Cebuano

Pagpili sa Diyos Labaw sa Tanan

Nobyembre 4, 2020
Miyerkoles sa Ika-31 nga Semana sa Ordinaryong Panahon
Mga Basahon alang sa Adlaw Karon

San Carlos Borromeo, Obispo—Handumanan

Paminaw sa Iningles

“Kon may moduol kanako ug dili magdumot sa iyang amahan ug inahan, sa iyang asawa ug mga anak, sa iyang mga igsoong lalaki ug babaye, ug bisan sa iyang kaugalingong kinabuhi, dili siya mahimong akong tinun-an.”  Lucas 14:26

Dili, wala kini masayop.  Gisulti gayod kini ni Jesus.  Mabug-at kining pahayag, ug prangka kaayo ang paggamit sa pulong nga “magdumot” dinhi.  Busa unsa man gayod ang kahulogan niini?

Sama sa tanang gisulti ni Jesus, kinahanglang basahon kini subay sa tibuok mensahe sa Ebanghelyo.  Hinumdomi nga si Jesus miingon nga ang labing dakong sugo ug ang nahauna mao kini: “Higugmaa ang Ginoo nga imong Diyos sa tibuok mong kasingkasing…”  Miingon usab Siya, “Higugmaa ang imong silingan sama sa imong kaugalingon.” Ang pamilya apil gayod niini.  Apan sa mga pulong sa ibabaw, nadungog nato si Jesus nga nag-ingon kanato nga kon may bisan unsa nga makababag sa atong paghigugma sa Diyos, kinahanglan nato kining tangtangon sa atong kinabuhi.  Kinahanglan nato kining “dumtan.”

Ang “pagdumot” dinhi dili mao ang sala sa pagdumot.  Dili kini kasuko nga motubo sa atong kasingkasing hangtod nga dili na nato mapugngan ang atong kaugalingon ug makasulti kita ug masakit nga mga pulong.  Hinuon, ang “pagdumot” dinhi nagpasabot nga kinahanglan andam ug kinabubut-on kitang mopahilayo sa bisan unsang makababag sa atong relasyon sa Diyos.  Kon kuwarta, dungog, gahom, mga pangibog sa unod, ilimnong makahubog, o uban pa ang babag, kinahanglan nato kining tangtangon sa atong kinabuhi.  Makapakurat man, adunay uban nga makaamgo nga kinahanglan silang mopahilayo bisan sa ilang kaugalingong pamilya aron magpabiling buhi ang ilang relasyon sa Diyos.  Apan bisan niining kahimtanga, gihigugma gihapon nato ang atong pamilya.  Usahay lahi lang ang paagi sa pagpakita sa gugma.

Gituyo ang pamilya nga mahimong dapit sa kalinaw, panag-uyon ug gugma.  Apan ang makapasubong kamatuoran nga nasinati sa daghan mao nga usahay ang atong mga relasyon sulod sa pamilya direktang makababag sa atong paghigugma sa Diyos ug sa uban.  Ug kon mao kini ang atong kahimtang, kinahanglan nato nga paminawon si Jesus nga nag-ingon kanato nga, tungod sa atong gugma sa Diyos, lahi na ang angay natong paagi sa pagpakigrelasyon kanila.

Tingali usahay masayop ang pagsabot ug paggamit niining bahin sa Kasulatan.  Dili kini pasangil sa pagtratar sa mga sakop sa pamilya o ni bisan kinsa uban sa pagdumot, kapintas, daotang tuyo o uban pang susama niini.  Dili usab kini pasangil nga pasagdan natong modako ang kasuko sa atong kasingkasing.  Hinuon, tawag kini sa Diyos nga molihok kita uban sa hustisya ug kamatuoran, ug dili motugot nga adunay bisan unsa nga mobulag kanato sa gugma sa Diyos.

Pamalandongi karon kon unsa ang kinadak-ang babag sa imong relasyon sa Diyos.  Kinsa o unsa ang nagpahilayo kanimo sa paghigugma sa Diyos sa tibuok mong kasingkasing?  Hinaot nga walay tawo o butang nga nakababag kanimo.  Apan kon aduna, paminawa karon ang mga pulong ni Jesus nga nagdasig kanimo nga magmalig-on ug nagtawag kanimo nga unahon Siya labaw sa tanan sa imong kinabuhi.

Ginoo, tabangi ako nga kanunayng makita ang mga butang sa akong kinabuhi nga nakababag sa akong paghigugma Kanimo.  Sa akong pag-ila kon unsay nakababag sa akong pagtuo, hatagi ako sa kaisog sa pagpili Kanimo labaw sa tanan.  Hatagi ako sa kaalam aron masayod ako unsaon pagpili Kanimo labaw sa tanan.  Jesus, misalig ako Kanimo.

Mga Pag-ampo & Mga Kapanguhaan alang sa Eleksiyon sa Estados Unidos

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Charles Borromeo, Obispo

Mga Kapilian sa mga Basahon sa Misa

Hulagway sa ibabaw: Ang Pagtambag sa mga Apostoles ni James Tissot