Nobyembre 18, 2020
Miyerkoles sa Ika-33 nga Semana sa Ordinaryong Panahon
Mga Basahon sa Adlaw
Dedikasyon sa mga Basilika nila San Pedro ug San Pablo, mga Apostoles—Opsiyonal nga Handumanan
Santa Rose Philippine Duchesne, Birhen—Opsiyonal nga Handumanan sa USA

Paminaw sa Iningles
“Sultihan ko kamo, ang matag usa nga aduna, hatagan pa ug dugang, apan ang walay iya, bisan ang anaa kaniya kuhaon pa. Mahitungod niadtong akong mga kaaway nga dili buot nga ako mahimong ilang hari, dad-a sila dinhi ug patya sa akong atubangan.” Luke 19:26-27
Sus, dili diay basta-basta madala-dala si Hesus! Wala Siya magpanuko sa Iyang gisulti niining sambingay. Dinhi makita nato kon unsa kaseryoso ang atong Ginoo sa pagtagad sa mga tawo nga nagbuhat supak sa Iyang balaang kabubut-on.
Una, kini nga mga pulong mao ang panapos sa sambingay sa mga talanton. Tulo ka sulugoon ang gihatagan ug tag-usa ka sensilyong bulawan. Gigamit sa una ang sensilyo aron makaganansiya ug napulo pa, ang ikaduha nakaganansiya ug lima pa, ug ang ikatulo walay laing gibuhat gawas sa pag-uli sa sensilyo sa pagbalik sa hari. Kining sulugoon mao ang gibadlong tungod kay wala siyay gibuhat sa sensilyong bulawan nga gihatag kaniya.
Ikaduha, sa dihang milakaw kining hari aron dawaton ang iyang pagkahari, dihay pipila nga dili buot nga siya mahimong hari ug misulay sa pagpugong sa iyang pagkoronar. Sa iyang pagbalik ingong bag-ong gikoronahang hari, iyang gipatawag kadtong mga tawhana ug gipapatay sa iyang atubangan.
Kasagaran ganahan kitang maghisgot sa kalooy ug kaayo ni Jesus, ug husto kana. Ang Iyang kaayo ug kalooy dili masukod. Apan Siya usab usa ka Diyos sa tinuod nga hustisya. Niini nga sambingay, makita nato ang hulagway sa duha ka pundok sa mga tawo nga nakadawat sa balaang hustisya.
Una, anaa kadtong mga Kristohanon nga wala magpakaylap sa Ebanghelyo ug wala magpaambit sa ilang nadawat. Wala silay gibuhat aron mapalambo ang ilang pagtuo ug, tungod niini, mawala ang gamayng pagtuo nga anaa kanila.
Ikaduha, anaa kadtong direktang misupak sa pagkahari ni Kristo ug sa pagtukod sa Iyang Gingharian dinhi sa yuta. Sila kadtong naningkamot sa daghang paagi sa pagtukod sa gingharian sa kangitngit. Ang kataposang sangpotanan niining ilang pagkadaotan mao ang ilang hingpit nga kalaglagan.
Pamalandongi karon kon unsa ka seryoso ang gipangayo sa Ebanghelyo. Ang pagsunod kang Jesus ug ang pagtukod sa Iyang Gingharian dili lamang usa ka dakong dungog ug kalipay, kondili usa usab ka kinahanglanon. Usa kini ka sugo sa gugma gikan sa atong Ginoo, ug seryoso kaayo kini alang Kaniya. Busa, kon lisod alang kanimo ang pag-alagad Kaniya sa tibuok mong kasingkasing ug ang pagtugyan sa imong kaugalingon sa pagtukod sa Gingharian tungod lamang sa gugma, buhata kini bisan tungod lang kay kini usa ka katungdanan. Ug kini usa ka katungdanan nga sa kataposan paninglan sa atong Ginoo ang matag usa kanato.
Ginoo, hinaot nga dili ko gayod usikan ang grasya nga Imong gihatag kanako. Tabangi ako nga kanunayng maningkamot sa pagtukod sa Imong balaang Gingharian. Ug tabangi ako nga isipon kining buhata nga usa ka kalipay ug dungog. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
Pagpahinungod sa mga Basilika sa mga Santos nga Apostoles Pedro ug Pablo
Usab:
Santa Rose Philippine Duchesne, Birhen
Mga Kapilian sa mga Basahon sa Misa



