Hunyo 12, 2020
Biyernes sa Ikanapulong Semana sa Kasagarang Panahon
Mga Basahon Alang sa Adlaw nga Kini

Paminaw sa Iningles
“Kon ang imong tuong mata maoy hinungdan nga makasala ka, ibta kini ug ilabay. Mas maayo pa nga mawad-an ka og usa ka bahin sa imong lawas kay sa itambog ang imong tibuok lawas ngadto sa Gehena. Ug kon ang imong tuong kamot maoy hinungdan nga makasala ka, putla kini ug ilabay.” Matthew 5:29-30a
Mao ba gayod kini ang gipasabot ni Jesus? Sa literal nga paagi?
Makasiguro kita nga kining makapakurat nga pinulongan dili usa ka literal nga sugo, kondili usa ka simbolikong pamahayag nga nagsugo kanato sa paglikay sa sala uban sa dakong kadasig, ug sa paglikay sa tanang butang nga modala kanato ngadto sa sala. Ang mata mahimong sabton ingong bintana sa atong kalag, diin nagpuyo ang atong mga hunahuna ug mga tinguha. Ang kamot mahimong tan-awon ingong simbolo sa atong mga buhat. Busa, kinahanglan natong wagtangon ang matag hunahuna, pagbati, tinguha ug buhat nga modala kanato ngadto sa sala.
Ang tinuod nga yawe sa pagsabot niining teksto mao ang pagtugot nga matandog kita sa gamhanang pinulongan nga gigamit ni Jesus. Dili Siya magpanuko sa pagsulti sa makapakurat nga paagi aron ipadayag kanato ang tawag sa pag-atubang uban sa dakong kadasig sa bisan unsang modala sa sala sa atong kinabuhi. “Ibta kini…putla kini,” miingon Siya. Sa laing pagkasulti, wagtanga sa hingpit ang imong sala ug ang tanang modala kanimo ngadto sa sala. Ang mata ug ang kamot dili makasasala sa ilang kaugalingon; hinuon, niining simbolikong pinulongan, gihisgotan sila ingong mga butang nga modala ngadto sa sala. Busa, kon adunay mga hunahuna o mga buhat nga modala kanimo ngadto sa sala, kini ang angay nimong tutokan ug wagtangon.
Mahitungod sa atong mga hunahuna, usahay tugotan nato ang atong kaugalingon nga magdugay pag-ayo sa paghunahuna niini o niana. Tungod niini, kining mga hunahuna mahimong modala kanato ngadto sa sala. Ang yawe mao ang “pag-ibot” sa unang hunahuna nga nagpatungha sa daotang bunga.
Mahitungod sa atong mga buhat, usahay ibutang nato ang atong kaugalingon sa mga kahimtang nga motintal kanato ug modala ngadto sa sala. Kining mga higayon nga makapahinabo sa sala kinahanglang putlon gikan sa atong kinabuhi.
Pamalandongi karong adlawa kining direkta ug gamhanang pinulongan sa atong Ginoo. Tugoti nga ang kusog sa Iyang mga pulong magdasig kanimo sa pagbag-o ug sa paglikay sa tanang sala.
Ginoo, nagbasol ako sa akong sala ug nangayo ako sa Imong kaluoy ug pasaylo. Palihog tabangi ako sa paglikay sa tanang makatultol kanako sa pagpakasala ug sa pagtugyan Kanimo sa tanan nakong hunahuna ug binuhatan matag adlaw. Hesus, misalig ako Kanimo.
Nobena sa Mahal nga Kasingkasing ni Hesus
Mga petsa sa nobena: Hunyo 10–18, 2020
Hunyo 19, 2020: Dakong Kapistahan sa Mahal nga Kasingkasing ni Hesus
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway: Si Hesus Naglingkod sa Baybayon ug Nagwali ni James Tissot
Daily Reflections for Ordinary Time:
Weeks 1-17





