ሜይ 7, 2021
የፋሲካ አምስተኛ ሳምንት ዓርብ
የዛሬ ንባባት
እኔ የማዝዛችሁን ብታደርጉ ወዳጆቼ ናችሁ። ባሪያ ጌታው የሚያደርገውን ስለማያውቅ፣ ከእንግዲህ ባሪያዎች አልላችሁም። ከአባቴ የሰማሁትን ሁሉ ስለነገርኋችሁ ወዳጆች ብዬ ጠርቻችኋለሁ። ዮሐንስ 15:14–15
ኢየሱስ ስለ ወዳጅነት የሰጠው ትርጉም ለአንዳንዶች መጀመሪያ ላይ እንግዳ ሊመስላቸው ይችላል። የሚያዝዘንን ስናደርግ ብቻ ወዳጆቹ እንደምንሆን ይነግረናል። ይህን ከቅርብ ወዳጆችህ ለአንዱ ስትናገር አስብ። እንዲህ ያለ አባባል ምናልባትም በሳቅ ይቀበልና እንደ ሞኝነት ይቆጥረው ይሆናል። ታዲያ እውነተኛ ወዳጅነት ሁልጊዜ በታዛዥነት ላይ የተመሠረተ ነውን?
ወዳጆችህ ወዳጅነትህን ለማግኘት ለአንተ እንዲታዘዙ መጠበቅ ለማንኛውም እውነተኛ ወዳጅነት መሠረት ሊሆን እንደማይችል ግልጽ ነው። ከእርሱ ጋር ያለህን ወዳጅነት ለቅዱስ ፈቃዱ በመታዘዝ ላይ ሊመሠርት የሚችለው ኢየሱስ ብቻ ነው። ለምን? እንድታደርገው የሚያዝዝህ ነገር በባሕርዩ ምን እንደሆነ ስንመለከት መልሱን እናገኛለን።
ኢየሱስ ንጹሕ እውነት ነው። ፈቃዱም የፍቅር ፍጹምነት ነው። ስለዚህ የሚያዝዝህን ስታደርግ ብቻ ወዳጁ እንደምትሆን የተናገረው ቃል፣ ወዳጅነት በእውነት ላይ እንደሚመሠረት ያስተምራል። በፍቅር፣ በበጎነት፣ በደግነት፣ የራስን ጥቅም ሳይፈልጉ መሥዋዕት በመክፈልና ራስን በመስጠት ላይ የተመሠረተ ነው። ኢየሱስ እንድንተገብራቸው የሚያዝዘንም እነዚህን እውነቶች ሁሉ ነው። ስለዚህ ኢየሱስ በመሠረቱ እየነገረን ያለው፣ ከእርሱ ጋር ሊኖረን ወደምንመኘው ወዳጅነት የሚያደርሰንን መንገድ የሚሰጠን የእርሱ ፈቃድ ብቻ እንደሆነ ነው።
ከሌሎች ጋር ስላለህ ወዳጅነት ስናስብ፣ እያንዳንዱ እውነተኛ ወዳጅነት ሊመሠረት የሚችለው እግዚአብሔር ለወዳጆች በሚፈቅደው ላይ ብቻ ነው። በዚህም መልኩ፣ ወዳጅነቶችህ በእግዚአብሔር ፈቃድ መሠረት እንዲሆኑ «ማዘዝ» ትችላለህ። ይህ ማለት ወዳጅነትን ለመመሥረት ፈቃደኛ የምትሆነው በእውነት ላይ ሲመሠረት ብቻ ነው ማለት ነው። የምትጋራው ግንኙነትም የራስን ጥቅም በማይፈልጥ፣ መሥዋዕት በሚከፍልና ራስን በሚሰጥ ምሕረት፣ ርኅራኄ፣ ቅንነትና ፍቅር ላይ የተመሠረተ እንዲሆን ብቻ ፈቃደኛ ነህ ማለት ነው።
ዛሬ ስለ ወዳጅነት ባለህ ግንዛቤ ላይ አሰላስል። ከእግዚአብሔር ጋር ካለህ ወዳጅነት ጀምር፤ ከዚያም ከሌሎች ጋር ስላለህ ወዳጅነት አስብ። ጌታችንን እርሱ በሚያዝዘው መንገድ ትወደዋለህን? ከሌሎች ጋር ስላለህ ወዳጅነት ስታስብም፣ እያንዳንዱ ወዳጅነት ለእግዚአብሔር ፈቃድ ከመታዘዝ ጋር ይስማማ እንደሆነ መርምር። እግዚአብሔርንና ሌሎችን እውነተኛ ፍቅር በሚያዝዘው መሠረት መውደድ ከቻልህ፣ ወዳጅነቶችህ ለዘላለም የሚቆይ ጥልቅ እርካታ ያፈራሉ።
አምላኬና ጌታዬ ሆይ፣ ንጹሕና ቅዱስ ፍቅር በሚያዝዘው ላይ ብቻ ወደተመሠረተ ወዳጅነት ከአንተ ጋር እንድገባ ትጠራኛለህ። ስለዚህ የፍቅር ትእዛዝ አመሰግንሃለሁ፤ ይህን ጥሪም እቀበላለሁ። ጌታ ሆይ፣ ከአንተ ጋር ያለኝን ወዳጅነት በፍቅር እውነቶች መሠረት ያለማቋረጥ እያጠናከርሁ እንድሄድ እርዳኝ፤ ወዳጅነቶቼንም ሁሉ በዚህ ቅዱስ ፍቅር ትእዛዛት ላይ ብቻ እንድመሠርት እርዳኝ። ኢየሱስ ሆይ፣ በአንተ እታመናለሁ።
ከላይ የቀረቡት ምስሎች፦ ኢየሱስ ደቀ መዛሙርቱን ሲያስተምር
