Setyembre 27, 2022
Martes ng Ika-dalawampu’t Anim na Linggo sa Karaniwang Panahon
Mga Pagbasa para sa Araw na Ito
San Vicente de Paul, Pari—Paggunita
“Panginoon, nais Mo bang magpababa kami ng apoy mula sa langit upang tupukin sila?” Lumingon si Jesus at pinagsabihan sila, at nagtungo sila sa ibang nayon. Lucas 9:54-56
Ang mga salitang ito nina Santiago at Juan ay mga salitang gustong sabihin ng maraming tao sa iba’t ibang pagkakataon sa kanilang buhay. Marahil ay nauunawaan mo ang kanilang nadarama. Ganito ang sinabi ng mga Apostol na ito dahil hindi tinanggap si Jesus sa isang bayan ng mga Samaritano na kanilang pinasok. Nais Niyang kumain doon, ngunit tinanggihan Siya at ang Kanyang mga Apostol ng mga taong-bayan. Dahil dito, nasaktan at nagalit sina Santiago at Juan at nais nilang ipababa ang poot ng Diyos sa nayong iyon.
Tuwing nasasaktan tayo sa buhay, mauunawaan kung ganito ang ating nadarama. May hilig tayong maghangad ng katarungan at paghihiganti, at nais nating pagbayaran ng mga nanakit sa atin ang kanilang kasalanan. Ngunit ibang-iba ang saloobin ni Jesus. Pinagsabihan Niya ang Kanyang mga Apostol dahil sa kanilang pagnanais na magbuhos ng poot, at nagpatuloy Siya sa paglalakbay nang hindi hinahayaang makaapekto sa Kanya ang pagtangging ito.
Maaaring mahirap bitawan ang sakit ng pagtanggi at iba pang pananakit na dulot ng kapwa. Madali itong manatili sa ating puso, na parang amag na unti-unting lumalago at sumasakop dito. Kapag nangyari ito, maaaring lubhang mahirapan kang magpatawad at bumitaw sa sakit na iyong nadarama.
Ang pinakamabuting paraan ng pagharap sa sakit na dulot ng kapwa ay ang agad na pagtulad sa ginawa ng ating Panginoon. Kailangan mo itong bitawan kaagad at magpatuloy. Ang Diyos lamang ang may karapatang maglapat ng paghihiganti, hindi tayo. Kapag hindi natin ito nagawa at nagkimkim tayo ng sama ng loob, sa huli ay tayo ang higit na napipinsala nito kaysa sa sinumang iba.
Pagnilayan mo ngayon ang anumang galit o sakit na kinikimkim mo pa rin sa iyong puso. Sadyain mong piliing magpatawad at magpatuloy. Ang pagpapatawad ay hindi nangangahulugang kikilos ka na para bang katanggap-tanggap ang pananakit na ginawa sa iyo. Sa halip, ang pagpapatawad sa kapwa ay pagkilala rin na may nagawang mali. Sa pamamagitan ng pagpapatawad, maiiwasan mong magdulot pa sa iyo ng higit na pinsalang hindi naman kailangan ang sakit na iyon. Sa huli, isa rin itong bukas na paanyaya sa kapwa na magsisi at makipagkasundo sa iyo. Ipaubaya sa Panginoon ang paghihiganti at poot, at sikaping panatilihing payapa ang iyong puso.
Panginoong maawain, idinadalangin ko ang biyayang makapagpatawad. Lalo kong pinatatawad ang mga taong lubhang nanakit sa akin at ipinagkakatiwala ko sila sa Iyo. Palayain Mo ako sa anumang pagnanais na maghiganti na kinikimkim ko, at tulungan Mo akong magmahal nang may pusong dalisay at maawain tulad ng sa Iyo. Mahal Kita, minamahal kong Panginoon. Tulungan Mo akong mahalin ang kapwa gaya ng pagmamahal Mo. Jesus, nagtitiwala ako sa Iyo.
Ikaanim na Araw: Nobena kay Santa Teresita ng Lisieux – Ang Munting Bulaklak
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Santo ng Araw – San Vicente de Paul, Pari
Mga Pagpipilian sa mga Pagbasa sa Misa
Tampok na Larawan: Ang paglalakad patungong Emaus ni Joseph von Führich, mula sa Wikimedia Commons
