Cebuano

Atong Bulahang Inahan

Martes, Hulyo 24, 2018

Martes sa Ika-16 nga Semana sa Ordinaryong Panahon

Mga Pagbasa Karong Adlawa

San Sharbel Makhluf, Pari ug Ermitanyo – Opsiyonal nga Handumanan

“Kinsa ang Akong inahan? Kinsa ang Akong mga igsoon?” Ug gituy-od Niya ang Iyang kamot ngadto sa Iyang mga tinun-an ug miingon, “Ania ang Akong inahan ug ang Akong mga igsoon. Kay bisan kinsa nga nagtuman sa kabubut-on sa Akong langitnong Amahan mao ang Akong igsoong lalaki, igsoong babaye, ug inahan.”  Mateo 12:48-50

Kini nga teksto naghatag og maanindot nga higayon sa paghisgot bahin sa Bulahang Birheng Maria.  Ang uban nga nagbasa niini mahulog sa sayop nga paghunahuna nga si Jesus daw nagpalayo sa Iyang kaugalingon gikan sa Iyang inahan.  Daw nagtuo sila nga ang Iyang gisulti wala magtagad sa talagsaong tahas ni Maria sa Iyang kinabuhi.  Wala nay mas layo pa sa kamatuoran kay niini.

Ang tinuod mao nga ang Iyang gisulti labaw sa tanan nagpamatuod sa pagka-inahan ni Maria.  Ngano man?  Kay naghisgot Siya kon unsaon sa usa ka tawo pagkahimong tinuod nga sakop sa Iyang pamilya.  Ug mahitabo kini kon ang usa ka tawo “magbuhat sa kabubut-on sa akong Amahan sa langit.” 

Pamalandongi kana nga mga pulong.  Kinsa pa man ang mas hingpit nga nagtuman sa kabubut-on sa Langitnong Amahan?  Kinsa pa man ang mas masinugtanon sa tanang butang kay sa Bulahang Birhen?  Wala gayod.  Hingpit ang iyang pagkamasinugtanon sa tibuok niyang kinabuhi ug, busa, hingpit niyang natuman ang gikinahanglan aron mahimong sakop sa pamilya ni Jesus.

Usa sa angay natong makat-onan gikan niini nga teksto mao nga ang relasyon sa atong Bulahang Inahan kang Jesus iyang gikinabuhi sa duha ka ang-ang.  Una, anaa ang pisikal nga pagka-inahan nga gipanalangin kaniya.  Kini usa ka talagsaong grasya, ug tungod niini angay siyang hatagan og dakong dungog.  Apan ang iyang pisikal nga pagka-inahan dili mao ang pangunang hinungdan sa iyang pagkabulahan.  Ang pangunang hinungdan naggikan sa iyang espirituhanong pagka-inahan.  Ug kining espirituhanong pagka-inahan makita sa teksto sa ibabaw.  Kini bunga sa iyang hingpit nga “Oo” ngadto sa Dios sa tanang butang.  Kini ang pangunang hinungdan nga angay siyang pasidunggan ug tawgong “bulahan” sa tanang kaliwatan.

Pamalandongi karon ang tahas sa atong Bulahang Inahan sa imong kinabuhi.  Buot sa Dios nga pasidunggan nimo siya, sundogon siya, ug himoon siyang kabahin sa imong pamilya.  Buot Niya nga dawaton nimo siya isip imong espirituhanong inahan sanglit sakop ka sa pamilya ni Jesus.  Kon maningkamot ka sa pagsunod sa kabubut-on sa Amahan sa imong kinabuhi, makaambit ka usab sa mga panalangin sa Iyang kinabuhi.  Usa niining dagkong mga panalangin mao nga ang Iyang inahan mahimong imong inahan usab.

Ginoo, tinguha gayod nako nga mosunod Kanimo ug sa Imong kabubut-on sa tanang butang.  Tinguha nako nga dawaton sa tibuok kasingkasing ang hingpit nga plano sa Amahan alang sa akong kinabuhi.  Diha sa maong kabubut-on, tabangi ako nga makaambit sa Imong diosnong kinabuhi ug mahimong hingpit nga sakop sa Imong pamilya.  Nianang pamilyaha, tabangi ako sa pagdawat sa Imong inahan isip akong kaugalingong inahan.  Pinalanggang Inahan, iampo ako.  Hesus, misalig ako Kanimo.

Dugang pa>>>

Santos sa Adlaw – San Sharbel Makhluf