விசுவாசத்தால் மாற்றம் பெறும் அச்சம்

ஜனவரி 30, 2024
பொதுக்காலம் நான்காம் வாரத்தின் செவ்வாய்க்கிழமை
இன்றைய வாசகங்கள்

அவர் இன்னும் பேசிக்கொண்டிருந்தபோது, தொழுகைக்கூடத் தலைவரின் வீட்டிலிருந்து சிலர் வந்து, “உமது மகள் இறந்துவிட்டாள்; இனியும் போதகரை ஏன் தொந்தரவு செய்ய வேண்டும்?” என்றனர். சொல்லப்பட்ட செய்தியைப் பொருட்படுத்தாமல், இயேசு தொழுகைக்கூடத் தலைவரிடம், “அஞ்சாதீர்; விசுவாசம் மட்டும் கொள்ளும்” என்றார். மாற்கு 5:35–36

இந்தச் சிறிய வாக்கியம் ஒவ்வொரு நாளும் சிந்திப்பதற்கு உரியது. “அஞ்சாதீர்; விசுவாசம் மட்டும் கொள்ளும்.” நம் வாழ்நாள் முழுவதும் நாம் எதிர்கொள்ளும் பல சூழ்நிலைகளுக்கு இந்தக் கூற்று பொருந்தும். இது நம் ஆண்டவர் விடுக்கும் அன்புக் கட்டளை; குறிப்பாகத் துன்பங்கள் நம்மை அணுகும்போது, நாம் அனைவரும் கேட்க வேண்டிய கட்டளை இது.

முதலில், இது மிகவும் நெருக்கடியான ஒரு சூழ்நிலை என்பதைக் கவனிக்க வேண்டும். இத்தகைய நிலையில் கடுமையான உணர்ச்சிகளும் அச்சத்திற்கு இடமளிக்கும் சோதனைகளும் எழுவது புரிந்துகொள்ளக்கூடியதே. இந்த நிகழ்வில் வரும் தந்தையின் இளம் மகள் இறக்கும் நிலையில் இருந்தாள்; அவளைக் குணமாக்கும்படி இயேசுவிடம் மன்றாட அவர் வந்தார். இயேசுவும் ஒப்புக்கொண்டார். ஆனால் அவர்கள் வழியில் சென்றுகொண்டிருந்தபோது, அந்த மகள் சற்றுமுன் இறந்துவிட்டாள் என்ற நெஞ்சை நொறுக்கும் செய்தி இயேசுவுக்கும் அந்தத் தந்தைக்கும் கிடைத்தது. எந்தவொரு பெற்றோரும் உணரக்கூடியதுபோல, இந்தச் செய்தியைக் கேட்பது தாங்க முடியாத அளவுக்குக் கடினமாக இருந்திருக்க வேண்டும். ஆகவே, இந்தத் தந்தை அனுபவித்த துயரத்தைப் புரிந்துகொள்ள முயல்வதிலிருந்து தொடங்குங்கள். குறிப்பாக, இந்தப் பேரதிர்ச்சியான செய்தியைக் கேட்ட அந்த நொடியில் அவர் அடைந்த துயரத்தைப் புரிந்துகொள்ள முயலுங்கள்.

அவருடைய துயரத்தைச் சிந்திக்கும்போது, இயேசுவின் உள்ளம், சிந்தனை, உணர்ச்சிகள், வார்த்தைகள் ஆகியவற்றையும் சிந்திக்க முயலுங்கள். இயேசுவுக்கு அச்சம் ஏதும் இருக்கவில்லை. இது மிக நன்றாக முடியும் என்பதை அவர் அறிந்திருந்தார். ஆனால் துயரத்தில் ஆழ்ந்திருந்த இந்தத் தந்தையின்மீது ஆழ்ந்த பரிவும் அன்பும் கொண்டிருந்ததால், அவருக்கு நம்பிக்கை அளிக்க இயேசு அவரை நோக்கித் திரும்பினார். வாழ்வில் மிகவும் கடினமான, வேதனைமிக்க ஓர் அனுபவத்தின் நடுவில் நம்பிக்கை கொள்வது எளிதல்ல. துயரத்தை எதிர்கொள்ளும்போது, நம்பிக்கையிழப்புக்கு இடமளிக்கும் சோதனை மிக வலுவாக இருக்கும். நம்பிக்கையிழப்பு என்பது நம்பிக்கையை முற்றிலுமாக இழந்துவிடுவதாகும். அது நம்மைக் கடவுளிடமிருந்து விலக்கி, நம் விசுவாசத்தைப் பறித்துவிடுகிறது. ஆனால் இயேசுவின் அன்புக் கட்டளையைப் பின்பற்றினால், நம்பிக்கையிழப்பை எப்போதும் தவிர்க்க முடியும். “அஞ்சாதீர்; விசுவாசம் மட்டும் கொள்ளும்.”

