Lunes, Agosto 15, 2022
Dakilang Kapistahan ng Pag-aakyat sa Langit sa Mahal na Birheng Maria
“Dinadakila ng aking kaluluwa ang Panginoon; nagagalak ang aking espiritu sa Diyos na aking Tagapagligtas sapagkat nilingap niya ang kanyang abang lingkod. Mula sa araw na ito, tatawagin akong mapalad ng lahat ng salinlahi: gumawa ang Makapangyarihan ng mga dakilang bagay para sa akin at banal ang kanyang Pangalan.” Luke 1:46-49
Ang mga pambungad na taludtod na ito ng maluwalhating awit ng papuri ng ating Mahal na Ina ay naghahayag kung sino siya. Siya ang buong buhay na nagpapahayag ng kadakilaan ng Diyos at patuloy na nagagalak. Ganap ang kanyang kababaang-loob at, dahil dito, lubos siyang dinadakila ng bawat salinlahi. Siya ang ginawan ng Diyos ng mga dakilang bagay at ang nilukuban ng Diyos ng kabanalan.
Ang Dakilang Kapistahang ipinagdiriwang natin ngayon, ang kanyang Pag-aakyat sa Langit, ay nagpapahiwatig ng pagkilala ng Diyos sa kanyang kadakilaan. Hindi siya pinahintulutan ng Diyos na dumanas ng kamatayan o ng anumang bunga ng kasalanan. Siya ay Walang Bahid ng Kasalanan, ganap sa lahat ng bagay, mula sa sandali ng paglilihi sa kanya hanggang sa sandaling iniakyat siya sa Langit, katawan at kaluluwa, upang maghari bilang Reyna magpakailanman.
Maaaring mahirap para sa ilan na maunawaan ang kalikasang walang bahid ng kasalanan ng ating Mahal na Ina. Ito ay sapagkat ang kanyang buhay ay isa sa mga pinakadakilang misteryo ng ating pananampalataya. Napakakaunti ang sinabi tungkol sa kanya sa Banal na Kasulatan, ngunit napakarami ang sasabihin tungkol sa kanya sa buong kawalang-hanggan habang nahahayag ang kanyang kababaang-loob at nagniningning ang kanyang kadakilaan upang makita ng lahat.
Ang ating Mahal na Ina ay Imakulada, na ang ibig sabihin ay walang kasalanan, sa dalawang dahilan. Una, sa pamamagitan ng isang natatanging biyaya, iningatan siya ng Diyos mula sa kasalanang orihinal sa sandali ng paglilihi sa kanya. Tinatawag natin itong “biyayang nag-iingat.” Tulad nina Adan at Eva, ipinaglihi siyang walang kasalanan. Ngunit di-tulad nina Adan at Eva, ipinaglihi siya sa kaayusan ng biyaya. Ipinaglihi siya bilang isang iniligtas na sa pamamagitan ng biyaya, ng kanyang Anak na balang araw ay isisilang niya sa mundo. Ang biyayang ibubuhos ng kanyang Anak sa mundo balang araw ay lumampas sa hangganan ng panahon at lumukob sa kanya sa sandali ng paglilihi sa kanya.
Ang ikalawang dahilan kung bakit Walang Bahid ng Kasalanan ang ating Mahal na Ina ay sapagkat, di-tulad nina Adan at Eva, hindi niya kailanman piniling magkasala sa buong buhay niya. Kaya siya ay naging bagong Eva, ang bagong Ina ng lahat ng Nabubuhay, ang bagong Ina ng lahat ng namumuhay sa biyaya ng kanyang Anak. Dahil sa kalikasang ito na walang bahid ng kasalanan at sa kanyang patuloy na malayang pagpiling mamuhay sa biyaya, iniakyat siya ng Diyos sa Langit, katawan at kaluluwa, nang matapos ang kanyang buhay sa lupa. Ang maluwalhati at dakilang katotohanang ito ang ipinagdiriwang natin ngayon.
Pagnilayan ngayon ang iyong pagkaunawa sa ating Mahal na Ina. Kilala mo ba siya, nauunawaan ang kanyang papel sa iyong buhay, at patuloy na hinahangad ang kanyang maka-inang pagkalinga? Siya ang iyong ina kung pipiliin mong mamuhay sa biyaya ng kanyang Anak. Yakapin nang mas malalim ang katotohanang ito ngayon at piliing gawin siyang higit pang mahalagang bahagi ng iyong buhay. Magpapasalamat si Hesus sa iyong paggawa nito!
Panginoon, tulungan Mo akong mahalin ang Iyong ina nang may gayunding pagmamahal na taglay Mo para sa kanya. Kung paanong ipinagkatiwala Ka sa kanyang pangangalaga, gayundin ang hangarin kong maipagkatiwala sa kanyang pangangalaga. Maria, aking Ina at Reyna, ipanalangin mo ako habang dumudulog ako sa iyo. Hesus, nagtitiwala ako sa Iyo.
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Santo ng Araw – Pag-aakyat sa Langit ng Mahal na Birheng Maria
Mga Pagpipilian sa mga Pagbasa sa Misa
