Biyernes, Mayo 31, 2024
Kapistahan ng Pagdalaw ng Mahal na Birheng Maria
Umalis si Maria at nagmamadaling naglakbay patungo sa isang bayan sa bulubunduking lupain ng Juda. Pumasok siya sa bahay ni Zacarias at binati si Elisabet. Nang marinig ni Elisabet ang pagbati ni Maria, lumukso ang sanggol sa kanyang sinapupunan. Napuspos si Elisabet ng Espiritu Santo at sumigaw nang malakas, “Pinagpala ka sa lahat ng babae, at pinagpala ang bunga ng iyong sinapupunan.” Luke 1:39–42
Inilalarawan ng magandang kapistahang ipinagdiriwang natin ngayon ang dalawang mahimalang pagdadalang-tao. Ang isa ay naganap sa pamamagitan ng paglulukob ng Espiritu Santo. Ang isa naman ay ang mahimalang paglilihi sa sinapupunan ng isang babaeng matanda na. Inilalahad sa atin ng sipi sa Banal na Kasulatan sa itaas ang unang pagtatagpo nina Maria at Elisabet nang magbatian sila sa pagdating ni Maria. Naglakbay nang malayo si Maria upang makasama ang kanyang pinsan sa mga huling buwan ng pagdadalang-tao ni Elisabet. At nang batiin niya si Elisabet, isa pang mahimalang pangyayari ang naganap. Ang sanggol sa sinapupunan ni Elisabet, si San Juan Bautista, ay “lumukso sa tuwa.” Kaya bago pa man siya isilang, sinimulan na ni Juan na tuparin ang kanyang natatanging misyon na ihanda ang daan para sa Panginoon. Ginawa niya ito sa sandaling iyon sa pamamagitan ng pag-uudyok sa kanyang sariling ina, si Elisabet, na makilala ang banal na presensiya ng Tagapagligtas sa sinapupunan ni Maria.
Isaalang-alang, lalo na, ang mga pag-uusap na maaaring namagitan sa dalawang banal na babaeng ito sa mga buwang magkasama sila. Bagaman bahagyang sulyap lamang sa kanilang unang pag-uusap ang ibinibigay sa atin ng Banal na Kasulatan, makatitiyak tayong maliit na bahagi lamang ito ng mga bagay na malalim nilang tinalakay nang may diwa ng panalangin. Higit sa lahat, tiyak na sa kanilang mga pag-uusap ay ibinahagi nila sa isa’t isa ang espirituwal na kaloob ng kagalakan.
Ang kagalakan ay higit pa sa isang damdamin. Ito ay espirituwal sa kalikasan nito. Hindi lamang ito karanasan ng isang bagay na nakaaaliw; ito ay ang karanasan ng pagkilala sa pagkilos ng Diyos sa iyong buhay. Ang pagkakita sa Diyos na kumikilos sa mga kahanga-hangang paraan ay humahantong sa pasasalamat at pagsasaya. Ang kagalakang ito ay nagbubunga ng lakas at siglang nakahahawa at nagpapasigla ng loob.
Dapat tayong lahat na magsikap na makita ang kamay ng Diyos na kumikilos sa sarili nating buhay upang ang pagtutuon natin sa Kanyang banal na pagkilos ay magbunga rin ng kagalakan. Kailangan natin ang kagalakan. Kailangan nating mapalakas ng kaloob na ito upang magkaroon tayo ng lakas ng loob at katatagan habang araw-araw nating sinisikap na tuparin ang Kanyang kalooban.
Pagnilayan ngayon ang patotoo ng kagalakan na ibinibigay sa atin ng dalawang banal na babaeng ito. Alamin mong tinatawag kang makibahagi sa gayunding kagalakan habang mapagpakumbaba mong itinutuon ang iyong pansin sa mga paraan kung paano ka pinagpala ng Diyos. Kung nadarama mong kulang ang kagalakan sa iyong buhay, isaalang-alang kung saan mo hinahayaang gumala ang iyong isip sa buong maghapon. Nakatuon ka ba sa nakaraan, sa mga hinanakit, sa mga problema at sa mga katulad nito? Kung gayon, ang mga kaisipang ito ay tiyak na hahantong sa panlulumo at maaari pang mauwi sa kawalan ng pag-asa. Sikapin mong ituon ang iyong isip sa pagkilos ng Diyos sa iyong buhay. Tingnan ang maraming biyayang ipinagkaloob sa iyo at namnamin ang mga banal na pagkilos na iyon. Sa paggawa nito, makakagalak ka kasama ni Santa Elisabet at ng ating Mahal na Ina.
Aking banal na Sanggol na Hesus, habang nananahan Ka sa banal na sinapupunan ng Iyong minamahal na ina, ang Iyong presensiya ay nagdulot ng malaking kagalakan sa kanyang puso at sa mga puso nina Elisabet at Juan. Tulungan Mo akong makita ang Iyong presensiya sa aming mundo at sa aking buhay, upang ako rin ay mapuspos ng kagalakang dulot ng Iyong patuloy na paglapit sa akin. Hesus, nagtitiwala ako sa Iyo.
Nobena sa Mahal na Puso ni Hesus
Mga petsa ng nobena: Mayo 29 – Hunyo 6, 2024
Hunyo 7, 2024: Dakilang Kapistahan ng Mahal na Puso ni Hesus
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Karagdagang Babasahin – Pagdalaw ng Mahal na Birheng Maria
Mga Panalangin sa ating Mahal na Ina
Mga Pagpipilian sa mga Pagbasa sa Misa
