Nobyembre 19, 2020
Huwebes sa Ika-33 nga Semana sa Ordinaryong Panahon
Mga Basahon sa Adlaw

Paminaw sa Iningles
Sa nagkaduol na si Jesus sa Jerusalem, nakita Niya ang siyudad ug mihilak Siya tungod niini, nga nag-ingon, “Kon nahibalo ka lamang niining adlawa kon unsay makahatag kanimo og kalinaw—apan karon natago kini gikan sa imong mga mata.” Lucas 19:41-42
Lisod mahibaloan sa tukma kon unsay nahibaloan ni Jesus mahitungod sa kaugmaon sa katawhan sa Jerusalem. Apan nasayod kita, gikan niining tekstoha, nga ang Iyang nahibaloan nakapahilak Kaniya sa kasubo. Ania ang pipila ka mga punto nga angay pamalandongan.
Una, mahinungdanon nga atong tan-awon ang hulagway ni Jesus nga naghilak. Ang pag-ingon nga mihilak si Jesus nagpasabot nga dili kini usa lamang ka gamayng kasubo o kapakyasan. Hinunoa, nagpasabot kini og hilabihan kalalom nga kasubo nga nakapatulo gayod sa Iyang mga luha. Busa sugdi niana nga hulagway ug tugoti nga motuhop kini sa imong kasingkasing.
Ikaduha, naghilak si Jesus tungod sa Jerusalem kay, samtang nagkaduol Siya ug klaro na Niyang nakita ang siyudad, dihadiha nasayod Siya nga daghan kaayong tawo ang mosalikway Kaniya ug sa Iyang pagduaw. Mianhi Siya aron dad-on kanila ang gasa sa walay kataposang kaluwasan. Makapasubo nga ang uban wala manumbaling kang Jesus tungod sa ilang pagkawalay pagtagad, samtang ang uban nasuko pag-ayo Kaniya ug nagtinguha sa Iyang kamatayon.
Ikatulo, wala lamang maghilak si Jesus tungod sa Jerusalem. Naghilak usab Siya tungod sa tanang tawo, ilabi na niadtong mahimong kabahin sa Iyang pamilya sa pagtuo. Sa partikular, mihilak Siya tungod sa kakulang sa pagtuo nga Iyang nakita nga maanaa sa daghan kaayong tawo. Tin-aw kaayong nahibalo si Jesus niini, ug nakapasubo kini Kaniya pag-ayo.
Pamalandongi karon ang seryosong tentasyon nga giatubang natong tanan: ang pagkawalay pagtagad kang Cristo. Sayon alang kanato ang pagbaton og gamayng pagtuo ug ang pagdangop sa Diyos kon makaayo kini kanato. Apan sayon usab kaayo nga magpabiling walay pagtagad kang Cristo kon daw maayo ang dagan sa atong kinabuhi. Dali kitang mahulog sa lit-ag sa paghunahuna nga dili kinahanglan nga itugyan nato ang atong kaugalingon Kaniya matag adlaw sa labing hingpit nga paagi nga atong mahimo. Ibta gikan sa imong kasingkasing karon ang bisan unsang pagkawalay pagtagad kang Cristo ug sultihi Siya nga gusto nimong alagaran Siya ug ang Iyang balaang kabubut-on sa tibuok mong kasingkasing.
Ginoo, nagpakilooy ako Kanimo nga ibton Mo sa akong kasingkasing ang tanang pagkawalay pagpakabana. Samtang naghilak Ka tungod sa akong sala, hinaot nga hugasan ug putlion ako sa Imong mga luha aron bug-os kong ikatugyan ang akong kaugalingon Kanimo, ang akong Balaang Ginoo ug Hari. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Mihilak si Hesus, dibuho ni James Tissot




