తెలుగు

వెల్లడైన తండ్రి ప్రేమ

మే 11, 2024
పాస్కా కాలపు ఆరవ వారంలోని శనివారం
నేటి పఠనాలు

వీడియో

ఆంగ్లంలో వినండి

“నేను ఈ విషయాలను మీకు అలంకారిక భాషలో చెప్పాను. ఇకపై మీతో అలంకారిక భాషలో మాట్లాడకుండా, తండ్రిని గురించి మీకు స్పష్టంగా చెప్పే సమయం వస్తోంది.”  యోహాను 16:25

యేసు తండ్రిని గురించి స్పష్టంగా మాట్లాడేది ఎప్పుడు? ఆయన చెప్పే ఆ “గడియ” ఎప్పుడు? మొదటిగా, ఈ “గడియ”ను ఆయన మరణం, పునరుత్థానం, స్వర్గారోహణం తరువాతి కాలంగా అర్థం చేసుకోవచ్చు. అప్పుడు, పెంతెకోస్తు రోజున పవిత్రాత్మ వారిపైకి వచ్చి, ఆయన బోధించినదంతా వారు మరింత లోతుగా, స్పష్టంగా అర్థం చేసుకునేలా వారి మనస్సులను తెరుస్తారు. అయితే యోహాను సువార్తలో “గడియ” అనేది సిలువపై ఆయన మరణాన్ని కూడా సూచిస్తుంది. అది ఆయన మహిమ గడియ; మనుష్యకుమారుడు తన పవిత్ర యాతనానుభవం ద్వారా మనలను రక్షించే గడియ. కాబట్టి, యేసు పలికిన ఈ మాటలను, రాబోయే తన యాతనానుభవాన్ని ఆయన సూచిస్తున్న సందర్భంలో చదవాలి. యేసు చేసిన ఈ బోధ ఆయన “చివరి భోజన ప్రసంగం”లో భాగమని గుర్తుచేసుకోండి. యేసు అరెస్టు చేయబడటానికి గెత్సెమనే తోటకు బయలుదేరే ముందు ఈ బోధను చేశారు.

ఈ “గడియ”ను యేసు యాతనానుభవంగా, సిలువపై ఆయన మరణంగా మనం పరిగణించినప్పుడు, ఆయన ప్రాణత్యాగం కేవలం మనలను రక్షించే విమోచన కార్యం మాత్రమే కాదని మనం గ్రహించాలి. అది పరలోకంలోని తన తండ్రిని గురించి ఆయన అత్యంత స్పష్టంగా తెలియజేసే మార్గాలలో ఒకటి కూడా. నిజానికి, యేసు అనుభవించిన బాధలు, మరణం ఆయన “అలంకారిక మాటలు” వెల్లడించలేని రీతిలో తండ్రిని శిష్యులకు వెల్లడిస్తాయి. యేసు నిగూఢంగా పలికిన మాటలు సత్యమే అయినా, ఆ మాటల ద్వారా ఆ సత్యాన్ని పూర్తిగా తెలియజేయడం సాధ్యపడలేదు. అయితే యేసు స్వేచ్ఛగా స్వీకరించిన బాధలు, మరణం, సాధ్యమైనంత లోతైన రీతిలో తండ్రిని స్పష్టంగా తెలియజేస్తాయి. సిలువ స్వచ్ఛమైన ప్రేమ; తండ్రి స్వచ్ఛమైన ప్రేమ. తండ్రి చిత్తానికి విధేయతతో యేసు సిలువపై మరణించడం ఒక విషయాన్ని అందరికీ వెల్లడిస్తుంది: తండ్రి మనలను ఎంతగానో ప్రేమిస్తున్నారు; మనం తన ఏకైక జనిత కుమారుని విశ్వసిస్తే చాలు, నిత్యజీవానికి వారసులమయ్యేలా ఆయనను బలిగా అర్పించడానికి కూడా తండ్రి సిద్ధపడ్డారు.

సిలువ సందేశం తండ్రి ప్రేమను గురించిన సత్యమైన బోధ. ఊహించగలిగినంతటి అత్యంత స్వచ్ఛమైన, త్యాగపూరితమైన ప్రేమకార్యం ద్వారా ఈ బోధ జరిగింది. సమస్త మానవాళిపట్ల తండ్రి ప్రేమ ఎంత లోతైనదో సిలువ వెల్లడిస్తుంది కాబట్టి, సిలువ ద్వారా యేసు “తండ్రిని గురించి స్పష్టంగా” మాట్లాడారు. దీన్ని అర్థం చేసుకోవడం మీకు కష్టంగా అనిపిస్తే, అలా అనిపించేది మీకు మాత్రమే కాదు. శిష్యులు కూడా దీన్ని అర్థం చేసుకోవడానికి కష్టపడ్డారు. అందుకే చివరికి, వారి మనస్సులను తెరవడానికి పవిత్రాత్మ వారిపైకి రావలసిన అవసరం కలిగింది. ఆ తెర తొలగిపోయి, దేవుని అనంత ప్రేమను గురించిన ఈ అత్యంత శక్తిమంతమైన సందేశాన్ని మనం అర్థం చేసుకోవాలంటే, మనకూ పవిత్రాత్మ అవసరం.

తన బోధపై ఉన్న తెరను తొలగించి, మీపట్ల తండ్రి ప్రేమ ఎంత లోతైనదో మీకు స్పష్టంగా వెల్లడించాలనే యేసు తపనను గురించి ఈ రోజు ధ్యానించండి. సిలువ మరణం ద్వారా అందించబడిన ఈ వెల్లడి కోసం మీ మనస్సును తెరవడానికి పవిత్రాత్మను అనుమతించండి. ఆ వరం కోసం ప్రార్థించండి. ఈ అవగాహనను మీకు ప్రసాదించాలని తాను కోరుకుంటున్నట్లు యేసు మీతో చెబుతున్న మాటలను వినండి. ఆ తరువాత, తండ్రి హృదయాన్నే దర్శించి, అర్థం చేసుకోవడానికి, మీపట్ల ఆయనకున్న దివ్యప్రేమను గ్రహించడానికి అవసరమైన కృప కోసం వేచియుండండి.

నా ప్రియమైన యేసూ, సిలువపై నీ మహిమా ఘడియ తండ్రి ప్రేమను అత్యంత స్పష్టంగా, సంపూర్ణంగా వెల్లడిస్తుంది. మాపట్ల నీకూ పరలోకంలోని నీ తండ్రికీ ఉన్న ప్రేమ ఎంత గాఢమైనదో సిలువపై నీవు మా అందరికీ చూపిస్తున్నావు. ప్రియ ప్రభువా, నీవు నాకు వెల్లడించదలచిన సమస్తానికీ దయచేసి నా మనస్సును తెరువు. తద్వారా నేను నిన్ను తెలుసుకుంటున్న కొద్దీ, పరలోకంలోని నీ తండ్రిని కూడా తెలుసుకుంటాను. యేసూ, నేను నీపై నమ్మకం ఉంచుతున్నాను.

పవిత్రాత్మకు నవదిన ప్రార్థన
పెంతెకోస్తుకు సిద్ధపడేందుకు చేసే ప్రార్థన
శుక్రవారం, మే 10 – శనివారం, మే 18

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన ప్రదర్శించిన చిత్రం: అపొస్తలులకు ప్రబోధం — చిత్రకారుడు: జేమ్స్ టిస్సో, వికీమీడియా కామన్స్ ద్వారా