റെ ഓരോ ഭാഗത്തേക്കും കടന്നുവന്ന് അങ്ങയുടെ മഹത്വത്തിനായി എന്നെ ഉപയോഗിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ഇന്നത്തെ വിശുദ്ധർ – പുരോഹിതനായ വിശുദ്ധ അന്ത്രയോസ് കിം തേഗോൻ, വിശുദ്ധ പൗലോസ് ചോങ് ഹസാങ്, അവരുടെ സഹരക്തസാക്ഷികൾ—ഓർമ്മ
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
തിരഞ്ഞെടുപ്പിനും രാജ്യത്തിനും വേണ്ടിയുള്ള പ്രാർഥനകൾ
സെപ്റ്റംബർ 3 – നവംബർ 4 വരെ ഒൻപത് ആഴ്ച നീളുന്ന നൊവേന
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
_LOC_matpc.23120.jpg){kind=link}