Pagduhaduha

September 30, 2020
Wednesday of the Twenty-Sixth Week in Ordinary Time
Readings for Today

San Jeronimo, Pari ug Doktor sa Simbahan—Handumanan

Ug ang usa pa miingon, “Mosunod ako Kanimo, Ginoo, apan tugoti una ako nga manamilit sa akong pamilya sa balay.” Gitubag siya ni Jesus, “Walay tawo nga mogunit sa daro ug molingi sa iyang gibiyaan nga takos sa Gingharian sa Dios.”  Lucas 9:61-62

Ang tawag ni Jesus walay kondisyon.  Sa dihang motawag Siya kanato, angay kitang motubag uban sa hingpit nga pagtugyan sa atong kabubut-on ug sa dakong pagkamanggihatagon. 

Sa Kasulatan sa ibabaw, kabubut-on sa Dios nga kining tawhana mosunod dayon ug sa hingpit kang Jesus.  Apan nagduhaduha ang maong tawo ug miingon nga gusto una siyang mopauli aron manamilit sa iyang pamilya.  Daw makataronganon man kana nga hangyo.  Apan giklaro ni Jesus nga gitawag siya sa pagsunod Kaniya dihadiha ug sa walay pagduhaduha.

Dili gayod kini tungod kay adunay daotan sa iyang tinguha nga manamilit sa iyang pamilya.  Lagmit mao usab kana ang gipaabot sa iyang pamilya.  Apan gigamit ni Jesus kining higayona aron ipakita kanato nga ang atong unang prayoridad mao ang pagtubag sa Iyang tawag, sa dihang motawag Siya, sa paagi nga Siya motawag, ug tungod kay Siya ang nagtawag.  Niining talagsaon ug misteryosong tawag sa pagsunod kang Cristo, kinahanglan nga andam kitang motubag sa walay pagduhaduha.

Hunahunaa kon lahi pa ang tubag sa usa sa mga tawo niining sugilana.  Hunahunaa kon ang usa kanila miduol kang Jesus ug miingon, “Ginoo, mosunod ako Kanimo ug andam ug kinabubut-on akong mosunod Kanimo karon dayon sa walay bisan unsang kondisyon.”  Mao kana ang labing maayong tubag.  Ug, oo, radikal gayod kana nga hunahuna.

Sa atong kaugalingong kinabuhi, lagmit dili kita makadawat sa radikal nga tawag nga biyaan gayod dayon ang tanan ug moalagad kang Cristo sa usa ka bag-ong kahimtang sa kinabuhi.  Apan ang labing mahinungdanon mao ang atong pagkaandam sa pagtubag!  Andam ka ba?

Kon andam ka, magsugod ka sa pag-ila nga si Jesus nagtawag kanimo matag adlaw aron tumanon ang Iyang misyon.  Ug kon andam ka, makita nimo matag adlaw nga ang Iyang misyon mahimayaon ug mabungahon nga dili masukod.  Sa yano nga pagkasulti, ang gikinahanglan mao ang imong pag-ingon og “Oo” sa walay pagduhaduha ug sa walay paglangan.

Pamalandongi karon ang imong pagkaandam sa pagsunod kang Jesus.  Ibutang ang imong kaugalingon niining hitaboa sa Kasulatan ug pamalandongi kon unsaon nimo pagtubag kang Jesus.  Lagmit makakita ka og pagduhaduha.  Ug kon makakita ka og pagduhaduha sa imong kasingkasing, paningkamoti nga itugyan kana Kaniya aron maandam ka alang sa tanan nga gitagana sa atong Ginoo alang kanimo.

Lord, I do love You and I do want to follow You.  Help me to overcome any and every hesitation in my life in saying “Yes” to Your holy will.  Help me to discern Your voice and embrace all You say every day.  Jesus, I trust in You.

Ikasiyam nga Adlaw: Nobena kang Santa Teresita sa Lisieux – Ang Gamayng Bulak

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Jeronimo, Pari ug Doktor sa Simbahan

Mga Kapilian sa mga Basahon sa Misa

Image: The Man at the Plough by James Tissot