Cebuano

Ang mga Kahibulongan sa Gingharian sa Diyos

Domingo, Hunyo 17, 2018

Ika-onse nga Domingo sa Ordinaryong Panahon, Tuig B

Mga Pagbasa Karong Adlawa

Tanang Santos alang sa Adlaw Karon

“Ang Sambingay sa Magpupugas” ni Harold Copping

Si Hesus miingon sa panon sa mga tawo: “Ingon niini ang gingharian sa Diyos: sama kini sa usa ka tawo nga nagsabwag og binhi sa yuta. Matulog siya sa gabii ug mobangon sa adlaw, ug samtang nagpadayon kini, moturok ug motubo ang binhi, apan wala siya mahibalo kon giunsa kini pagkahitabo.” Marcos 4:26-27

Pagkanindot niining hulagway sa pagturok, pagtubo ug pagpamunga sa Gingharian sa Diyos taliwala kanato!

Buot sa Diyos nga moabot ang Iyang Gingharian.  Mao kini ang atong gipangayo sa pag-ampo sa Amahan Namo.  Unsay kahulogan sa atong pag-ampo nga moabot ang Iyang Gingharian?  Una, buot sa Diyos nga moanhi ug mopuyo sa atong sulod, ug magtukod sa Iyang Gingharian diha sa atong mga kasingkasing ug kalag.  Kinahanglan kitang mahimong buhing mga sakop sa Iyang Gingharian, ug Siya ang angay natong mahimong Hari ug Giya.

Ikaduha, nagpasabot kini nga ang Iyang mga balaod ug kabubut-on matuman dinhi sa atong kalibotan.  Nagpasabot kini nga kinahanglang bag-ohon sa grasya sa Diyos ang dagan sa katilingban, politika ug kultura, aron makaambit sa Iyang Gingharian ug makapamunga niini.  Aduna kitay angay buhaton!

Ikatulo, nagpasabot kini nga gipaabot nato ang kataposan ug mahimayaong pag-abot sa Iyang Gingharian, sa pagbalik ni Jesus nga puno sa himaya ug kahalangdon.  Sa kataposan, mausab ang tanang butang, ug ipahamtang sa Diyos ang Iyang kataposang paghukom sa kalibotan, nga magbag-o sa tanang butang. 

Apan ang gipadayag ilabina kanato sa bersikulo sa ibabaw mao ang “unsaon” kini pagkahitabo.  Gipadayag niini nga ang Gingharian sa Diyos anam-anam, hinayhinay ug sa milagrosong paagi nga mogamot.  Mahitabo kini sa atong kinabuhi, ug mahitabo usab kini sa atong kalibotan samtang kitang mga Kristohanon magpahinungod sa atong kaugalingon niining buluhaton. Sa kataposan sa panahon, mahitabo kini sa milagrosong paagi sa pagbalik ni Jesus.

Hunahunaa kining hulagway nga gihatag kanato ni Jesus.  Ang mag-uuma magtanom sa binhi, ug anam-anam kining moturok, motubo ug mamunga.  Samtang nagakahitabo kini, ang mag-uuma “wala mahibalo kon giunsa kini pagkahitabo.” 

Pamalandonga karon ang misteryosong mga paagi sa pagtukod sa Diyos sa Iyang Gingharian.  Labaw sa tanan, Siya ang nagdumala niini.  Apan kinahanglang buhaton nimo ang imong bahin.  Kinahanglang himoon nimong tabunok nga yuta ang imong kasingkasing ug ang kalibotan sa imong palibot.  Itanom ang binhi, bisbisi kini kon gikinahanglan, ug dayon tugoti ang Diyos nga mobuhat sa Iyang bahin.  Labaw pa kay ni bisan kinsa kanato, ang Diyos nagtinguha nga motungha ang Iyang Gingharian sa imong kinabuhi ug sa kalibotan.  Apan kon buhaton nimo ang imong bahin, mahingangha ka usab sa pagkakita nimo sa pagtubo sa mahimayaong buhat sa Iyang grasya.

Ginoo, tabangi ako nga mahimong tabunok nga yuta ang akong kasingkasing alang sa Imong Gingharian.  Tabangi ako nga motugot Kanimo sa pagpatubo sa Imong Gingharian sa akong kasingkasing ug nga mahimong instrumento sa maong Gingharian dinhi sa atong kalibotan.  Jesus, misalig ako Kanimo.

Dugang pa>>>