Cebuano

Pag-ila sa Kaugalingon isip Makasasala

Martes, Disyembre 13, 2016

Mga Pagbasa alang sa Martes sa Ikatulong Semana sa Adbiyento

Santa Lucia sa Siracusa, Birhen ug Martir – Handumanan

 

Miingon si Jesus kanila, “Amen, sultihan ko kamo: ang mga maniningil ug buhis ug ang mga babayeng nagbaligya sa ilang lawas nag-una kaninyo sa pagsulod sa Gingharian sa Dios. Sa dihang mianhi kaninyo si Juan sa dalan sa pagkamatarong, wala kamo motuo kaniya; apan mituo kaniya ang mga maniningil ug buhis ug ang mga babayeng nagbaligya sa ilang lawas.” Mateo 21:31c-32a

Lisod tuohan kining gisulti ni Jesus ngadto sa mga ansiyano ug sa mga pangulong pari. Nag-una ba gayod ang mga maniningil ug buhis ug ang mga babayeng nagbaligya sa ilang lawas sa pagsulod sa Gingharian sa Dios kay niining mga pangulo sa relihiyon? Nagpasabot ba gayod si Jesus nga mas balaan pa ang mga babayeng nagbaligya sa ilang lawas ug ang mga maniningil ug buhis kay niining mga pangulo sa relihiyon? Oo, mao gayod kana ang iyang gipasabot!

Ang garbo gayod niining mga pangulo sa relihiyon ang nakapalisod nila sa pagdawat nga tinuod kining mga pulong ni Jesus. Taas kaayo ang ilang pagtan-aw sa ilang kaugalingon, ug nagpaabot sila nga ingon usab niana ang pagtan-aw kanila sa uban. Kombinsido sila nga matarong kaayo sila, ug dili gayod maayong tan-awon ang ilang gawi.

Apan gibungkag ni Jesus kining tanan sa iyang pagpataas sa mga babayeng nagbaligya sa ilang lawas ug sa mga maniningil ug buhis ngadto sa Gingharian sa Dios. Daw usa kadto ka “sagpa sa nawong” sa mga pangulo sa relihiyon. Apan gikinahanglan nila kadto nga sagpa alang sa kaayohan sa ilang mga kalag.

Ang labing maayong pamalandong nga atong makuha dinhi mao ang pagpangutana sa atong kaugalingon kon kinsa ang mas atong kaamgid. Nakita ba nimo ang imong kaugalingon sa mapahitas-ong mga pangulo sa relihiyon niadtong panahona? O mas nakita ba nimo ang imong kaugalingon sa mga maniningil ug buhis ug sa mga babayeng nagbaligya sa ilang lawas? Tingali lisod ang pag-angkon nga susama kita sa bisan hain niining duha ka grupo. Tingali mas gusto natong isipon ang atong kaugalingon nga maayo ug matarong, nga dili moangkon sa bisan unsang kahuyang o kapakyasan. Apan wala kana sa mga grupo nga gipakita ni Jesus kanato.

Ang tinuod mao nga angay natong tan-awon ang atong kaugalingon nga kauban sa grupo sa mga maniningil ug buhis ug sa mga babayeng nagbaligya sa ilang lawas. Ngano man? Kay kitang tanan makasasala. Tingali dili pareho sa ila ang sala nga atong nabuhat, apan nakasala usab kita ug kinahanglan nato kining angkonon. Sa pagkatinuod, kon dili nato maangkon ang atong kahuyang ug sala, wala kitay kalainan sa mga ansiyano ug sa mga pangulong pari. Natanggong usab kita sa atong kaugalingong garbo ug sa pagtuo nga matarong kaayo kita.

Pamalandongi karong adlawa kon kinsa ang labing susama nimo. Kon lisod para nimo nga ilhon ang imong kaugalingon isip makasasala sama sa mga babayeng nagbaligya sa ilang lawas ug sa mga maniningil ug buhis, tingali anaa usab kanimo ang sala sa garbo nga anaa sa mga pangulo sa relihiyon. Sulayi ang pag-ampo alang sa pagpaubos. Pag-ampo nga makita nimo ang imong kaugalingon sama sa pagtan-aw sa Dios kanimo. Diha lamang sa kahayag niining kamatuoran makakaplag ka ug kagawasan.

Ginoo, palihog pun-a ang akong kasingkasing sa pagpaubos. Ug diha nianang pagpaubos, tabangi ako nga makita ang akong kaugalingon kon unsa gayod ako. Tabangi ako nga makita ang akong sala, apan makita usab ang akong pangandoy alang Kanimo. Tabangi ako nga modangop Kanimo bisan sa akong pagkamakasasala ug makasinati sa kalipay ug kagawasan sa mga mosulod sa Imong Gingharian. Jesus, misalig ako Kanimo.

Tan-awa usab: Adlaw-adlaw nga Pamalandong sa Balaang Kalooy


BAG-O!

Pamalandongi ang hunahuna ug kasingkasing sa atong Mahal nga Inahan!

40 ka Adlaw sa Tiilan sa Krus

40 ka Adlaw sa Tiilan sa Krus:
Usa ka Pagtan-aw nga Puno sa Gugma gikan sa Kasingkasing sa Atong Mahal nga Inahan