Domingo, Marso 4, 2018
Ikatulong Domingo sa Kwaresma, Tuig B
(Kon gamiton ang mga pagbasa sa Tuig A, i-klik dinhi o padayon sa ubos)
San Casimiro – Dili Obligadong Handumanan

Naghimo siyag latigo gikan sa mga pisi ug gipapahawa niya silang tanan gikan sa nataran sa templo, apil ang mga karnero ug mga baka. Gipatibulaag niya ang mga sensilyo sa mga tig-ilis og kuwarta ug gipangtumba ang ilang mga lamesa. Ug miingon siya sa mga namaligya og salampati, “Kuhaa kining mga butanga dinhi, ug ayaw na ninyo himoang merkado ang balay sa akong Amahan.” Juan 2:15-16
Dakong kagubot ang nahitabo tungod sa gibuhat ni Jesus. Direkta Niyang giatubang ang mga tawo nga naghimo sa Templo nga merkado. Gibuhat kini sa mga namaligya og mga hayop nga ihalad aron makaginansiya gikan sa sagradong mga naandan sa pagtuo sa mga Hudiyo. Wala sila didto aron mag-alagad sa kabubut-on sa Diyos, kondili aron unahon ang ilang kaugalingong kaayohan. Ug kini maoy nakapukaw sa balaang kasuko sa atong Ginoo.
Importante nga masabtan nga ang kasuko ni Jesus wala maggikan sa pagkawala sa Iyang pagpugong sa kaugalingon. Dili kini pagbuto sa hilabihang kasuko tungod kay wala na Niya mapugngi ang Iyang gibati. Sa kasukwahi, bug-os Niyang napugngan ang Iyang kaugalingon, ug gipakita Niya ang Iyang kasuko tungod sa kusog Niyang pagbati sa gugma. Niining higayona, ang Iyang hingpit nga gugma napadayag pinaagi sa pagbati sa kasuko.
Kasagaran, ang kasuko giisip nga sala, ug sala kini kon resulta kini sa pagkawala sa pagpugong sa kaugalingon. Apan importante nga hinumdoman nga ang pagbati sa kasuko, sa iyang kaugalingon, dili sala. Ang usa ka kusog nga pagbati nagduso kanato sa paglihok ug mapadayag sa lainlaing paagi. Ang labing importanteng pangutana mao kini: “Unsa may nagpalihok nianang pagbati?”
Sa kahimtang ni Hesus, ang pagdumot sa sala ug ang paghigugma sa makasasala maoy nagtukmod Kaniya niining balaang kapungot. Sa Iyang pagpanglintuwad sa mga lamesa ug pag-abog sa mga tawo gikan sa Templo gamit ang latigo, gipatin-aw ni Hesus nga gihigugma Niya ang Iyang Amahan, kansang balay didto sila, ug nga dako usab ang Iyang gugma sa mga tawo, mao nga mainiton Niya silang gibadlong tungod sa sala nga ilang ginabuhat. Ang kataposang tumong sa Iyang gibuhat mao ang ilang pagbalik sa Dios.
Sa samang hingpit nga kadasig, gidumtan ni Hesus ang sala sa imong kinabuhi. Usahay nagkinahanglan kita og balaang pagbadlong aron mobalik kita sa hustong dalan. Ayaw kahadlok nga tugotan ang Ginoo sa pagbadlong kanimo niining paagiha karong Kwaresma.
Pamalandongi karon ang mga bahin sa imong kinabuhi nga gustong hinloan ni Hesus. Tugoti Siya nga mosulti kanimo sa tin-aw ug lig-ong paagi aron matukmod ka sa paghinulsol. Gihigugma ka sa Ginoo sa hingpit nga gugma, ug gusto Niya nga mahinloan ang imong kinabuhi sa tanang sala.
Ginoo, nasayod ako nga makasasala ako ug nagkinahanglan sa Imong kaluoy ug, usahay, sa Imong balaang kapungot. Tabangi ako nga mapaubsanong modawat sa Imong mga pagbadlong nga naggikan sa gugma, ug nga motugot Kanimo sa pagwagtang sa tanang sala sa akong kinabuhi. Kaloy-i ako, minahal nga Ginoo. Nagpakiluoy ako Kanimo, kaloy-i ako. Hesus, misalig ako Kanimo.
