Cebuano

Paghalad sa Imong Kinabuhi

Domingo, Mayo 6, 2018

Ikaunom nga Domingo sa Pasko sa Pagkabanhaw, Tuig B

Mga Pagbasa Karong Adlawa

Tanang Santos alang sa Adlaw Karon

Flickr: Waiting for the Word

“Walay gugma nga labaw pa niini: ang paghalad sa kinabuhi alang sa iyang mga higala.”  Juan 15:13

Kasagaran sabton ang gugma ingong kusgan nga pagbati alang sa laing tawo.  Kon ang usa ka tawo madani pag-ayo sa usa ka tawo o butang, moingon siya nga “gihigugma” niya kini.  Apan gugma ba kini?  Gugma ba kini sa labing tinuod nga kahulogan?  Dili gayod.  May bahin gayod ang pagbati diha sa gugma, apan dili sa pagbati lamang kini nakagamot. 

Nan, unsa man ang gugma?  Ang gugma usa ka pagpili.  Sa tukmang pagkasulti, sumala sa gitudlo ni Hesus sa bahin sa Ebanghelyo sa ibabaw, ang gugma mao ang pagpili sa “paghalad sa kinabuhi alang sa iyang mga higala.” 

Daghang butang ang gipakita sa paghalad sa atong kinabuhi.  Una, gipakita niini nga ang kinaiya mismo sa gugma mao ang bug-os nga paghatag sa kaugalingon.  Dili mahimong tunga-tunga lang ang paghalad sa imong kinabuhi.  Gihalad mo kini o wala.  Nagpadayag kini nga ang gugma, aron mahimong gugma sa labing tinuod nga kahulogan, nagkinahanglan sa bug-os nga pagtugyan sa 100% sa imong kinabuhi. 

Gipadayag usab niining bahin sa Ebanghelyo nga ang gugma nagkinahanglan og sakripisyo.  Ang paghalad sa imong kinabuhi tin-awng nagpakita nga ang gugma nagkinahanglan og usa ka matang sa pagkamatay sa kaugalingon.  Kinahanglan nga unahon nato ang uban, nga ipatigbabaw ang ilang mga panginahanglan kay sa ato.  Nagkinahanglan kini og tinuod nga sakripisyo ug pagkamanggihatagon nga dili maghunahuna sa kaugalingon. 

Daghan kitag paagi sa paghalad sa atong kinabuhi alang sa uban.  Ang uban gagmay, ang uban dagko.  Labaw sa tanan, kinahanglan natong palambuon ang lawom nga pagpakabana sa kaayohan sa matag tawo.  Kon ipunting nato ang atong mga mata ug kasingkasing ngadto sa uban, magsugod kitag makakita og dili maihap nga mga paagi sa paghalad sa atong kinabuhi alang kanila.  Ang gagmayng buhat sa kaayo, mga pulong sa pagdasig, pagpaminaw, ug pagtabang sa usa ka buluhaton pipila lamang sa gagmayng paagi sa paghatag nato sa atong kaugalingon matag adlaw.  Ang mas dagkong buhat mahimong maglakip sa maisogong pagpasaylo, paghigugma bisan kon dili nato kini bation, pagpakitag kaluoy bisan kon daw dili kini angay sa modawat, ug pagpaningkamot nga makauban ug makasuporta sa usa ka tawo bisan kon puno ang atong eskedyul.

Ang hinungdanong punto mao kini: kon ihatag nato ang atong kaugalingon bisan hangtod nga masakitan kita, ang matag sakripisyo, gamay man o dako, mahimong panalangin alang kanila ug mahimayaong ganti alang kanato.  Ang kinabuhi nga andam mosakripisyo naghatag og katagbawan sa daghang paagi, ug alang gayod niini kita gibuhat.

Pamalandonga karong adlawa kon unsa ka hingpit ang imong paghalad sa imong kinabuhi alang sa uban, nga walay gitagana alang sa imong kaugalingon.  Ayaw pagduhaduha sa pagtugyan sa imong kaugalingon sa ingon kalawom nga gugma.  Sa bug-os nga paghatag sa imong kaugalingon, makaplagan nimo ang imong kaugalingon ug madiskobrehan ang presensya sa atong balaang Ginoo.

Ginoo, tabangi ako nga unahon ang uban.  Tabangi ako nga mahigugma bisan hangtod nga masakitan ako.  Ug nianang sakripisyo sa gugma, tabangi ako nga madiskobrehan ang gugma nga anaa sa Imong balaang kasingkasing.  Hesus, misalig ako Kanimo.

Dugang pa>>>