(Pahinumdom: Sa pipila ka diyosesis, gisaulog karong adlawa ang Dakong Kapistahan sa Corpus Christi. Sa Tinipong Bansa, ang pagsaulog sa Corpus Christi gibalhin ngadto sa Domingo.)
Hunyo 11, 2020
Huwebes sa Ikanapulong Semana sa Kasagarang Panahon
Mga Basahon Alang sa Adlaw nga Kini
San Bernabe, Apostol—Handumanan

Paminaw sa Iningles
“Pakighusay dayon sa imong kaatbang samtang nagpaingon pa kamo sa hukmanan. Kay kon dili, itugyan ka sa imong kaatbang ngadto sa maghuhukom, ug itugyan ka sa maghuhukom ngadto sa guwardiya, ug itambog ka sa bilanggoan. Amen, sultihan ko ikaw, dili ka makagawas hangtod nga mabayran mo ang kataposang sentimos.” Matthew 5:25-26
Makahadlok kanang hunahunaon! Sa sinugdan, morag nagpakita kini nga sugilanon nga walay kaluoy bisan gamay. “Dili ka buhian hangtod nga mabayran na nimo ang kataposang sentimo.” Apan sa pagkatinuod, usa kini ka buhat sa dakong gugma.
Ang mahinungdanon dinhi mao nga gusto ni Jesus nga makig-uli kita Kaniya ug sa usag usa. Sa piho, gusto Niya nga mawala sa atong mga kalag ang tanang kasuko, kapaitan ug pagdumot. Mao nga miingon Siya, “Pakighusay dayon sa imong kaatbang samtang nagpaingon pa kamo sa hukmanan.” Sa laing pagkasulti, pangayo og pasaylo ug pakig-uli sa dili ka pa moatubang sa lingkoranan sa paghukom sa balaanong hustisya.
Ang hustisya sa Dios hingpit nga matagbaw kon magpaubos kita, mangayo og pasaylo sa atong mga sayop, ug sinserong maningkamot sa pagtul-id sa atong nabuhat. Pinaagi niini, mabayran na ang matag “sentimos.” Apan ang dili dawaton sa Dios mao ang pagpagahi sa kasingkasing. Ang pagpagahi sa kasingkasing usa ka bug-at nga sala nga dili mapasaylo gawas kon biyaan kini. Labing angay kabalak-an ang pagpagahi sa kasingkasing pinaagi sa pagdumili sa pag-angkon sa atong sayop diha sa usa ka panagbangi. Ang pagpagahi sa atong kasingkasing pinaagi sa pagdumili sa pag-usab sa atong mga pamaagi angay usab kabalak-an pag-ayo.
Ang silot mao nga ipatuman sa Dios ang Iyang hustisya kanato hangtod nga maghinulsol na gayod kita. Ug usa kini ka buhat sa gugma ug kalooy sa Dios tungod kay ang Iyang paghukom gipunting ilabina sa atong sala, nga mao lamang ang nagbabag sa atong paghigugma sa Dios ug sa uban.
Ang pagbayad sa kataposang sentimos mahimo usab nga tan-awon isip usa ka hulagway sa Purgatoryo. Gisultihan kita ni Jesus nga usbon ang atong kinabuhi karon, nga magpasaylo ug maghinulsol karon. Kon dili nato kini buhaton, kinahanglan gihapon natong atubangon kadtong mga sala human sa kamatayon, apan mas maayo gayod nga buhaton kini karon.
Pamalandongi karon kon unsa ang kinahanglan nimong “husayon sa imong kaatbang.” Kinsa ang imong kaatbang? Kinsa ang imong gikahiubosan karon? Pag-ampo nga ipakita sa Dios kanimo ang dalan aron mahigawas ka nianang palas-ana ug makatagamtam ka sa tinuod nga kagawasan!
Ginoo, tabangi ako sa pagpasaylo ug sa pagkalimot sa mga sala sa uban batok kanako. Tabangi ako sa pagsusi kon unsay nakababag kanako sa hingpit nga paghigugma Kanimo ug sa tanan nakong isigkatawo. Putlia ang akong kasingkasing, O Ginoo. Hesus, misalig ako Kanimo.
Nobena sa Mahal nga Kasingkasing ni Hesus
Mga petsa sa nobena: Hunyo 10–18, 2020
Hunyo 19, 2020: Dakong Kapistahan sa Mahal nga Kasingkasing ni Hesus
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Bernabe, Apostol
Dakong Kasaulogan sa Labing Balaang Lawas ug Dugo ni Kristo
Mga Kapilian sa mga Basahon sa Misa
Hulagway: Ang Kataposang Paghukom ni Fra Angelico




