తెలుగు

నిజమైన స్నేహితుడు

ఆదివారం, సెప్టెంబర్ 30, 2018

సామాన్య కాలంలో ఇరవై ఆరవ ఆదివారం, సంవత్సరం B

నేటి పఠనాలు

పునీత జెరోమ్, యాజకుడు మరియు సభపండితుడు – స్మరణ

ఆంగ్లంలో వినండి

“నన్ను విశ్వసించే ఈ చిన్నవారిలో ఒకరిని పాపం చేయడానికి ప్రేరేపించే వ్యక్తి మెడకు పెద్ద తిరుగలిరాయిని కట్టి, అతణ్ణి సముద్రంలో పడవేయడమే అతనికి మేలు.   నీ చెయ్యి నిన్ను పాపం చేయడానికి ప్రేరేపిస్తే, దాన్ని నరికివేయి. రెండు చేతులతో గెహెన్నాలోకి, ఆరని అగ్నిలోకి వెళ్లడం కంటే అంగవైకల్యంతో జీవంలోకి ప్రవేశించడం నీకు మేలు.”  మార్కు 9:42-43

నిజంగానా?  యేసు నిజంగా ఈ మాటలను అక్షరార్థంలోనే ఉద్దేశిస్తున్నారా?  మన చెయ్యి మనల్ని పాపం చేయడానికి ప్రేరేపిస్తే, దాన్ని నిజంగానే నరికివేయాలా?  మన కాలు మనల్ని పాపం చేయడానికి ప్రేరేపిస్తే దాన్నీ నరికివేయాలని, మన కన్ను పాపానికి ప్రేరేపిస్తే దాన్ని పెరికివేయాలని కూడా ఆయన ఇంకా చెబుతున్నారు. 

తొలి కాలపు సభా పితరులలో కొందరు ఈ లేఖన వాక్యం మన ఆత్మీయ స్నేహితులను సూచిస్తుందని భావిస్తారు. ఇతరులకు పాపకారణంగా నిలవకూడదని, వారిని పాపంలోకి నడిపించకూడదని ఈ భాగం సందర్భం తెలియజేస్తుంది. నిజానికి, మరొకరు పాపం చేయడానికి కారణమవడం కంటే, మన మెడకు “ఒక పెద్ద తిరుగలిరాయి” కట్టి మనల్ని సముద్రంలో పడవేయడమే మేలు.

స్నేహితులు, ముఖ్యంగా సన్నిహిత స్నేహితులు, ఎక్కువ సందర్భాల్లో ఒక ఆశీర్వాదం. అయితే వారు పాపానికి కారణం కూడా కావచ్చు. ఒక మంచి స్నేహితుడు మరొక స్నేహితుని పాపం చేయడానికి ఉద్దేశపూర్వకంగా ఒప్పించేందుకు ప్రయత్నిస్తే, అది చాలా తీవ్రమైన విషయం. యేసు ప్రస్తావిస్తున్న అంశంలోని సారాంశం ఇదే. మనం దేవుని నుండి దూరమయ్యేలా ఉద్దేశపూర్వకంగా, దురుద్దేశంతో మనల్ని ప్రలోభపెట్టే సన్నిహిత స్నేహితులు ఉంటే, అలాంటి “స్నేహితులతో” బంధాన్ని విడిచిపెట్టి, సంబంధాన్ని తెంచుకోవడమే మేలని ఆయన చెబుతున్నారు. మనల్ని పాపంలోకి లాగడానికి తీవ్రంగా ప్రయత్నించే ఆ స్నేహితులకు చేయి, కాలు లేదా కన్ను ప్రతీకగా ఉన్నాయి. వారితోపాటు నరకంలోకి లాగబడటం కంటే ఆ స్నేహాలు ముగిసిపోవడమే మేలు. ఇతరులను పాపంలోకి లాగే ఆ “స్నేహితులం” మనమే అయితే, మనం ప్రలోభపెడుతున్న వారితో మన స్నేహాన్ని తెంచుకోవడమే మనకు మేలు.

ఈ భాగం వెల్లడించే ఒక విషయం స్నేహంలోని బలమైన సహజ బంధం. స్నేహం మంచిదే. మీకు సన్నిహిత స్నేహం ఉన్నప్పుడు, ఆ వ్యక్తికి మీ పట్ల గాఢమైన నిబద్ధత ఉందనీ, ఎల్లప్పుడూ మీకు తోడుగా ఉంటారనీ తెలుసుకోవడం మీకు ఎంతో ఓదార్పునిస్తుంది. అయితే ప్రతి స్నేహాన్నీ విశ్వాసం, సత్యం వెలుగులో నిరంతరం పరిశీలించాలి. కొన్నిసార్లు స్నేహాలు దేవునిపై మన విశ్వాసానికి అడ్డుగా నిలిచి, మనపై బలమైన ప్రతికూల ప్రభావం చూపవచ్చు. అయితే, దీనికి విరుద్ధమైనది కూడా నిజమే.

ఈ రోజు మీ స్నేహాల గురించి ధ్యానించండి. మీ జీవితంలో ఎవరికైనా మీరు ఎంతో సన్నిహితంగా, ఆత్మీయంగా ఉంటే, మీరు ఆ వ్యక్తిపై ఎలాంటి ప్రభావం చూపుతున్నారో లేదా ఆ వ్యక్తి మీపై ఎలాంటి ప్రభావం చూపుతున్నారో ఆలోచించండి. ఈ సహజ బంధంలో క్రీస్తే కేంద్రంగా ఉండేలా, విశ్వాసానికే ఎల్లప్పుడూ ప్రాధాన్యం ఉండేలా చూసుకోండి.

ప్రభువా, నా జీవితంలోని స్నేహబంధాలన్నిటికీ నీకు కృతజ్ఞతలు తెలుపుతున్నాను.  నా పట్ల శ్రద్ధ చూపే వ్యక్తులను నాకు ఇచ్చినందుకు నీకు కృతజ్ఞతలు తెలుపుతున్నాను.  నేను ఎల్లప్పుడూ మంచి స్నేహాన్ని అందిస్తూ, నా స్నేహబంధాలను ఎల్లప్పుడూ విశ్వాసపు వెలుగులో పరిశీలిస్తూ ఉండేలా నాకు సహాయం చేయి.  యేసూ, నేను నీపై నమ్మకం ఉంచుతున్నాను.

మరిన్ని>>>

నేటి పునీతుడు – పునీత జెరోమ్