கடவுளின் குரலுக்குப் பதிலளித்தல்

ஜூலை 8, 2024
பொதுக்காலத்தின் பதினான்காம் வாரம் – திங்கள்
இன்றைய வாசகங்கள்

காணொளி

பன்னிரண்டு ஆண்டுகளாக இரத்தப்போக்கினால் துன்புற்ற ஒரு பெண் இயேசுவுக்குப் பின்னால் வந்து, அவரது மேலுடையின் குஞ்சத்தைத் தொட்டார். “அவரது மேலுடையைத் தொட்டாலே நான் நலமடைவேன்” என்று அவர் தமக்குள் சொல்லிக்கொண்டார். இயேசு திரும்பி அவரைப் பார்த்து, “மகளே, துணிவுடன் இரு!  உனது நம்பிக்கை உன்னைக் காப்பாற்றியது” என்றார். அந்த நேரத்திலிருந்தே அப்பெண் நலமடைந்தார். மத்தேயு 9:20–21

இந்தப் பெண்ணுக்கு எத்துணை ஆழமான விசுவாசம் இருந்தது! அவர் பல ஆண்டுகளாக இரத்தப்போக்கினால் துன்புற்றார்; தொடர்ந்து துன்புற்றுக்கொண்டிருந்தார். இயேசுவின் மேலுடையைத் தொட்டால் தாம் குணமடைவோம் என்பது அவருக்கு எப்படித் தெரிந்தது? இதற்கு ஒரே பதில் விசுவாசம்தான். விசுவாசம் என்பது வெறுமனே விரும்புவதோ எதிர்பார்ப்பதோ அல்ல. விசுவாசம் என்பது கடவுளிடமிருந்து வரும் சிறப்பு அருளாலும் வெளிப்பாட்டாலும் வழங்கப்படும் உறுதியான அறிவு; இதன் வழியாக ஒருவர் நம்புவதற்குச் சுதந்திரமாக இசைவு தெரிவிக்கிறார். கடவுள் அவரது உள்ளத்தில் பேசினார்; அவர் செவிகொடுத்தார், அதற்கேற்பச் செயல்பட்டார், குணமடைந்தார்.

இந்த நற்செய்தி நிகழ்வில் நமக்கு மிகுந்த ஊக்கமளிப்பது, இப்பெண் இயேசுவை அணுகியபோது வெளிப்படுத்திய தாழ்ச்சியாகும். இயேசுவைத் தொந்தரவு செய்யவோ, அவரிடம் பேசவோ, தமது பிரச்சினையால் அவருக்குச் சிரமம் கொடுக்கவோ வேண்டுமென அவர் நினைக்கவில்லை. மாறாக, தாழ்ச்சியுடன், தமக்குக் கொடுக்கப்பட்ட நம்பிக்கை என்னும் கொடையின் வழியாக, உள்ளத்தில் அமைதியாகத் தமது தேவையை இயேசுவிடம் எடுத்துரைத்தார். கடவுளின் அருள் அவருக்கு வழங்கப்பட்டது; ஏனெனில் கடவுள் உள்ளத்தைப் பார்க்கிறார், இத்தகைய தாழ்ச்சியும் நேர்மையும் நிறைந்த நம்பிக்கைக்குப் பதிலளிக்கிறார்.

எல்லாருக்கும் நம் ஆண்டவர்மீது இவ்வளவு ஆழமான நம்பிக்கை இருந்தால் எப்படி இருக்கும் என்று எண்ணிப் பாருங்கள். நமது தேவைகள் ஒவ்வொன்றையும் கடவுள் கவனித்துக்கொள்வார் என்பதை நாம் அனைவரும் ஆழ்ந்த உறுதியுடன் அறிந்திருந்தால் எப்படி இருக்கும் என்று எண்ணிப் பாருங்கள். இதே ஆழ்ந்த உறுதியுடன் ஒவ்வொரு நாளும் நமது ஒவ்வொரு தேவையோடும் நம் ஆண்டவரை நாடினால் எப்படி இருக்கும் என்றும் எண்ணிப் பாருங்கள். நம்மால் அவ்வாறு செய்ய முடிந்தால், நம் ஆண்டவர் எல்லா வகையிலும் நம்மைத் தொடர்ந்து கவனித்துக்கொள்ள முடியும்.

