செவ்வாய், பிப்ரவரி 22, 2022
புனித பேதுருவின் தலைமைப்பீடத் திருவிழா
“எனவே நான் உனக்குச் சொல்கிறேன்: நீ பேதுரு; இந்தப் பாறையின்மேல் என் திருஅவையைக் கட்டுவேன். பாதாள உலகின் வாயில்கள் அதை மேற்கொள்ளா. விண்ணரசின் திறவுகோல்களை நான் உனக்குத் தருவேன். மண்ணுலகில் நீ கட்டுவது எதுவோ அது விண்ணுலகிலும் கட்டப்பட்டிருக்கும்; மண்ணுலகில் நீ அவிழ்ப்பது எதுவோ அது விண்ணுலகிலும் அவிழ்க்கப்பட்டிருக்கும்.” மத்தேயு 16:18-19
இந்த இறைவார்த்தைப் பகுதி நமக்குப் பெரும் ஆறுதலை அளிக்க வேண்டும். ஏன்? ஏனெனில், இதில் இயேசு தமது திருஅவைக்கு அடித்தளம் இடுகிறார். விண்ணரசின் திறவுகோல்களைப் பேதுருவிடம் அளிக்கிறார். அவ்வாறு செய்வதன் வழியாக, “தவறாமை” என்னும் கொடை என அறியப்படுவதை அவர் நிறுவுகிறார்.
இதைச் சிந்தித்துப் பாருங்கள். “விண்ணரசின் திறவுகோல்கள்” ஒருவருக்கு அளிக்கப்படுவது என்பதன் பொருள் என்ன? இது மிகவும் முக்கியத்துவம் வாய்ந்த கூற்று. இதைத் தெளிவாகவும் உறுதியாகவும் கூறியதன் வழியாக, இயேசு வியப்புக்குரிய ஓர் ஆன்மிக ஆற்றலைப் பேதுருவிடம் ஒப்படைத்தார். அப்போது இதன் துல்லியமான பொருள் என்ன என்பதைப் பேதுரு புரிந்துகொள்ளாமல் இருந்திருக்கலாம். ஆனால், இத்தகைய அதிகாரம் அவரிடம் ஒப்படைக்கப்பட்டபோது, அது அவரில் ஒரு மாற்றத்தை ஏற்படுத்தியிருக்கும்.
“தவறாமை” என்பதன் பொருள், நம்பிக்கை மற்றும் ஒழுக்கம் சார்ந்தவற்றில் உண்மையானதை மட்டுமே பேதுரு போதிப்பார் என்ற உறுதி அவருக்கு அளிக்கப்பட்டது என்பதாகும். நம்பிக்கையும் ஒழுக்கமும் விண்ணரசில் என்றென்றும் நிலைத்திருப்பவை. எனவே, இவை சார்ந்த அதிகாரமே பேதுருவிடம் ஒப்படைக்கப்படுகிறது.
மேலும், திருத்தூதர்களுக்குப் பின்வந்த வழித்தோன்றல்கள் இருந்தனர் என்பதை நாம் அறிவோம். பேதுரு உரோமைக்குச் சென்று உரோமையின் ஆயரானார். அவருக்குப் பின் லீனுஸ், பின்னர் கிளேத்துஸ், அதன் பின்னர் கிளமெந்து என இன்றைய உரோமை ஆயர் வரை இந்தத் தொடர்ச்சி நீடிக்கிறது. இதைக் கவனத்தில் கொள்வது முக்கியம்; ஏனெனில், இயேசு பேதுருவுக்கு அளித்த இந்த ஆன்மிக அதிகாரம் அவரது இறப்போடு முடிந்துவிடவில்லை. மாறாக, அவருடைய வழித்தோன்றல்களிடம் அது தொடர்ந்தது; உலகின் முடிவுவரை தொடர்ந்து நீடிக்கும்.
