తెలుగు

ప్రజ్వలించే కారుణ్యాగ్ని

అక్టోబరు 26, 2023
సామాన్య కాలం ఇరవై తొమ్మిదవ వారంలోని గురువారం
నేటి పఠనాలు

వీడియో

ఆంగ్లంలో వినండి

యేసు తన శిష్యులతో ఇలా అన్నారు: “నేను భూమిపై అగ్నిని రగిలించడానికి వచ్చాను. అది ఇప్పటికే మండుతూ ఉండాలని నేను ఎంతగా కోరుకుంటున్నానో! నేను పొందవలసిన జ్ఞానస్నానం ఒకటి ఉంది. అది పూర్తయ్యే వరకు నా వేదన ఎంత తీవ్రమైనదో!” లూకా 12:49–50

మన ప్రభువు చేసిన ఈ బోధల నుండి మనం నేర్చుకోవలసినది ఎంతో ఉంది. “నేను భూమిపై అగ్ని రగిలించడానికి వచ్చాను…” అని యేసు చెప్పడమే కాకుండా, ఈ అగ్ని “ప్రజ్వలిస్తూ” ఉండాలని తాను కోరుకుంటున్నట్లు కూడా చెప్పారు!

అగ్ని శక్తిమంతమైనది. ఉదాహరణకు, ప్రజ్వలించే అగ్ని బంగారం అనే విలువైన లోహాన్ని శుద్ధి చేయగలదు. దానిని కరిగేంతగా వేడి చేసినప్పుడు, మలినాలు పైకి తేలుతాయి; అప్పుడు వాటిని సులభంగా తొలగించవచ్చు. అగ్ని పూర్తిగా దహించివేయగలదు కూడా. ప్రజ్వలించే అగ్నిలో ఏదైనా పూర్తిగా కాలిపోయినప్పుడు, మిగిలేది బూడిద మాత్రమే. దేవుడు మన ఆత్మలలో చేయాలనుకునే శుద్ధీకరణకు ప్రతిరూపంగా అగ్నిని భావించి, ఎందరో గొప్ప పునీతులు ధ్యానించారు. ఉదాహరణకు, సిలువ పునీత యోహాను ఈ ప్రతిరూపాన్ని గురించి లోతుగా ధ్యానించారు. దేవునితో ఐక్యతలోకి ప్రవేశించడం ఒక దుంగ కాలడం వంటిదని ఆయన వివరించారు. మొదట్లో, దుంగ కాలడం ప్రారంభమైనప్పుడు చిటపటమని శబ్దాలు చేస్తుంది. ఎందుకంటే దుంగలోని తేమ, రసం వంటి మలినాలు కలప కాలినట్లుగా కాలవు. అయితే, సిలువ పునీత యోహాను వివరించినట్లుగా, దుంగ కాలుతూనే ఉన్నప్పుడు, చివరికి అది అగ్నితో ఏకమవుతుంది. మొదట్లో దుంగలో కొంత భాగం మాత్రమే కాలుతున్నప్పుడు, దుంగను అగ్ని నుండి వేరుగా గుర్తించవచ్చు. కానీ దుంగ మొత్తాన్ని మంటలు చుట్టుముట్టి, మలినాలన్నీ కాలిపోయిన తరువాత, ఆ చెక్కముక్క అగ్నితో ఏకమైపోతుంది. అది జ్వలిస్తూ వెలుగును, వేడిని వెదజల్లుతుంది.

“భూమిపై అగ్ని రగిలించాలనే” తన కోరిక గురించి యేసు చెప్పిన ఈ మాటలను మనం ధ్యానించేటప్పుడు, మొదట దీనిని మన ఆత్మలను శుద్ధి చేయాలనే ఆయన కోరికగా చూడాలి. మనం దేవునితో ఏకమై, ఆయన తేజస్సును, మహిమను వెదజల్లాలంటే, మన ఆత్మలలో తొలగించవలసిన మలినాలు ఎన్నో ఉన్నాయి.  ఈ శుద్ధీకరణలో, మన పాపాలు మనకు కనిపించి తొలగించబడేలా దేవుడు వాటిని బయటకు తీసుకురావడానికి మనం అనుమతించే ప్రక్రియ ఇమిడి ఉంది. అయితే, శుద్ధి చేసే దేవుని ప్రేమాగ్ని ప్రజ్వలిస్తూ మనలను పూర్తిగా దహించివేయడానికి మనం అనుమతిస్తేనే ఇది సాధ్యమవుతుంది.

