తెలుగు

అమూల్యమైన ముత్యం

బుధవారం, జూలై 31, 2019

సామాన్య కాలపు పదిహేడవ వారంలోని బుధవారం

నేటి పఠనాలు

లయోలాకు చెందిన పునీత ఇగ్నేషియస్, యాజకుడు – స్మరణ

ఆంగ్లంలో వినండి

“మరల, పరలోక రాజ్యం మేలైన ముత్యాలను వెదికే ఒక వ్యాపారిని పోలి ఉంది. అతనికి అమూల్యమైన ఒక ముత్యం దొరికినప్పుడు, వెళ్లి తనకున్నదంతా అమ్మి దానిని కొంటాడు.” మత్తయి 13:45-46

ఈ వాక్యభాగం నుండి మనం ఎన్నో అందమైన అంతర్దృష్టులను పొందవచ్చు. నిశ్చయంగా, పరలోక రాజ్యాన్ని ఆ “అమూల్యమైన ముత్యంతో” పోల్చి చూడవచ్చు! అయితే, ఈ వాక్యభాగం వాస్తవంగా పరలోక రాజ్యాన్ని “మేలైన ముత్యాలను వెదికే వ్యాపారితో” పోలుస్తుంది. ఇది మనకు ఒక ముఖ్యమైన విషయాన్ని వెల్లడిస్తుంది.

ఇది మనకు అందించే ఒక అవగాహన ఏమిటంటే, మనం శ్రద్ధతో చేసే అన్వేషణలో పరలోక రాజ్యం లభిస్తుంది.  మనం పరలోక మర్మాన్ని అన్వేషిస్తాము; ఈ అన్వేషణే, దానికదే, దేవుని రాజ్యాన్ని మన ముందుంచుతుంది. 

“దేవుని కోసం అన్వేషణ” గురించి మాట్లాడటమంటే, దేవుడు ఒక గాఢమైన విశ్వాస రహస్యమని చెప్పడమే. దివ్యబలిపూజలో మనం దీనిని విశ్వాస రహస్యం అని అంటాము. దేవుడు దివ్యమైన “రహస్యం” కనుక, మనం ఆయనను ఎన్నటికీ పూర్తిగా “కనుగొనలేమని” అర్థం చేసుకోవడం ముఖ్యం. నిశ్చయంగా మనం ఆయనను కనుగొనవచ్చు, ఆయనను అర్థం చేసుకోవచ్చు, ఆయనను తెలుసుకోవచ్చు, మన జీవితాలను ఆయనకు అర్పించవచ్చు. అయితే, మనం అలా పూర్తిగా ఎన్నటికీ చేయలేము. నిజమేమిటంటే, మనం దేవుని ఎంత ఎక్కువగా తెలుసుకుంటే, అంత ఎక్కువగా ఆయనను వెదుకుతాము; ఆయనను ఎంత ఎక్కువగా వెదికితే, ఆయనను మనం పూర్తిగా తెలుసుకోలేదని అంత ఎక్కువగా గ్రహిస్తాము. అయితే, ఈ వెల్లడి మనలను దేవుని జీవంలోనికి మరింత లోతుగా నడిపిస్తూ, పరలోక రాజ్యాన్ని పొందేలా చేస్తుంది.

దేవుని సౌందర్యాన్ని, విలువను, రహస్యాన్ని, శక్తిని, మహిమను, అలాగే ఆయన రాజ్యపు సౌందర్యాన్ని, విలువను, రహస్యాన్ని, శక్తిని, మహిమను కనుగొనడమే మన జీవిత ధ్యేయంగా ఉండాలి. ఈ జీవితాన్ని మనం వెదుకుతూ, కనుగొంటూ, ఇంకా ఎక్కువగా వెదుకుతూ గడపాలి. పరలోకంలో మనం చేసేది ఇదే. పరలోకంలో దేవుని రాజ్యమూ, ఆయన అంతరంగ జీవమూ సంపూర్ణంగా వెల్లడయ్యే క్షణం ఉంటుంది. అయితే, ఈ వెల్లడి ద్వారా మనం నిత్యమూ దేవునిలోనికి, ఆయన మహిమాన్విత సన్నిధిలోనికి మరింత లోతుగా ప్రవేశిస్తూ ఉంటామని కనుగొంటాము.

మీ జీవితంలో మీరు సాగిస్తున్న అన్వేషణ గురించి ఈ రోజు ధ్యానించండి. అది దేవుని కోసం శ్రద్ధతో సాగే అన్వేషణేనా? లేక ఈ ప్రయత్నంలో మీరు అలసత్వం చూపుతున్నారా? దేవుని మనస్ఫూర్తిగా వెదకడానికి మిమ్మల్ని మీరు మళ్లీ అంకితం చేసుకోండి. అప్పుడు ఈ అన్వేషణ వాస్తవంగా పరలోక రాజ్య మహిమలను కనుగొనడమేనని మీరు గ్రహిస్తారు.

ప్రభువా, నేను నిన్ను ప్రేమిస్తున్నాను, నిన్ను మరింతగా ప్రేమించాలని కోరుకుంటున్నాను.  నేను నిన్ను వెదుకుతున్నప్పుడు నన్ను ఉత్సాహంతోను నిరీక్షణతోను నింపుము.  నిన్ను హృదయపూర్వకంగా వెదకడం ద్వారా నీ మహిమాన్వితమైన అంతరంగ జీవితపు మర్మం నాకు వెల్లడగునుగాక.  నేను నిన్ను కనుగొంటున్న కొద్దీ, నిన్ను మరింతగా వెదకడానికి నాకు సహాయపడుము.  యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతుడు – లయోలాకు చెందిన పునీత ఇగ్నేషియస్


దైవకారుణ్యంపై దైనందిన ధ్యానాలు:
పునీత ఫౌస్టీనాతో 365 రోజులు