Nobyembre 3, 2020
Martes sa Ika-31 nga Semana sa Ordinaryong Panahon
Mga Basahon alang sa Adlaw Karon
San Martin de Porres, Relihiyoso—Opsiyonal nga Paghandum

Paminaw sa Iningles
“May usa ka tawo nga nag-andam ug dakong kombira ug nagdapit ug daghang tawo. Sa dihang miabot na ang takna sa kombira, iyang gisugo ang iyang sulugoon sa pagsulti sa mga dinapit, ‘Dali na kamo, kay andam na ang tanan.’ Apan silang tanan, tagsa-tagsa, nagsugod sa pagpangatarongan aron dili motambong.” Lucas 14:16-18a
Mas kanunay kini mahitabo kay sa atong mahunahuna sa sinugdan! Giunsa man kini pagkahitabo? Mahitabo kini matag higayon nga dapiton kita ni Jesus sa pag-ambit sa Iyang grasya, apan puliki ra kaayo kita o natanggong sa ubang mga butang nga giisip natong mas “importante.”
Pananglitan, sayon ra kaayo alang sa daghan ang pagtuyo nga dili motambong sa Misa sa Domingo. Dili maihap ang mga pasangil ug mga pangatarongan nga gamiton sa mga tawo aron pakamatarongon ang ilang dili pagtambong sa Misa usahay. Niining sambingay, ang Kasulatan nagpadayon sa pagsugilon bahin sa tulo ka tawo nga nangatarongan nga dili sila makatambong sa kombira tungod sa mga “maayong” rason. Ang usa bag-o lang nakapalit ug uma ug kinahanglang moadto aron susihon kini. Ang usa bag-o lang nakapalit ug mga baka ug kinahanglang atimanon kini. Ug ang usa bag-o lang naminyo ug kinahanglang mouban sa iyang asawa. Silang tulo nagtuo nga maayo ang ilang mga rason, busa wala sila motambong sa kombira.
Ang kombira mao ang Gingharian sa Langit. Apan makita usab kini sa matag paagi nga gidapit ka sa pag-ambit sa grasya sa Diyos: sa Misa sa Domingo, sa mga higayon sa pag-ampo matag adlaw, sa pagtuon sa Bibliya nga angay nimong apilan, sa pakigpulong sa misyon nga angay nimong tambongan, sa basahon nga angay nimong basahon o sa buhat sa gugmang putli nga gusto sa Diyos nga imong buhaton. Sa matag paagi nga gitanyag kanimo ang grasya, gidapit ka sa kombira sa Diyos. Ikasubo nga sayon ra kaayo alang sa uban ang pagpangitag pasangil aron balibaran ang pagdapit ni Kristo sa pag-ambit sa Iyang grasya.
Pamalandongi karon ang Diyos nga moduol kanimo ug modapit kanimo sa mas hingpit nga pag-ambit sa Iyang kinabuhi sa grasya. Giunsa ka Niya pagdapit? Sa unsang paagi ka Niya gidapit sa pag-ambit nga mas hingpit? Ayaw pagpangitag pasangil. Dawata ang pagdapit ug apil sa kombira.
Ginoo, tabangi ako nga makita ang daghang paagi sa Imong pagtawag kanako sa mas hingpit nga pag-ambit sa Imong kinabuhi sa grasya ug kaluoy. Tabangi ako nga mailhan ang kombira nga giandam alang kanako ug nga unahon ko Ikaw kanunay sa akong kinabuhi. Jesus, misalig ako Kanimo.
Mga Pag-ampo & Mga Kapanguhaan alang sa Eleksiyon sa Estados Unidos
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Martin de Porres, Relihiyoso
Mga Kapilian sa mga Basahon sa Misa
Hulagway sa ibabaw: Sambingay sa Kombira sa Kasal ni Andrey Mironov