జీవితంలో తరచుగా, మన విశ్వాస ప్రయాణంలో సాధారణ స్థాయిలో ఉండిపోవడంతోనే మనం సంతృప్తి చెందుతాము. మనం ప్రార్థిస్తాము, ఆదివారం దివ్యబలిపూజకు వెళ్తాము, మంచిగా ఉండటానికి ప్రయత్నిస్తాము. కానీ మన ప్రభువు మన కోసం కోరుకునే జీవితం ఇది కాదు. తన ప్రజ్వలించే ప్రేమాగ్నిలో పూర్తిగా దహించుకుపోయే జీవితాన్ని ఆయన కోరుకుంటున్నారు. మన పాపాల నుండి మనం ఎంతగా శుద్ధి కావాలని ఆయన కోరుకుంటున్నారంటే, ఆయన మనతో ఏకమై, మన జీవితాల ద్వారా తన మహిమ యొక్క తేజస్సును ప్రసరింపజేయగలగాలి. 

ప్రజ్వలిస్తూ శుద్ధి చేసే ఈ అగ్ని ప్రతిరూపాన్ని గురించి ఈ రోజు ధ్యానించండి. మలినాలన్నీ పైకి తేలేంతగా బంగారం కరిగే దృశ్యాన్ని ఊహించుకోండి. లేదా సిలువ పునీత యోహాను ఉపయోగించిన దుంగ ప్రతిరూపాన్ని ధ్యానించండి. దేవుడు మీ నుండి ఇంకా ఎంతో ఎక్కువ కోరుకుంటున్నారు. ఆయన మిమ్మల్ని రూపాంతరం చేసి, మీ ఊహకు అందని విధాలుగా మిమ్మల్ని ఉపయోగించుకోవాలని కోరుకుంటున్నారు. ప్రజ్వలిస్తూ శుద్ధి చేసే మన ప్రభువు కారుణ్యాగ్ని మిమ్మల్ని రూపాంతరం చేయడానికి అనుమతించాలనే సమూలమైన నిర్ణయం తీసుకోవడానికి భయపడకండి. ఇది ప్రారంభించడానికి రేపటి వరకు వేచి ఉండకండి—ఈ రోజే ఆ జ్వాలను రగిలించండి.

నన్ను శుద్ధి చేసే నా ప్రభువా, రూపాంతరం చేసే నీ ప్రేమ కారుణ్యంతో నా హృదయాన్ని, ఆత్మను జ్వలింపజేయాలని నీవు ఎంతో గాఢంగా కోరుకుంటున్నావు. ఈ ప్రేమాగ్నిని నా హృదయంలో నీవు రగిలించడానికి అనుమతించేలా నాకు అవసరమైన అనుగ్రహాన్ని దయచేయుము. తద్వారా అది నిజంగా ప్రజ్వలిస్తూ, నన్ను పూర్తిగా దహించివేయునుగాక. ఈ జ్వాల నా హృదయాంతరాళాలలో నన్ను జ్వలింపజేయునుగాక. తద్వారా నీవు నా జీవితంలో ప్రకాశవంతంగా వెలుగుతూ, నీ ప్రేమ వెచ్చదనాన్ని మన లోకంలోకి ప్రసరింపజేయుదువుగాక. యేసూ, నేను నీపై నమ్మకం ఉంచుతున్నాను.

పునీత యూదాకు నవదిన ప్రార్థన
ఆశలేని పరిస్థితుల్లో, దిక్కుతోచని సమస్యల్లో
సంవత్సరంలో ఎప్పుడైనా, ముఖ్యంగా అక్టోబర్ 19–27 తేదీల్లో ప్రార్థించవచ్చు

 

మరిన్ని సువార్త ధ్యానాలు

దైవకారుణ్య ధ్యానాలు

సామాన్య కాలానికి పవిత్ర గ్రంథ ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన ప్రధాన చిత్రం: విశ్వరాజైన మన ప్రభువు యేసుక్రీస్తు, ఫ్లికర్ ద్వారా