Isang Naglalagablab na Apoy ng Awa

Marami tayong mapupulot sa mga turong ito ng ating Panginoon. Hindi lamang sinabi ni Hesus, “Naparito Ako upang magpaningas ng apoy sa lupa…” Sinabi rin Niya na hangad Niyang ang apoy na ito ay “maglagablab!”

Makapangyarihan ang apoy. Halimbawa, kayang dalisayin ng naglalagablab na apoy ang mahalagang metal na ginto. Kapag pinainit ito hanggang sa matunaw, umaangat sa ibabaw ang mga karumihan upang madaling maalis. Kaya rin ng apoy na tumupok. Kapag natapos nang manunog ang isang naglalagablab na apoy, abo na lamang ang natitira. Maraming dakilang santo ang nagnilay sa larawan ng apoy bilang larawan ng pagdadalisay na nais gawin ng Diyos sa ating mga kaluluwa. Halimbawa, malalim na pinagnilayan ni San Juan de la Cruz ang larawang ito. Ipinaliwanag niya na ang pagpasok sa pakikipagkaisa sa Diyos ay katulad ng pagliyab ng isang troso. Sa simula, habang nagsisimulang magliyab ang troso, lumalagutok at pumipitik ito. Ito ay dahil ang mga karumihang nasa loob ng kahoy, gaya ng halumigmig o dagta, ay hindi nasusunog na gaya ng kahoy. Ngunit habang patuloy na nagliliyab ang troso, ayon sa paliwanag ni San Juan, dumarating ang sandaling nagiging kaisa na ito ng apoy. Sa simula, maibubukod mo pa ang troso sa apoy kapag bahagi pa lamang nito ang nagliliyab. Ngunit kapag nabalot na ng liyab ang buong troso at natupok na ang lahat ng karumihan, ang kahoy ay kaisa na ng apoy. Nagbabaga ito at nagbibigay ng liwanag at init.

Kapag pinagninilayan natin ang mga salitang ito ni Hesus tungkol sa Kanyang hangaring “magpaningas ng apoy sa lupa,” dapat muna nating makita rito ang Kanyang hangaring dalisayin ang ating mga kaluluwa. Sa loob ng ating mga kaluluwa ay maraming karumihang kailangang alisin upang tayo ay maging kaisa ng Diyos at magningning sa Kanyang liwanag at kaluwalhatian. Bahagi ng pagdadalisay na ito ang prosesong hinahayaan nating ilantad ng Diyos ang ating mga kasalanan upang makita at maalis ang mga ito. Ngunit posible lamang ito kung hahayaan nating tupukin tayo ng naglalagablab na apoy ng mapagpadalisay na pag-ibig ng Diyos.

Madalas sa buhay, kuntento na tayo sa pagiging pangkaraniwan lamang sa ating paglalakbay sa pananampalataya. Nagdarasal tayo, nagsisimba tuwing Linggo, at nagsisikap na maging mabuti. Ngunit hindi ito ang buhay na nais ng ating Panginoon para sa atin. Nais Niya ang isang buhay na lubusang tinutupok ng naglalagablab na apoy ng Kanyang pag-ibig. Nais Niyang lubusan tayong madalisay mula sa ating kasalanan upang maging kaisa Niya tayo, at sa pamamagitan ng ating buhay ay maipagliwanag Niya ang ningning ng Kanyang kaluwalhatian.