Cebuano

Paghikap kang Jesus

Domingo, Hulyo 1, 2018

Ikatrieseng Domingo sa Kasagarang Panahon, Tuig B

Mga Pagbasa Karong Adlawa

San Junípero Serra, Pari – Dili Obligadong Handumanan sa Estados Unidos

Miingon siya, “Kon makahikap lang ako sa Iyang mga bisti, mamaayo ako.”  Marcos 5:28

Ania ang panig-ingnan sa usa ka tawo nga miduol kang Jesus uban sa dakong pagtuo.  Makapainteres kining sugilanon kay gihatagan kita sa higayon nga masayran ang gihunahuna sa babaye. 

Kini nga babaye nag-antos pag-ayo sulod sa daghang katuigan.  Gisulayan niya ang tanan aron matambalan siya sa mga doktor.  Nahurot niya ang tanan niyang kabtangan.  Ug unya, niining makaluluoy nga kahimtang, midangop ang babaye kang Jesus uban sa pagtuo.

Tingali dako na ang iyang pagtuo sa tibuok niyang kinabuhi; wala kita masayod.  Ang atong nasayran mao nga tungod sa iyang pag-antos, napaubos siya pag-ayo ug wala na siyay laing kapilian.  Niining kahimtang sa pagpaubos, gibuhat niya ang buhaton sa bisan kinsang santos.  Migunit siya pag-ayo sa iyang pagtuo nga si Jesus mao ang tubag.  Sa dihang napakyas na ang tanang uban pa, dili siya pakyason ni Jesus.  Tingali wala siya masayod kon mamaayo ba ang iyang lawas, apan nasayod siya nga bisan unsa pay mahitabo, kinahanglan siyang moduol kang Jesus. 

Dako ang atong makat-onan niining sugilanon: kinahanglan nga sama kalalom ang atong pagsalig ug sama kalig-on ang atong pasalig nga moduol kang Jesus uban sa tibuok natong kinabuhi.  Bisan kon wala pa nato masulayi ang tanang ubang kapilian sa kinabuhi, kinahanglan natong tanan nga sundon ang pagpamatuod niining babaye.

Ang pagdangop kang Jesus uban sa lalom nga kasigurohan ug pagtuo nagpasabot nga nahibalo kita nga ang Iyang kabubut-on mao lamang ang mahinungdanon.  Nagpasabot kini nga pilion nato Siya labaw sa tanan ug sa matag kahimtang sa kinabuhi.  Nagpasabot kini nga dili lamang kita modangop Kaniya uban sa atong mga problema, kondili modangop usab kita Kaniya uban sa atong mga kalipay ug sa atong mga panalangin.  Ang tanan natong buhaton kinahanglan maggikan sa usa ka lalom ug lig-ong pagtuo sa atong kasingkasing nga si Jesus mao ang tubag sa tanan sa kinabuhi.

Tingali daw sobra ra kini paminawon.  Tingali naanad kita nga modangop lamang Kaniya kon daw mapakyas na kita sa tanan.  Apan dili unta ingon niana.  Gitawag kita sa pag-ugmad sa adlaw-adlaw nga batasan sa pagtinguha nga “makahikap sa Iyang mga bisti,” ingnon ta.  Kini usa ka paagi sa pag-ingon nga kinahanglan kanunay natong ipunting ngadto Kaniya ang atong kasingkasing, hunahuna, kabubut-on ug kalag.

Pamalandongi karong adlawa kon unsa na kalalom ang imong batasan sa pagdangop kang Jesus.  Siya ba ang una nimong gidayeg tungod sa imong mga panalangin?  Ug Siya ba ang una nimong gidangpan sa imong mga kahadlok ug pakigbisog?  Ugmara kini nga batasan sa imong kasingkasing ug makita nimo ang mga milagro sa grasya sa imong kinabuhi.

Ginoo, tabangi ako nga kanunayng moduol Kanimo sa tanang butang.  Tabangi ako nga mosalig Kanimo kon daw lisod ang kinabuhi ug daw nagkagubot ang tanan.  Tabangi usab ako nga moduol Kanimo sa tanang daghang panalangin nga akong madawat.  Jesus, misalig ako Kanimo.

Dugang pa>>>

Santos sa Adlaw – San Junípero Serra