Cebuano

Buot Ko Gayod Kini!

Domingo, Pebrero 11, 2018

Ikaunom nga Domingo sa Ordinaryong Panahon, Tuig B

Mga Pagbasa Karong Adlawa

Birhen sa Lourdes – Dili Obligadong Handumanan

Usa ka sanlahon miduol kang Hesus, miluhod ug nagpakiluoy kaniya, “Kon buot ka, makahimo ka sa paghinlo kanako.” Naluoy si Hesus, busa gituy-od niya ang iyang kamot, gihikap siya ug giingnan, “Buot ko gayod kini. Mahinlo ka.” Marcos 1:40-41

“Buot ko gayod kini.”  Kining upat ka mugbong pulong angay susihon ug pamalandongon pag-ayo.  Sa unang pagbasa, mahimong basahon nato kini sa hinanali ug dili nato mamatikdan ang kalawom ug kahulogan niini.  Mahimong modiretso lang kita sa butang nga buot ni Hesus nga mahitabo ug dili nato mamatikdan nga Siya mismo ang nagbuot niini.  Apan mahinungdanon ang Iyang pagbuot mismo.  Siyempre, mahinungdanon usab ang Iyang gibuot.  Dako kaayog kahulogan ang pag-ayo Niya sa usa ka sanlahon.  Tin-aw nga gipakita niini ang Iyang awtoridad ibabaw sa kinaiyahan.  Gipakita niini nga Siya makagagahom sa tanan.  Gipakita niini nga si Hesus makaayo sa tanang samad nga gisimbolo sa sanla.  Apan ayaw palabya kadtong upat ka pulong: “Buot ko gayod kini.”

Una sa tanan, ang tubag nga “Oo” usa ka sagradong tubag nga gigamit sa lainlaing higayon sa atong mga liturhiya aron ipahayag ang pagtuo ug pasalig. Gigamit kini sa kasal aron mapalig-on ang espirituhanong panaghiusa nga dili mabugto, ug sa bunyag ug sa ubang mga sakramento aron bag-ohon sa atubangan sa tanan ang atong pagtuo. Gigamit usab kini sa rito sa ordinasyon sa pari sa iyang paglitok sa iyang solemne nga mga saad. Ang pag-ingon og “Oo” maoy matawag natong “pulong nga naglihok.” Ang paglitok niini usa usab ka buhat, usa ka pagpili, usa ka pasalig, usa ka desisyon. Kini nga pulong adunay epekto sa atong pagkatawo ug sa matang sa tawo nga atong gitinguhang mamahimo.

Gidugang usab ni Jesus ang “…buot Ko.” Busa, dili lang kay naghimog personal nga pagpili o pasalig si Jesus bahin sa Iyang kaugalingong kinabuhi ug mga pagtuo. Hinunoa, ang Iyang mga pulong maoy usa ka buhat nga adunay gahom sa pag-usab sa kahimtang sa laing tawo. Sa Iyang pagbuot ug sa pagpatuman sa Iyang kabubut-on pinaagi sa Iyang mga pulong, dihay nahitabo. Dihay nausab. Usa ka buhat sa Diyos ang natuman.

Dako kaayog kaayohan alang kanato ang paggahin og panahon sa pagpamalandong niining mga pulonga ug sa ilang kahulogan sa atong kinabuhi. Kon isulti ni Jesus kanato kining mga pulonga, unsa man ang Iyang buot nga mahitabo? Unsa man kining Iyang gipasabot? Tino nga aduna Siyay piho nga kabubut-on alang sa atong kinabuhi, ug andam gayod Siyang motuman niini sa atong kinabuhi kon andam usab kitang maminaw niining mga pulonga.

Niining bahina sa Ebanghelyo, ang tawo nga may sanla andam kaayong modawat sa mga pulong ni Jesus. Miluhod siya sa Iyang atubangan isip timaan sa hingpit nga pagsalig ug pagtugyan. Andam siyang tugotan si Jesus nga molihok sa iyang kinabuhi. Labaw sa tanan, kining pagkaandam sa tawo sa pagdawat maoy nakaaghat kang Jesus sa paglitok niining mga pulong nga naglihok.

Ang sanla klarong timaan sa atong kaugalingong mga kahuyang ug sala. Klaro kining timaan sa atong tawhanong kinaiya nga nahulog sa sala ug sa atong pagkahuyang. Klaro kining timaan nga dili nato mamaayo ang atong kaugalingon. Klaro kining timaan nga nagkinahanglan kita sa Diyosnong Mananambal. Kon dawaton nato kining tanan nga kamatuoran, sama sa tawo nga may sanla, makaduol usab kita kang Jesus, makaluhod sa Iyang atubangan, ug makapakilooy Kaniya nga molihok sa atong kinabuhi.

Karong adlawa, pamalandonga ang mga pulong ni Jesus ug paminawa kon unsa ang Iyang gisulti kanimo pinaagi niini. Buot kini ni Jesus. Buot ba usab nimo kini? Ug kon buot nimo, andam ka bang moduol Kaniya ug manghangyo nga molihok Siya? Andam ka bang mangayo nga matuman ang Iyang kabubut-on ug modawat niini?

Ginoo, oo, buot ko gayod kini. Giila ko ang Imong balaang kabubut-on sa akong kinabuhi. Apan usahay huyang ug kulang ang akong kabubut-on. Tabangi ako nga lig-onon ang akong determinasyon nga moduol Kanimo matag adlaw, O Diyosnong Mananambal, aron masinati ko ang Imong gahom sa pag-ayo. Tabangi ako nga abli sa pagdawat sa bisan unsay Imong kabubut-on alang sa akong kinabuhi. Tabangi ako nga mahimong andam ug kinabubut-ong modawat sa Imong paglihok sa akong kinabuhi. Jesus, sa tinuod gayod, nagsalig ako Kanimo.

Dugang pa>>>

Santo sa Adlaw – Birhen sa Lourdes


Tulo ka maayong libro alang sa Kwaresma!

Mga Pamalandong sa Kwaresma ug Pasko sa Pagkabanhaw – Serye sa Matag Adlaw nga Katolikong Pamalandong

40 ka Adlaw sa Tiilan sa Krus – Usa ka Pagtan-aw nga Puno sa Gugma Gikan sa Kasingkasing sa Atong Mahal nga Inahan

Matag Adlaw nga Pamalandong sa Diyosnong Kalooy – 365 ka Adlaw Uban ni Santa Faustina

Dugang mga Kapanguhaan alang sa Kwaresma>>>