வாழ்வில் எது உங்களை அச்சத்திற்கு இடமளிக்கத் தூண்டுகிறது? எது உங்கள் நம்பிக்கையை இழக்கத் தூண்டுகிறது? ஒருவேளை அன்புக்குரிய ஒருவரின் இறப்பால் நீங்கள் போராடிக்கொண்டிருக்கலாம்; அதைத் தாங்குவது உங்களுக்கு மிகவும் கடினமாக இருக்கலாம். ஒருவேளை உங்கள் துயரத்திற்கான காரணங்கள் சிறியவையாகவும், இப்போதைக்கு அந்தத் துயரம் ஓரளவே உள்ளதாகவும் இருக்கலாம். உண்மை என்னவென்றால், நாம் அனைவரும் ஒவ்வொரு நாளும் நம்பிக்கையை இழப்பதற்கான சிறிய சோதனைகளை எதிர்கொள்வோம். மேலும், பெரும்பாலானோர் ஏதாவது ஒரு நேரத்தில் கடுமையான சோதனைகளையும் எதிர்கொள்வார்கள். இந்தக் காரணங்களால், நாம் அனைவரும் இயேசுவின் வார்த்தைகளுக்கு இடைவிடாது செவிமடுக்க வேண்டும். நம் வாழ்வுக்கான அவரது திட்டத்தின்மீது அசைக்க முடியாத விசுவாசத்திலிருந்து வரும் நம்பிக்கை என்னும் கொடையை நமக்கு அருளுமாறு கடவுளை வேண்டிக்கொண்டே, வாழ்வின் ஒவ்வோர் அச்சத்தையும் அகற்ற முயல வேண்டும்.

வாழ்வில் நம்பிக்கையிழப்பு, அச்சம் அல்லது கவலை ஆகியவற்றோடு நீங்கள் நடத்தும் போராட்டங்களை இன்று சிந்தித்துப் பாருங்கள். அவ்வாறு செய்யும்போது, விசுவாசத்தோடு கடவுளிடம் திரும்பினால் அனைத்தும் சாத்தியம் என்பதை அறிந்துகொள்ளுங்கள். விசுவாசம் வாழ்வின் துன்பங்களை நீக்கிவிடும் என்று சொல்ல முடியாது; அதைவிடச் சிறந்த ஒன்றை அது செய்கிறது. அருளோடும் மகிழ்ச்சியோடும் இயற்கைக்கு அப்பாற்பட்ட நம்பிக்கையோடும் நீங்கள் துன்பங்களைத் தாங்கிக்கொள்ளுமாறு அவற்றை மாற்றியமைக்கிறது. இவ்வாறு நிகழும்போது, வாழ்வில் உள்ள அனைத்தையும் கடவுள் நமது நன்மைக்காகப் பயன்படுத்த முடியும். நாம் செய்ய வேண்டியதெல்லாம் அச்சத்தைத் தொடர்ந்து புறக்கணித்து, “விசுவாசம் மட்டும் கொள்வதே.”

பரிவுமிக்க என் ஆண்டவரே, துயரத்தில் ஆழ்ந்திருந்த இந்தத் தந்தைக்கு நீர் ஆறுதல் அளித்து, விசுவாசம், நம்பிக்கை என்னும் கொடைகளை அவருடைய உள்ளத்தில் ஊட்டினீர். வாழ்வில் நான் எத்தகைய போராட்டத்தைச் சந்தித்தாலும் உம்மில் நம்பிக்கை வைக்க என்னை அழைத்து, உமது அன்புக் கட்டளையை எனக்கும் கூறியருளும். நான் எப்போதும் உம்மீது விசுவாசம் கொண்டிருக்கவும், ஒருபோதும் நம்பிக்கையிழப்புக்கோ அச்சத்திற்கோ ஆளாகாமல் இருக்கவும் அருளும். இயேசுவே, உம்மில் நம்பிக்கை வைக்கிறேன்.

தவக்காலத்திற்கான நூல்கள்: