Cebuano

Corpus Christi

Domingo, Hunyo 14, 2020

Dakong Kasaulogan sa Labing Balaang Lawas ug Dugo ni Kristo

Mga Pagbasa Karong Adlawa

Paminaw sa Iningles

“Ako ang buhing pan nga mikunsad gikan sa langit; bisan kinsa nga mokaon niining pan mabuhi hangtod sa kahangtoran; ug ang pan nga akong ihatag mao ang akong unod alang sa kinabuhi sa kalibotan.” Juan 6:51 (Tuig A)

Malipayong Solemnidad sa Labing Balaang Lawas ug Dugo, Kalag ug Pagka-Diyos ni Jesu-Kristo, atong Ginoo ug Diyos!  Pagkadakong Gasa ang atong gisaulog karon!

Ang Eukaristiya mao ang tanan.  Anaa niini ang tanang butang, ang kahingpitan sa kinabuhi, ang kaluwasan nga walay kataposan, kalooy, grasya, kalipay, ug uban pa.  Nganong ang Eukaristiya mao kining tanan ug labaw pa niini?  Sa yano nga pagkasulti, ang Eukaristiya MAO ang Diyos.  Mao gayod kana.  Busa, ang Eukaristiya mao ang tanan nga mao ang Diyos.

Sa iyang matahom nga tradisyonal nga himno nga “Adoro te Devote,” misulat si Santo Tomas de Aquino, “Maunongon akong nagsimba Kanimo, O tinagong Diyos, nga tinuod nga natago ilalom niining mga panagway.  Ang tibuok kong kasingkasing nagpasakop Kanimo, ug sa pagpamalandong Kanimo, hingpit kini nga nagtugyan sa iyang kaugalingon.  Ang panan-aw, paghikap, ug pagtilaw masayop sa ilang paghukom bahin Kanimo, apan igo na ang pagpamati aron motuo sa malig-on nga paagi…”  Pagkatahom niining pagpahayag sa pagtuo niining kahibulongang gasa!

Kini nga pagpahayag sa pagtuo nagpadayag nga sa dihang magsimba kita atubangan sa Eukaristiya, ang Diyos Mismo ang atong gisimba, nga natago ilalom sa panagway sa pan ug bino.  Nalimbongan ang atong mga igbalati.  Ang atong makita, matilawan ug mabati wala magpadayag sa tinuod nga anaa sa atong atubangan.  Ang Eukaristiya mao ang Diyos.

Kon nagdako kita isip mga Katoliko, gitudloan kita sa tibuok natong kinabuhi sa pagtahod sa Eukaristiya.  Apan dili igo ang “pagtahod.”  Kadaghanan sa mga Katoliko nagtahod sa Eukaristiya: motuhod kita sa usa ka tuhod isip pagtahod, moluhod kita, ug nagpakita kitag pagtahod sa Balaang Ostiya.  Apan importante nga pamalandongon nimo sa imong kasingkasing kining pangutanaha.  Nagtuo ka ba nga ang Eukaristiya mao ang Diyos nga Labing Gamhanan, ang Manluluwas sa kalibotan, ang Ikaduhang Persona sa Labing Balaang Trinidad?  Lawom ba ang imong pagtuo nga mapukaw ang imong kasingkasing sa gugma ug lawom nga debosyon matag higayon nga anaa ka sa atubangan sa atong Ginoo, nga anaa gayod sa atong taliwala ilalom sa tabil sa Eukaristiya?  Sa dihang moluhod ka, naghapa ka ba diha sa imong kasingkasing, nga nagmahal sa Diyos sa tibuok mong pagkatawo?

Tingali alang kanimo morag sobra ra kini.  Tingali igo na alang kanimo ang yanong pagtahod ug pagpasidungog.  Apan dili kana igo.  Tungod kay ang Eukaristiya mao ang Diyos nga Makagagahom sa Tanan, kinahanglan nga makita nato Siya didto pinaagi sa mga mata sa pagtuo diha sa atong kalag.  Kinahanglan nga simbahon nato Siya sa kinahiladman sa atong kasingkasing sama sa gibuhat sa mga anghel sa Langit.  Kinahanglan nga mosinggit kita, “Balaan, Balaan, Balaan ang Ginoong Diyos nga Makagagahom sa Tanan.”  Kinahanglan nga mapukaw kita ngadto sa labing lawom nga pagsimba samtang mosulod kita sa Iyang diosnong presensya.

Pamalandongi karon ang kalalom sa imong pagtuo sa Eukaristiya ug paningkamoti nga bag-ohon kini, nga magsimba sa Diyos isip usa nga nagtuo sa tibuok mong pagkatawo.

Mapahinunguron akong nagsimba Kanimo, O Diyos nga natago, tinuod nga natago ilalom niining mga panagway.  Ang tibuok kong kasingkasing nagpasakop Kanimo, ug sa pagpamalandong Kanimo, bug-os kining nagtugyan sa kaugalingon.  Ang panan-aw, paghikap, ug pagtilaw malimbongan sa ilang paghukom mahitungod Kanimo, apan ang pagpaminaw igo na aron motuo nga lig-on.  Jesus, nagsalig ako Kanimo.

Nobena sa Sagrado nga Kasingkasing
Mga petsa sa nobena: Hunyo 10–18, 2020
Hunyo 19, 2020: Dakong Kapistahan sa Sagrado nga Kasingkasing

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Dugang nga Basahon – Corpus Christi

Hulagway: Alegorya sa Eukaristiya