Domingo, Septiyembre 2, 2018
Ikakawhaan ug Duha nga Domingo sa Ordinaryong Panahon, Tuig B
Tanang Santos alang sa Adlaw Karon

Paminaw sa Iningles
Gipatawag niya pag-usab ang panon sa katawhan ug giingnan sila, “Pamati kamong tanan kanako ug sabta kini. Walay bisan unsang mosulod sa tawo gikan sa gawas nga makahugaw kaniya; ang mga butang nga mogula gikan sa sulod mao ang makahugaw kaniya.” Marcos 7:14-15
Gisulti ni Jesus kining mga pulonga human Niya tawga ang mga Pariseo nga “mga tigpakaaron-ingnon.” Gibadlong Niya sila tungod kay sobra silang nabalaka sa mga butang nga makita sa gawas apan napakyas sa pagtagad sa anaa sa sulod. Giklaro ni Jesus nga ang daotan naggikan sa sulod ug nga ang kasingkasing mao ang angay natong hatagan sa tinuod nga pagtagad.
Ang nakapukaw sa kusog nga pagbadlong ni Jesus sa mga Pariseo mao ang ilang pagsaway sa mga tinun-an tungod kay wala sila manghunaw ug busa nangaon sila nga “hugaw ang mga kamot.” Ang makapasubo mao nga daw gipadako kaayo sa mga Pariseo kining butanga. Nagpadayag kini nga daw nagtuo ang mga Pariseo nga ang pagkabalaan makab-ot pinaagi sa hilabihan ka estriktong pagsunod sa gawasnong mga lagda ug kostumbre niadtong panahona. Apan wala nila makita ang kahinungdanon sa anaa sa sulod.
Si Santa Teresa sa Ávila adunay duha ka matahom nga mga kinutlo nga naghisgot sa kahinungdanon sa anaa sa sulod. “Sa imong sulod nagpuyo ang imong Diyos. Sulod sa imong kaugalingon, tan-awa Siya, pakigsulti Kaniya, paminawa Siya ug pagpabilin uban Kaniya diha sa imong kasingkasing.” Ug, “Sa pagkatinuod, anaa sa atong sulod ang langit kay anaa didto ang Ginoo sa Langit.”
Gipaila usab ni Hesus ang mga matang sa kadaotan nga nagagikan sa sulod. “Gikan sa sulod sa tawo, gikan sa iyang kasingkasing, mogula ang daotang mga hunahuna, pakighilawas, pagpangawat, pagpatay, panapaw, kahakog, pagkamadinaoton, pagpanglimbong, kaulag, kasina, pagpasipala sa Dios, pagkamapahitas-on ug kabuang. Kining tanang kadaotan nagagikan sa sulod ug makahugaw sa tawo.” Marcos 7: 21-23.
Busa, unsa may anaa sa imong kasingkasing? Kon mogahin ka og panahon nga mag-inusara ug sa kahilom mosusi sa imong kinabuhi, unsa may imong makita? Unsa man ang naglangkob sa imong sulodnong kinabuhi?
Pamalandongi karong adlawa ang anaa sa sulod. Hibaloi nga ang bisan unsang sala sa imong kasingkasing kinahanglan ilhon, ikumpisal ug hinloan. Human lamang niini nimo mahimamat ang Diyos nga nagpuyo sa imong sulod. Nianang higayona lamang nimo matugotan ang Diyos sa pagbag-o sa imong gawasnong kinabuhi pinaagi sa Iyang presensiya diha sa imong kalag.
Ginoo, naghangyo ako nga mosulod Ka sa akong kasingkasing. Pasigaa ang akong kasingkasing sa kalayo sa gugma alang Kanimo. Hinloi ang akong kasingkasing sa tanang sala ug tugoti nga mosidlak ang Imong diosnong presensya aron makita sa tanan. Hesus, misalig ako Kanimo.



