በእምነት የተለወጠ ፍርሃት

ጃንዋሪ 30፣ 2024
በዓመቱ ተራ ዘመን የአራተኛው ሳምንት ማክሰኞ
የዛሬ ንባባት

ገና እየተናገረ ሳለ፣ ከምኩራቡ አለቃ ቤት ሰዎች መጥተው፣ «ልጅህ ሞታለች፤ መምህሩን ከዚህ በኋላ ለምን ታስቸግረዋለህ?» አሉት። ኢየሱስ ግን የተነገረውን መልእክት ችላ ብሎ፣ የምኩራቡን አለቃ፣ «አትፍራ፤ ብቻ እመን» አለው። ማርቆስ 5:35–36

ይህ አጭር አረፍተ ነገር በየቀኑ ልናሰላስለው የሚገባ ነው። «አትፍራ፤ ብቻ እመን።» ይህ ቃል በሕይወታችን ዘመን በምናልፍባቸው ብዙ ሁኔታዎች ላይ ሊሠራ ይችላል። ከጌታችን የተሰጠ የፍቅር ትእዛዝ ነው፤ ሁላችንም፣ በተለይም መከራዎች ሲደርሱብን፣ ልንሰማው የሚያስፈልገን ትእዛዝ ነው።

በመጀመሪያ፣ ይህ እጅግ ከባድ ሁኔታ እንደነበርና በእንዲህ ያለ ሁኔታ ኃይለኛ ስሜቶች መነሣታቸውና ለፍርሃት መፈተን ሊገባን የሚችል መሆኑን ልብ ማለት ይገባል። በዚህ ታሪክ የተጠቀሰው አባት በሞት አፋፍ ላይ የነበረች ትንሽ ሴት ልጅ ነበረችው፤ እንዲፈውሳትም ኢየሱስን ለመለመን መጣ። ኢየሱስም ተስማማ። ነገር ግን በመንገድ ላይ ሳሉ፣ ኢየሱስና አባትየው ልጅቷ አሁኑኑ እንደሞተች የሚገልጽ ልብ ሰባሪ ዜና ደረሳቸው። ማንኛውም ወላጅ እንደሚረዳው፣ ይህን ዜና መስማት እጅግ ከባድ ሳይሆን አይቀርም። ስለዚህ ይህ አባት የተሰማውን ሐዘን ለመረዳት በመሞከር ጀምር። በተለይም ይህን አስከፊ ዜና በሰማበት ቅጽበት የተሰማውን ሐዘን ለመረዳት ሞክር።

ሐዘኑን ስታሰላስል፣ የኢየሱስንም ልብ፣ ሐሳብ፣ ስሜትና ቃላት ለማሰላሰል ሞክር። ኢየሱስ ፍርሃት አልነበረበትም። የዚህ ጉዳይ ፍጻሜ እጅግ መልካም እንደሚሆን ያውቅ ነበር። ነገር ግን በሐዘን ላይ ላለው ለዚህ አባት ጥልቅ ርኅራኄና ፍቅር ስለነበረው፣ ተስፋ ሊሰጠው ወደ እርሱ ዞረ። በሕይወት ውስጥ እጅግ ከባድና አሳማሚ በሆነ ሁኔታ መካከል ተስፋ ማግኘት አስቸጋሪ ነው። ሐዘን ሲገጥመን፣ ለተስፋ መቁረጥ እጅ የመስጠት ፈተና እጅግ ጠንካራ ይሆናል። ተስፋ መቁረጥ ማለት ተስፋን ሙሉ በሙሉ ማጣት ነው። ተስፋ መቁረጥ ከእግዚአብሔር ያርቀናል፣ እምነታችንንም ይነጥቀናል። ነገር ግን የኢየሱስን የፍቅር ትእዛዝ ከተከተልን፣ ተስፋ መቁረጥን ሁልጊዜ ማስወገድ እንችላለን። «አትፍራ፤ ብቻ እመን።»

በሕይወትህ ውስጥ እንድትፈራ የሚፈትንህ ምንድን ነው? ተስፋህን እንድታጣ የሚፈትንህስ ምንድን ነው? ምናልባት በምትወደው ሰው ሞት እየተሠቃየህ ይሆናል፣ ይህም እጅግ ከብዶህ ይሆናል። ምናልባት ሐዘንህ ከትንንሽ ጉዳዮች የመጣና በአሁኑ ጊዜ ቀላል ብቻ ሊሆን ይችላል። እውነታው ግን ሁላችንም በየቀኑ ተስፋ እንድንቆርጥ የሚያደርጉ ትንንሽ ፈተናዎች ያጋጥሙናል። አብዛኞቻችንም በአንድ ወቅት ወይም በሌላ ከባድ ፈተናዎች ያጋጥሙናል። በእነዚህ ምክንያቶች፣ ሁላችንም የኢየሱስን ቃላት ዘወትር መስማት አለብን። እግዚአብሔር ለሕይወታችን ባለው ዕቅድ ላይ ካለን የማይናወጥ እምነት የሚመነጨውን የተስፋ ስጦታ እንዲያበረክትልን እየለመንነው፣ በሕይወታችን ያለውን ፍርሃት ሁሉ ለማስወገድ መትጋት አለብን።

ዛሬ፣ በሕይወትህ ውስጥ ከተስፋ መቁረጥ፣ ከፍርሃት ወይም ከጭንቀት ጋር ስላለብህ ማንኛውም ትግል አሰላስል። ይህን ስታደርግ፣ በእምነት ወደ እግዚአብሔር ስትመለስ ሁሉም ነገር ሊቻል እንደሚችል ዕወቅ። እምነት የሕይወትን መከራዎች ሁልጊዜ ያስወግዳል ማለት አይደለም፤ ከዚያ የተሻለ ነገር ያደርጋል። መከራዎችን በጸጋ፣ በደስታና ከተፈጥሮ በላይ በሆነ ተስፋ ልትታገሣቸው እንድትችል ይለውጣቸዋል። ይህ ሲሆን፣ እግዚአብሔር በሕይወታችን ያለውን ሁሉ ለበጎአችን ሊጠቀምበት ይችላል። ማድረግ ያለብን ፍርሃትን ያለማቋረጥ መቃወምና «ብቻ ማመን» ነው።

ርኅሩኅ ጌታዬ ሆይ፣ በሐዘን ላይ የነበረውን ይህን አባት አጽናናኸው፣ የእምነትና የተስፋ ስጦታዎችንም በውስጡ አሳደርክ። እባክህ፣ በሕይወቴ ምንም ዓይነት ትግል ቢገጥመኝ፣ በአንተ እንድታመን እየጠራኸኝ፣ የፍቅር ትእዛዝህን ለእኔም ተናገር። ሁልጊዜ በአንተ እንዳምን፣ ፈጽሞም በተስፋ መቁረጥ ወይም በፍርሃት እንዳልወድቅ አድርገኝ። ኢየሱስ ሆይ፣ በአንተ እታመናለሁ።

ለዐቢይ ጾም የሚሆኑ መጻሕፍት፦