ఫిబ్రవరి 20, 2021
విభూతి బుధవారం తరువాతి శనివారం
నేటి పఠనాలు

ఆంగ్లంలో వినండి
వీడియో రూపం
సుంకం వసూలు చేసే స్థలంలో కూర్చున్న లేవి అనే సుంకరిని యేసు చూశారు. ఆయన అతనితో, “నన్ను అనుసరించు” అన్నారు. అతడు అన్నిటినీ విడిచిపెట్టి, లేచి ఆయనను అనుసరించాడు. లూకా 5:27–28
లేవి జీవితం సుఖంగా సాగుతోంది. సుంకరిగా అతనికి మంచి ఆదాయమూ స్థిరమైన ఉపాధీ ఉన్నాయి. కానీ ఒక్క క్షణంలోనే, యేసును అనుసరించడానికి అతడు అవన్నీ వదులుకున్నాడు; వెంటనే అతని జీవితం మేలైన మార్పు పొందింది.
లేవికి వచ్చిన పిలుపు గురించిన ఈ చిన్న కథను మనం గమనించాలి. క్రీస్తును అనుసరించాలని మీరు ఇప్పటికే నిర్ణయించుకుని ఉండవచ్చు; అయినప్పటికీ, ఆ నిర్ణయం ప్రతిరోజూ మరింత లోతుగా వేళ్లూనుకోవాలి. అలా చేయడానికి లేవి సాక్ష్యం మీకు ప్రేరణనివ్వాలి.
దేవుడు మనలను తనతో మరింత లోతైన సాన్నిహిత్యానికి పిలుస్తున్నారని, మనం ఆయనను మరింత సంపూర్ణంగా అనుసరించాలని కోరుతున్నారని గ్రహించినప్పుడు, తరచుగా మనం ఆగిపోయి సంకోచించవచ్చు. విశ్వాసంతో ముందడుగు వేయడానికి ముందు, అలాంటి నిర్ణయాన్ని క్షుణ్ణంగా ఆలోచించి, దానిలోని “లాభనష్టాలను” బేరీజు వేసుకోవాలని అనుకోవడం మనుషులకు సహజం. కానీ అలా చేయకండి. మిగిలినవన్నీ విడిచిపెట్టి క్రీస్తును అనుసరించాలని లేవి వెంటనే తీసుకున్న నిర్ణయం మనమూ అలాగే చేయాలనే ఆహ్వానంగా మనకు సాక్ష్యమిస్తోంది.
లేవి తీసుకున్న సమూలమైన నిర్ణయాన్ని అనుకరించమని యేసు నేడు మిమ్మల్ని ఎలా ఆహ్వానిస్తున్నారు? ప్రేమతో, సంపూర్ణ సమర్పణతో తనను మరింత పూర్తిగా సేవించడానికి, దేనిని విడిచిపెట్టమని ఆయన మిమ్మల్ని పిలుస్తున్నారు? ఆ ప్రశ్నకు సమాధానం మీకు తెలియకపోయినా, మన ప్రభువుతో “అవును” అని చెప్పండి. లేవిని అనుకరించాలని, ఆయన పవిత్ర చిత్తాన్ని సంపూర్ణంగా, సమూలంగా అనుసరించడానికి మిమ్మల్ని మీరు హృదయపూర్వకంగా అంకితం చేసుకోవాలని కోరుకుంటున్నట్లు ఆయనకు చెప్పండి.
లేవి యేసును అనుసరించాలని నిర్ణయించుకున్న వెంటనే, తన ఇంట్లో యేసుకూ ఇతర సుంకరులకూ విందు ఏర్పాటు చేశాడనే విషయమూ గమనించదగినది. తన నిర్ణయం గురించి ఇతరులకు తెలియజేయడానికి లేవి భయపడలేదు; తన స్నేహితులకు కూడా అలాంటి నిర్ణయం తీసుకునే అవకాశాన్ని ఇవ్వాలని అతడు కోరుకున్నాడు.
లేవి వ్యక్తిత్వాన్నీ అతనికి వచ్చిన పిలుపునూ గురించి నేడు ధ్యానించండి. ఈ తపస్సు కాలాన్ని ప్రారంభిస్తున్నప్పుడు, లేవికి వచ్చిన పిలుపునూ అతని ప్రతిస్పందననూ, యేసు మిమ్మల్ని పిలుస్తున్న స్వరాన్ని వినే అవకాశంగా స్వీకరించండి. అక్షరాలా “అన్నిటినీ విడిచిపెట్టమని” మీకు పిలుపు రాకపోవచ్చు; అయినప్పటికీ, అలా చేయడానికి మీ సంసిద్ధతను వ్యక్తం చేయండి. మన ప్రభువును అనుసరించాలనే మీ నిర్ణయానికి ఎలాంటి షరతులూ పెట్టకండి; అలా చేసినందుకు మీరు నిత్యమూ కృతజ్ఞతతో ఉంటారు.
నా అమూల్య ప్రభువా, నీ బిడ్డలందరినీ ఏదీ దాచుకోకుండా నిన్ను అనుసరించమని పిలుస్తున్నావు. ఎంతో ఎక్కువైన మేలును పొందడానికి, ఈ జీవితం అందించే వాటన్నిటినీ విడిచిపెట్టేందుకు సిద్ధంగా, సుముఖంగా ఉండమని మమ్మల్ని పిలుస్తున్నావు. నేడు, రేపు, అన్ని రోజులూ నీకు “అవును” అని చెప్పగలిగేంతగా నిన్ను నమ్మడానికి నాకు అవసరమైన కృపను ప్రసాదించు. ప్రియ ప్రభువా, నా జీవితం నీదే. నీ చిత్తప్రకారం నన్ను నడిపించు. యేసూ, నేను నీపై నమ్మకం ఉంచుతున్నాను.
సిలువ పాదాల చెంత 40 రోజులు – మూడవ ధ్యానం – దేవమాత ఆలోచనలు
తపస్సు కాలానికి పవిత్ర గ్రంథ ధ్యానాలు
పైన ప్రదర్శించిన చిత్రం: జొవాన్నీ పావోలో పనీనీ చిత్రించిన పరిశుద్ధ మత్తయికి పిలుపు





