Cebuano

Ang Hustisya sa Dios

Lunes, Hunyo 4, 2018

Lunes sa Ikasiyam nga Semana sa Ordinaryong Panahon

Mga Pagbasa Karong Adlawa

Tanang Santos alang sa Adlaw Karon

“May usa pa siyay ikapadala, ang iyang pinalanggang anak. Gipadala niya kini kanila sa kataposan, nga naghunahuna, ‘Tahoron nila ang akong anak.’  Apan nag-ingnanay ang mga saop, ‘Mao kini ang manununod. Dali, patyon nato siya, ug maato ang panulondon.’ Busa ilang gidakop siya, gipatay, ug gilabay sa gawas sa ubasan. Busa unsa may buhaton sa tag-iya sa ubasan? Moabot siya, patyon niya ang mga saop, ug ihatag ang ubasan ngadto sa uban.”  Marcos 12:6-9

Niining bahina sa Ebanghelyo, makita nato ang tin-aw nga timaan sa hustisya sa Diyos!

Ang unang angay timan-an mao nga sa sinugdan milampos gyod ang mga daotang saop.  Nagpatay sila og sunod-sunod, ug sa dihang gipadala sa tag-iya sa ubasan ang iyang bugtong anak, gipatay usab nila kini sa pagtuo nga mapanunod nila ang ubasan. 

Klaro nga kini usa ka sugilanon bahin sa Amahan nga nagpadala sa Iyang Anak nganhi sa kalibotan.  Ang mga lider sa relihiyon niadtong panahona napuno sa kasina ug pangabugho ug gustong magpabilin sa gahom.  Busa gipatuman nila ang ilang daotang laraw ug gipatay si Jesus, sa paglaom nga mawagtang nila Siya isip Mesiyas ug bag-ong Hari sa Israel, ug sa ingon magpabilin sa ilang mga kamot ang gahom sa relihiyon.

Apan nalimot sila sa hustisya sa Diyos.  Sa kataposan, ang hustisya sa Diyos kanunayng modaog.  Husayon sa Diyos ang tanang butang ug ipakanaug Niya ang Iyang hustisya ug ipakita ang Iyang kaluoy sumala sa kasingkasing sa matag tawo. 

Nagpadayag kini og duha ka importanteng leksiyon alang kanato.  Una, usahay daw ang daotan ang modaog.  Masinati nato kini sa dili maihap nga mga paagi.  Masinati nato ang inhustisya, paglutos ug kasakit.  Usahay mawad-an kita og kadasig tungod kay daw nagmadaogon ang daotan sa atong palibot, ug mahimo kitang mahulog sa pagkawalay paglaom. 

Apan sa ingon nianang mga higayona, labaw sa tanan, kinahanglan natong hinumdoman nga hugot nga magkupot sa paglaom nga sa kataposan modaog ang diosnong hustisya!  Sa kataposan, ang Diyos ang modaog.  Ug sa kataposan, ang kataposang sangpotanan ra ang mahinungdanon.  Busa, kon tan-awon nato kini gikan sa panglantaw sa eternidad, ang mahinungdanon mao nga magpabilin kitang matinud-anon sa Diyos ug magpadayon sa paglaom diha Kaniya.  Kinahanglan maningkamot kita kanunay sa paglahos bisan pa sa bisan unsang daw inhustisya nga atong masugatan.  Oo, kon dasigon kita sa Diyos sa pag-atubang sa daotan dinhi ug karon, kinahanglan buhaton nato kini.  Apan hinumdoman usab nato nga, sa hingpit nga kaalam sa Diyos, adunay mga higayon nga nakita Niyang mas maayo nga tugotan una ang inhustisya nga mopatigbabaw.  Lisod kini sabton ug dawaton.  Apan kinahanglan magkupot kita sa paglaom nga sa kataposan magpabilin nga matinud-anon ang Diyos ug magmadaogon ang Iyang Kamatuoran.

Pamalandongi karon ang kataposang kadaogan sa hustisya sa Diyos. Kung mawad-an ka og kadasig tungod sa usa ka inhustisya o kalisdanan, paningkamoti nga ipunting ang imong pagtan-aw sa kataposang kadaogan diha kang Kristo. Hinumdomi nga sa kataposan ipatigbabaw sa Diyos ang hingpit nga hustisya. Nianang panahona, magpasalamat ka nga nagpabilin kang naglaom sa maong saad.

Ginoo, kon maguol ako ug mawad-an og kadasig, ug makasaksi sa pagpangdaog-daog ug inhustisya sa akong kinabuhi, tabangi ako nga motan-aw Kanimo ug dili mawad-an og paglaom. Hinaot nga kanunay akong maglaom Kanimo ug motuo sa Imong hingpit nga pagkamatinumanon. Hesus, mosalig ako Kanimo.

Dugang pa>>>