இந்தப் பெண் குணமடைந்ததில் ஒரு முக்கிய அம்சம் என்னவென்றால், தந்தையாகிய கடவுளே அவரிடம் பேசி, தம் மகன் இயேசுவின் மேலுடையைத் தொடுமாறு அவரை அழைத்தார் என்பதாகும். இயேசு தம் தந்தையின் திருவுளத்தோடு முழுமையாக ஒன்றித்திருந்ததால், அப்பெண் பெற்ற குணத்தை உணர்ந்தவர் அவரே. எனவே, இயேசுவின் மேலுடையைத் தொட்டது, இப்பெண் விரும்பியதெல்லாம் அவருக்குக் கிடைக்கச் செய்யும் ஒரு மந்திரச் செயல் அல்ல. மாறாக, தந்தை அவரது உள்ளத்தில் விடுத்த அழைப்புக்கு அவர் அளித்த பதிலாக அது இருந்தது.

நமது வாழ்விலும் அவ்வாறே செய்ய நாம் முயல வேண்டும். பல வேளைகளில் நமது விருப்பங்களைக் கடவுளிடம் எடுத்துரைத்து, அவர் என்ன செய்ய வேண்டும் என்று நாம் விரும்புகிறோமோ அதை அவரிடம் சொல்கிறோம். கடவுள் இத்தகைய வேண்டுகோள்களுக்குப் பதிலளிப்பதில்லை. மாறாக, அவரது திருவுளத்தை நாம் நாட வேண்டும்…அவரது திருவுளத்தை மட்டுமே நாட வேண்டும். தாம் நலமடைவோம் என்பது இப்பெண்ணுக்குத் தெரிந்திருந்தது; ஏனெனில் தந்தையாகிய கடவுள் அவரது மனத்திலும் உள்ளத்திலும் பேசி, தம் மகன் இயேசுவின் மேலுடையைத் தொடுமாறு அவரைத் தூண்டினார். அவர் பதிலளித்தார்; குணமடைந்தார். கடவுள் முதலில் பேச வேண்டும்; நாம் செவிகொடுத்துப் பதிலளிக்க வேண்டும்; அப்போது அவரது திருவுளம் நிறைவேறும்.

உங்கள் உள்ளத்தின் ஆழத்தில் கடவுள் உங்களிடம் பேசும்போது ஒலிக்கும் அவரது மென்மையான குரலை இன்று சிந்தித்துப் பாருங்கள். அவருக்குச் செவிகொடுக்கிறீர்களா? எதைச் செய்ய அவர் உங்களை அழைக்கிறார்? எத்தகைய குணத்தை அவர் உங்களுக்கு வழங்க விரும்புகிறார்? கடவுளின் குரலைச் சிந்தித்துப் பார்க்கும்போது, அவருக்கு மட்டுமே பதிலளிக்க முயலுங்கள். கடவுள் என்ன செய்ய வேண்டும் என்பது பற்றிய உங்கள் சொந்த விருப்பங்களையும் எண்ணங்களையும் ஒதுக்கிவிட்டு, அவர் உங்களிடம் சொல்வதை மட்டுமே நாடுங்கள். அவரிடம் “ஆம்” என்று சொல்லுங்கள்; உறுதியோடும் திடநம்பிக்கையோடும் அவ்வாறு செய்யுங்கள். அவர் உங்களிடம் எதைச் சொன்னாலும், அவர் சொல்வதில் நீங்கள் நம்பிக்கை கொண்டிருந்தால், அதை அவர் செய்வார் என்று நம்புங்கள்.

என் மென்மையான ஆண்டவரே, எனக்குத் தேவையான குணத்தைப் பெற என்னை அழைத்து, இரவும் பகலும் நீர் என்னிடம் பேசுகிறீர். உமது குரலுக்குச் செவிகொடுக்கவும், நம்பிக்கையுடன் உமக்குப் பதிலளிக்கவும் எனக்கு உதவியருளும். உம்மீது நான் கொண்டுள்ள நம்பிக்கையும் உறுதியும் வலுப்பெற்று, என் வாழ்வில் உமது மாட்சிமிகு செயலுக்கான ஊற்றாக விளங்குவனவாக. இயேசுவே, உம்மில் நம்பிக்கை வைக்கிறேன்.

மேலும் நற்செய்திச் சிந்தனைகள்

இறை இரக்கச் சிந்தனைகள்

பொதுக்காலத்திற்கான இறைவார்த்தைத் தியானங்கள்

இன்றைய புனிதர்கள்/திருவிழாக்கள்

திருப்பலி வாசிப்புகளுக்கான தெரிவுகள்

மேலே இடம்பெற்றுள்ள படம்: தேநீர் மேசையைச் சுற்றி — வரைந்தவர்: தாமஸ் டி விட், மூலம்: Wikimedia Commons