இன்று, புனித பேதுருவின் தலைமைப்பீடம் என்னும் இந்தச் சிறப்புமிக்க திருவிழாவைக் கொண்டாடும்போது, நாம் திருத்தந்தைக்கு மதிப்பளிப்பதோடு மட்டுமல்லாமல், அவரிடம் ஒப்படைக்கப்பட்டுள்ள ஆன்மிக அதிகாரத்தைக் குறித்தும் மகிழ்கிறோம். விண்ணரசின் திறவுகோல்கள் வழங்கும் உறுதியான போதிக்கும் அதிகாரத்தின் வழியாக, இயேசு இவ்வாறு உயிரோடு செயல்படுகிறார் என்பதை அறிந்து, நரகத்தின் வாயில்கள் ஒருபோதும் திருஅவையை மேற்கொள்ளாது என்ற நம்பிக்கையில் நாம் ஆறுதலும் அமைதியும் பெற வேண்டும். திருத்தந்தையர்கள் பாவிகளே; ஆயினும், அவர்கள் தங்களது புனிதப் பணியை நிறைவேற்றும் ஒவ்வொரு முறையும், கிறிஸ்துவின் கண்கூடான, தவறாத கருவிகளாகவும் இருக்கிறார்கள்.
திருஅவையின்மீது நீங்கள் கொண்டுள்ள நம்பிக்கையைப் பற்றி இன்று சிந்தியுங்கள். நாம் தனிப்பட்ட மனிதர்கள்மீது நம்பிக்கை வைப்பதில்லை; கிறிஸ்துவிலும், அவரது திருஅவையிலும், திருஅவையிடம் ஒப்படைக்கப்பட்டுள்ள ஆன்மிக அதிகாரத்திலுமே நம்பிக்கை வைக்கிறோம். இது குறித்த உங்கள் நம்பிக்கையைச் சிந்தித்துப் பாருங்கள். அது ஏதேனும் விதத்தில் குறைவுபட்டிருந்தால், புனித பேதுருவின் தலைமைப்பீடம் என்னும் இந்தச் சிறப்புமிக்க திருவிழாவைப் போற்றும் வகையில், அந்த நம்பிக்கையைப் புதுப்பித்துக்கொள்ளுங்கள்.
ஆண்டவராகிய இயேசுவே, உமது வல்லமையையும் அதிகாரத்தையும் புனித பேதுருவிடமும் அவருடைய வழித்தோன்றல்கள் அனைவரிடமும் ஒப்படைத்தீர். எங்கள் திருத்தந்தை என்னும் கொடைக்காக உமக்கு நன்றி கூறுகிறேன். அவருக்காக நான் வேண்டுகிறேன்; நீர் அவரை வழிநடத்திப் பாதுகாக்கும்படி அவரை உம்மிடம் ஒப்புக்கொடுக்கிறேன். திருத்தந்தை என்னும் கொடையிலும், அவர் வழியாக எங்களை எப்போதும் வழிநடத்துவதாக நீர் அளித்த வாக்குறுதியிலும் எனக்குள்ள நம்பிக்கையைப் புதுப்பித்துக்கொள்கிறேன். எங்கள் மீட்பின் இலக்கான மாட்சிமைமிக்க விண்ணரசை நோக்கி நாங்கள் அனைவரும் முன்னேறிச் செல்லும்போது, உமது திருஅவையின்மீது எனக்குள்ள நம்பிக்கை எனக்கு ஆறுதலையும் எதிர்நோக்கையும் அளிப்பதாக. இயேசுவே, உம்மீது நம்பிக்கை வைக்கிறேன்.
பொதுக்காலத்திற்கான இறைவார்த்தைத் தியானங்கள்
அனைத்துப் புனிதர்கள்/திருவிழாக்கள்
மேலும் வாசிக்க – புனித பேதுருவின் தலைமைப்பீடம்
திருப்பலி வாசிப்புகளுக்கான தெரிவுகள்
.jpg){kind=link}