Cebuano

Mituo Na Kami

Domingo, Agosto 26, 2018

Ikakawhaan ug Usa nga Domingo sa Ordinaryong Panahon, Tuig B

Mga Pagbasa Karong Adlawa

Tanang Santos alang sa Adlaw Karon

Paminaw sa Iningles

Tungod niini, daghan sa iyang mga tinun-an ang mibalik sa ilang kanhing pagkinabuhi ug wala na mouban kaniya. Unya miingon si Hesus sa Napulog Duha, “Buot ba usab kamong mobiya?” Mitubag si Simon Pedro kaniya, “Magtutudlo, kang kinsa man kami moadto? Anaa kanimo ang mga pulong sa kinabuhing dayon. Mituo na kami ug nasiguro namo nga ikaw mao ang Balaan sa Dios.”  Juan 6:66-69

Tungod sa unsa?  Tungod sa pagtulon-an ni Jesus bahin sa Eukaristiya, “daghan sa iyang mga tinun-an ang mibalik sa ilang kanhing paagi sa pagkinabuhi ug wala na mouban kaniya.”  Ang Eukaristiya mao ang labing lawom ug labing matahom nga pagtulon-an nga gihatag ni Jesus, apan alang sa uban, lisod kaayo kini dawaton.  Busa daghan ang mibiya Kaniya.  Apan kini nga teksto nagpadayag usab sa matahom nga pagtuo sa mga Apostoles, ilabina ni Pedro.

Una sa tanan, wala gayod moatras si Hesus sa Iyang matahom ug lalom kaayong pagtulon-an bahin sa Balaang Eukaristiya.  Mibarog Siya sa Iyang gisulti: “Kon dili kamo mokaon sa unod sa Anak sa Tawo ug moinom sa iyang dugo, wala kamoy kinabuhi diha sa inyong kaugalingon” (Juan 6:53).  Mipadayon Siya sa pag-ingon, “Kay ang akong unod tinuod nga pagkaon ug ang akong dugo tinuod nga ilimnon” (Juan 6:55).

Human niini, miatubang si Hesus sa Iyang mga tinun-an ug gihatagan sila sa kagawasan sa pagdawat o pagsalikway sa bag-o pa Niyang gitudlo.  Kining kagawasan nga Iyang gihatag kanila gikinahanglan aron makabaton sila og tinuod nga pagtuo.  Kon gipugos o gimaniobra pa ni Hesus ang mga tinun-an, maglisod unta sila sa gawasnong pagpili sa pagdawat Kaniya ug sa tanan Niyang gitudlo. 

Ingon usab niana kanato.  Wala kita pugsa ni Hesus sa pagsunod Kaniya.  Dili Siya mamugos o momaniobra kanato aron motuo kita.  Dili kita Niya pugson.  Hinuon, gitanyag ni Hesus ang Iyang kaugalingon ug ang Iyang mga pagtulon-an, ug gidapit kita Niya sa pagtuo. 

Niining kahimtanga, si Pedro mihimo og usa ka lawom nga pahayag sa pagtuo.  “Ginoo, kang kinsa man kami moadto?”  Sa laing pagkasulti, mao kini ang buot ipasabot ni Pedro, “Ginoo, bisan kon lisod dawaton ang pagtulon-an, ug bisan kon dili inila sa kadaghanan ang pagsunod kanimo, ug bisan kon kinahanglan kaming mag-antos, isalikway, ug dili sabton…ikaw ang labing maayong kapilian.”  Hunahunaa kini.  Unsa pa mang laing kapilian ang makatupong sa pagdawat sa bug-os ug lawom nga mga pagtulon-an ni Jesus?  Mas maayo ba nga bahin lamang sa Iyang gisulti ang dawaton?  Ang pagbuhat niana usa ka matang sa pagsalikway Kaniya.

Si Pedro naghatag kanato og pamatuod isip usa ka tawo nga mituo nga usa ra ang maayong kapilian sa kinabuhi.  Kana mao ang pagpili sa pagsunod kang Hesus bisan unsay mahitabo.  Walay bisan unsa sa kinabuhi nga angay pilion labaw kang Kristo.  Maningkamot kita sa pagsabot niining kamatuoran: Siya lamang ang angay natong pilion labaw sa tanan. 

Pamalandongi karong adlawa kining mga pulong ni Pedro:  “Ginoo, kang kinsa man kami moadto?”  Si Hesus mao ang Dios, ang Mesiyas ug Manluluwas.  Anaa Kaniya ang mga pulong sa kinabuhing dayon.  Siya ang labing maayong “kapilian.”  Isulti kadtong mga pulong ni Pedro, ug sa pagsulti nimo niini, pilia Siya, popular man o dili kana nga pagpili, ug pilion man Siya sa uban o dili.  Ang pagpadala lang sa sulog magdala kanato ngadto sa sayop nga suba.  Ang hustong pagpili magpabarog kanato sa lig-ong yuta.

Ginoo, wala na akoy laing paingnan kondili Ikaw ug ang Imong dalan.  Ikaw ang Ginoo sa tanan ug Ikaw ang Mesiyas.  Gipili ko Ikaw ug gidawat ko ang tanan Mong gitudlo.  Hesus, misalig ako Kanimo.

Dugang pa>>>