Miyerkoles, Mayo 30, 2018
Miyerkoles sa Ikawalong Semana sa Ordinaryong Panahon
Tanang Santos alang sa Adlaw Karon

“Nasayod kamo nga ang giilang mga magmamando sa mga Hentil naghari-hari kanila, ug ang ilang mga dagkong tawo nagpabati kanila sa ilang awtoridad. Apan dili kini angayng mahitabo taliwala kaninyo.” Marcos 10:42-43a
Giingon nga “ang hingpit nga gahom hingpit usab nga makadaot sa tawo!” Nagpasabot kini nga kon ang usa ka tawo gisaligan ug gahom ug awtoridad, dako ang tentasyon nga magpadako kini sa iyang ulo. Lisod gamiton ang awtoridad, ilabina ang awtoridad ibabaw sa uban, uban sa gugma ug pagpaubos. Lisod kaayo. Gipakita sa bersikulo sa ibabaw nga “ang mga magmamando sa mga Hentil naghariharian kanila, ug ang ilang mga punoan nagpabati kanila sa ilang awtoridad.” Giila dinhi ang hilig sa mga magmamando ug sa mga adunay awtoridad nga ipahibalo gyod sa uban kon kinsa ang nagbuot!
Apan gigamit ni Jesus kining pananglitan aron ipakita sa Iyang mga tinun-an nga kinahanglan sukwahi niini ang ilang buhaton. Sa dili madugay, hatagan sila ug dakong awtoridad. Dili kini awtoridad sa kalibotanong pagsabot. Dili sila mahimong mga pangulo sa gobyerno nga magmando sa nasod gamit ang ilang gahom. Hinuon, labaw pa kaayo niana ang awtoridad nga ilang madawat. Kini ang awtoridad sa pag-usab sa kinabuhi sa mga tawo hangtod sa kahangtoran. Gisalig kanila ang buluhaton sa pagsangyaw sa Pulong sa Diyos sa paagi nga mausab ang kasingkasing sa mga tawo ug magpabilin kanang kausaban. Apan aron magmalampuson sila niini, dili sila makasunod sa panig-ingnan sa mga pangulo sa kalibotan. Dili nila mahimong ipugos ang Ebanghelyo sa uban. Hinuon, kinahanglan silang magpaubos sa kinahiladman sa ilang kasingkasing ug mag-alagad tungod sa gugma. Mao ra kini ang paagi nga ang Ebanghelyo tinuod nga makausab sa kinabuhi sa mga tawo.
Daghan kitag makat-onan dinhi. Usa sa labing mahinungdanon mao ang paagi sa atong pagtagad sa usag usa, ilabina sa mga labing suod kanato. Sagad, hilig natong ipugos sa uban ang atong paagi ug ang atong gusto, sama sa buhaton sa usa ka gamhanan ug hakog nga hari. Gusto natong kita ang magbuot ug magsugo kon unsay buhaton sa uban. Apan kon gusto kitang mahimong tinuod nga mga pangulo nga naggamit sa tinuod nga awtoridad, kinahanglan natong masabtan nga gitawag kita sa pag-alagad uban sa pagpaubos. Kon dili, tingali “modaog” kita sa panaglalis o matuman ang atong gusto, apan dili nato mausab ang mga kasingkasing, hunahuna, ug kalag. Ug mao gayod kana ang angay natong tumong kanunay sa kinabuhi!
Mahimayaon ang paggamit sa awtoridad ni Kristo, ug mao kini ang angay natong paningkamotan. Hunahunaa kini. Mas maayo ba nga malipay sa lumalabay nga katagbawan sa pagkahimong amo dinhi ug karon, o mas maayo nga malipay sa pagkahibalo nga nakatabang ka sa pagbag-o sa kinabuhi sa laing tawo hangtod sa kahangtoran? Sa Langit, dili na igsapayan kon kinsa ang “nagbuot.” Ang mahinungdanon mao kon kang kinsa nga kinabuhi ang nausab tungod kay gigamit nato ang awtoridad nga makita sa pagpaubos ug pag-alagad.
Pamalandongi karong adlawa kon may hilig ka ba nga ikaw ang magbuot ug magharihari sa uban. Dayon hunahunaa ang panig-ingnan nga gipakita niining bahin sa Ebanghelyo. Pag-ampo nga hatagan ka sa atong Ginoo sa gasa sa pagpaubos aron mahimo kang alagad.
Ginoo, gusto gayod kong moalagad. Gusto kong moalagad Kanimo diha sa akong isigkatawo. Nag-ampo ako nga hatagan Mo ako ug pagpaubos aron magamit Mo ako isip instrumento sa Imong balaang awtoridad sa gugma. Jesus, misalig ako Kanimo.



