Domingo, Hulyo 29, 2018
Ika-17 nga Domingo sa Ordinaryong Panahon, Tuig B

Paminaw sa Iningles
“Adunay batang lalaki dinhi nga may lima ka pan nga sebada ug duha ka isda; apan unsa ra man kini alang sa ingon kadaghan nga tawo?” Miingon si Hesus, “Palingkora ang mga tawo.” Juan 6:9-10a
Nakaatubang ka na ba og daw usa ka “imposibleng kahimtang?” Si Jesus nakaatubang usab niini, apan Iyang gipamatud-an nga mabuntog Niya ang bisan unsang daw babag nga buot Niyang buntogon. Tinuod, Siya ang Dios, apan ang kamatuoran nagpabilin nga mahimo Niya ang tanan nga Iyang buot. Ug mahimo usab Niya kini sa atong kinabuhi!
Ang maong tudling nagpakita nga si Hesus masaligon nga makahimo Siyang magpakaon sa linibo ka tawo pinaagi lamang sa lima ka pan ug duha ka isda. Sa tawhanong panglantaw, imposible kini, apan alang sa Dios, sayon ra kini.
Ang milagro ni Jesus nagpadayag sa Iyang pasalig nga “pakan-on kita” sa tanang paagi. Oo, kini usa ka pagpakaon og pagkaon, apan nagsimbolo kini sa Iyang katakos ug pagkaandam sa pag-amuma sa atong mga kalag pinaagi sa Iyang grasya aron maatubang nato ang bisan unsang kalisdanan o hagit nga moabot sa atong kinabuhi. Igo ang Iyang grasya!
Kasagaran, duha ka bahin ang problema. Una, makaatubang kita og usa ka hagit sa atong kinabuhi ug magtuo kita nga wala kita masayod kon unsaon kini pagbuntog. Mahimo kining mosangpot sa kawalay paglaom ug pagkadismaya. Apan kon mahitabo kini, kinahanglan natong pamalandungon ang mga milagro nga sama niini ug ilhon nga walay imposible alang sa Dios.
Ang ikaduhang problema nga sagad natong maatubang mao ang kalisod sa pag-ila sa kalainan tali sa kabubut-on sa Dios ug sa atong kaugalingong limitadong mga panghunahuna. Kasagaran kaayo, kita ra ang magbuot kon unsay atong gihunahuna nga maayo ug husto, ug mao kana ang sugdan natog ampo. Apan unsa kaha kon lahi kaayo ang gihunahuna ug gitinguha sa Dios ug, siyempre, labaw pa gayod kadako?! Unsa kaha kon ang Dios adunay plano nga dili gayod nato mahunahuna sa atong kaugalingon? Ang tinuod mao nga aduna gayod Siyay plano alang sa atong kinabuhi nga mas hingpit pa kay sa bisan unsa nga atong mahanduraw. Nasayod Siya kon unsay labing maayo alang kanato, ug makahimo Siyang motuman nianang planoha. Sa atong bahin, kinahanglan natong pangitaon ang maong plano, itugyan ang atong kaugalingon niini, ug mosalig sa Iyang hingpit nga gugma, kalooy, gahom ug gugma.
Pamalandongi karon ang imong kaugmaon. Unsa man ang daw labing nakapabalaka kanimo? Unsa man ang daw nagpuno kanimo sa kabalaka? Ang Dios adunay hingpit nga plano alang niana nga kahimtang. Ang imong buluhaton mao ang pagpangita niana nga plano ug pagsalig nga matuman kini.
Ginoo, nasayod ako nga mahimo Nimong buhaton ang tanang butang ug nga sa tanang butang ang maayo mao ang Imong gitinguha. Tabangi ako nga modangop Kanimo ug itugyan ang akong kaugalingon sa Imong hingpit nga diosnong kabubut-on. Sa akong pagtugyan sa kaugalingon niini, tabangi ako nga makabaton og hingpit nga pagtuo nga Imong tumanon ang Imong kabubut-on. Hesus, misalig ako Kanimo.
Santos sa Adlaw – Santa Marta – Handumanan