Dugang pa alang sa Kwaresma>>>
40 ka Adlaw sa Tiilan sa Krus – Ikapulog-pitong Pamalandong – Pagsulod sa Jerusalem
Santos sa Adlaw – San Casimiro – Dili Obligadong Paghandum
Pagtagbaw sa Imong Kauhaw Pinaagi sa Tubig nga Buhi
Ikatulong Domingo sa Kwaresma, Tuig A
(Hinumdomi: Mahimong gamiton kining Ebanghelyo sa mga Tuig B & C kon ipahigayon ang mga rito sa pagsusi sa mga pinili alang sa bunyag)

“Dali kamo, tan-awa ninyo ang usa ka tawo nga misulti kanako sa tanan nakong nabuhat. Siya kaha ang Kristo?” Juan 4:29
Kini ang sugilanon sa usa ka babaye nga nakahimamat kang Hesus sa atabay. Miadto siya sa atabay sa kainit sa udtong tutok aron malikayan ang ubang mga babaye sa iyang lungsod. Nahadlok siya nga hukman siya nila kay makasasala siya. Didto sa atabay, nahimamat niya si Hesus. Nakigsulti si Hesus kaniya sa makadiyot, ug natandog pag-ayo ang iyang kasingkasing niining yano nga panag-istorya nga nakapausab sa iyang kinabuhi.
Ang unang angayng timan-an mao nga natandog na ang iyang kasingkasing sa pakigsulti pa lang ni Hesus kaniya. Samaritana siya, ug Judio si Hesus. Ang mga lalaking Judio dili makigsulti sa mga Samaritana. Apan may gisulti pa si Hesus nga nakatandog gayod kaniya. Sama sa gisulti mismo sa babaye, Siya “misulti kanako sa tanan nakong nabuhat.”
Ang nakapahingangha kaniya dili lamang kay nahibalo si Hesus sa tanan niyang nangagi, nga daw makabasa Siyag hunahuna o usa Siyang salamangkero. May mas lawom pa niining panagtagbo kaysa pagsulti lang ni Hesus kaniya sa tanan niyang mga sala kaniadto. Ang daw tinuod nga nakatandog kaniya mao nga bisan nasayod si Hesus sa tanan bahin kaniya, sa tanang sala sa iyang nangaging kinabuhi ug sa iyang mga relasyon nga naguba, gitratar gihapon siya ni Hesus uban sa dakong pagtahod ug pag-ila sa iyang dignidad. Bag-o kini nga kasinatian alang kaniya!
Makaseguro kita nga matag adlaw mabati niya ang kaulaw tungod sa pagtan-aw sa mga tawo sa iyang lungsod kaniya. Dili madawat sa mga tawo ang iyang paagi sa pagkinabuhi kaniadto ug bisan niadtong panahona. Gibati niya ang kaulaw tungod niini, ug sama sa nahisgotan na, mao kana ang hinungdan nga miadto siya sa atabay sa udtong tutok. Naglikay siya sa ubang mga tawo.
Apan anaa si Hesus. Nasayod Siya sa tanan bahin kaniya, apan gusto gihapon Niya siyang hatagan sa Tubig nga Buhi. Gusto Niya nga matagbaw ang kauhaw nga gibati sa kalag sa babaye. Samtang nakigsulti si Hesus kaniya ug nasinati niya ang kalumo ni Hesus ug ang pagdawat Niya kaniya, misugod pagkahupay ang iyang kauhaw. Nahupay kini kay ang gikinahanglan gayod niya, ug ang gikinahanglan natong tanan, mao ang hingpit nga gugma ug pagdawat nga gitanyag ni Hesus. Gitanyag Niya kini sa babaye, ug gitanyag usab Niya kini kanato.
Makapainteres nga sa paglakaw sa babaye, “gibiyaan niya ang iyang banga” daplin sa atabay. Wala gyod siya makakuha sa tubig nga iyang gituYo. O nakakuha ba kaha siya? Ang pagbiya niya sa banga sa atabay usa ka timaan nga natagbaw ang iyang kauhaw sa iyang pakighimamat kang Hesus. Wala na siya uhaw, labing menos sa espirituhanong bahin. Si Hesus, ang Tubig nga Buhi, maoy mitagbaw sa iyang kauhaw.
Pamalandongi karon ang kauhaw sa imong kinahiladman nga dili nimo ikalimod. Sa dihang mailhan na nimo kini, tinuyoang pilia nga tugotan si Hesus sa pagtagbaw sa imong kauhaw pinaagi sa Tubig nga Buhi. Kon buhaton mo kini, biyaan mo usab ang daghang “banga” nga makatagbaw lamang sa makadiyot.
Ginoo, Ikaw ang Tubig nga Buhi nga gikinahanglan sa akong kalag. Hinaot nga mahimamat ko Ikaw sa kainit sa akong adlaw, sa mga pagsulay sa kinabuhi, ug sa akong kaulaw ug pagbati sa sala. Hinaot nga niining mga higayona masinati ko ang Imong gugma, kalumo, ug pagdawat kanako, ug nga kana nga Gugma mahimong tuboran sa akong bag-ong kinabuhi diha Kanimo. Hesus, misalig ako Kanimo.
Dugang pa alang sa Kwaresma>>>
40 ka Adlaw sa Tiilan sa Krus – Ikapulog-pitong Pamalandong – Pagsulod sa Jerusalem
Santos sa Adlaw – San Casimiro – Dili Obligadong Paghandum



