Oktubre 24, 2020
Sabado sa Ika-29 nga Semana sa Ordinaryong Panahon
Mga Pagbasa Karong Adlawa
San Antonio Maria Claret, Obispo—Opsyonal nga Handumanan

Paminaw sa Iningles
“‘Tulo na ka tuig nga mianhi ako aron mangitag bunga niining kahoyng igos, apan wala gayod akoy nakit-an. Busa putla kini. Nganong pasagdan pa man kini nga mag-usik sa katambok sa yuta?’ Siya mitubag kaniya, ‘Sir, pasagdi lang una kini niining tuiga, ug akong ugmaron ang yuta sa palibot niini ug butangan og abono; tingali mamunga pa kini sa umaabot. Kon dili, mahimo na nimong putlon kini.’” Luke 13:7-9
Kini usa ka hulagway nga kasagarang nagpakita sa kahimtang sa atong mga kalag. Kasagaran sa kinabuhi, mahimong mahigot kita sa naandang mga batasan nga walay pag-uswag, ug maglisod ang atong relasyon sa Diyos ug sa uban. Tungod niini, diyutay ra o wala gayoy maayong bunga ang atong kinabuhi.
Tingali dili ingon niini ang imong kahimtang karon, apan tingali mao usab kini. Tingali lig-on ang pagkagamot sa imong kinabuhi diha kang Kristo, o tingali naglisod ka pag-ayo. Kon naglisod ka, sulayi pagtan-aw ang imong kaugalingon ingong kining kahoyng igos. Ug sulayi pagtan-aw nga si Jesus Mismo ang mipasalig sa “pag-ugmad sa yuta sa palibot niini ug pagbutang og abono.”
Mahinungdanong timan-an nga si Jesus wala motan-aw niining kahoyng igos ug mosalikway niini nga daw walay pulos. Siya ang Diyos nga naghatag og laing higayon, ug mipasalig Siya sa pag-atiman niining kahoyng igos aron mahatagan kini sa tanang gikinahanglang kahigayonan nga mamunga. Ingon usab niana ang Iyang pag-atiman kanato. Dili gayod kita basta na lang isalikway ni Jesus, bisan unsa pa kita kalayo nga nahisalaag. Kanunay Siyang andam ug kinabubut-ong moduol aron motabang kanato sa mga paagi nga atong gikinahanglan, aron ang atong kinabuhi mamunga pag-usab og daghan.
Pamalandongi karon kon gibati ba nimo nga kinahanglan nimong tugotan si Jesus nga “mag-ugmad sa yuta” sa imong palibot. Ayaw kahadlok sa pagtugot Kaniya nga hatagan ka sa sustansiyang imong gikinahanglan aron mamunga pag-usab og daghang maayong bunga ang imong kinabuhi.
Ginoo, nasayod ako nga kanunay kong gikinahanglan ang Imong gugma ug pag-atiman sa akong kinabuhi. Nagkinahanglan ako sa Imong pag-amuma aron makapamunga ako sa bunga nga Imong gitinguha gikan kanako. Tabangi ako nga bukas sa mga paagi nga buot Nimong amumahon ang akong kalag, aron matuman ko ang tanan Nimong laraw alang kanako. Hesus, misalig ako Kanimo.
Mga Pag-ampo & Mga Kapanguhaan alang sa Eleksiyon sa Estados Unidos
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Antonio Maria Claret, Obispo
Mga Kapilian sa mga Basahon sa Misa
Hulagway: Ang Tig-atiman sa Paras ug ang Kahoyng Igos ni James Tissot




