Huwebes, Nobyembre 26, 2020
USA: Adlaw sa Pagpasalamat—Dili Obligadong Handumanan
(Sa mga nasod gawas sa USA, tan-awa ang pamalandong alang sa Huwebes sa Ikakatloan ug Upat nga Semana)
Tan-awa ang among mga kapanguhaan alang sa Adbiyento!

Paminaw sa Iningles
Si Jesus mitubag, “Dili ba napulo man ang nangahinloan? Hain man ang laing siyam? Wala bay mibalik aron magpasalamat sa Dios gawas niining langyaw?” Luke 17:17-18
Malipayong Adlaw sa Pagpasalamat! Bisan tuod ang Adlaw sa Pagpasalamat dili espesipikong usa ka balaang adlaw sa Simbahang Katolika, nahiuyon gayod kini sa atong kinabuhi sa pagtuo. Sa espirituhanong bahin, kitang tanan nahibalo nga ang pagkamapasalamaton anaa sa kinauyokan sa mensahe sa Ebanghelyo. Ang Adlaw sa Pagpasalamat naghatag kanato og labing maayong higayon sa pagsusi niining piho nga bahin sa atong pagtuo. Gitawag kita nga magmapasalamaton sa kahangtoran ug sa kinahiladman sa atong kasingkasing. Unsa ka dako ang imong pagkamapasalamaton sa Dios?
Tingali kitang tanan naglisod sa pagkamapasalamaton sa nagkalainlaing paagi. Makataronganon nga moingon nga dili gayod mahimong hingpit ang atong pagkamapasalamaton hangtod nga mahingpit kita sa Langit. Apan karon, importante nga susihon nato ang atong pagkamapasalamaton ug maningkamot nga motubo kini sa atong mga kalag.
Una, dili gayod kita mahimong mapasalamaton kon dili nato makita sa tin-aw ang tanan nga gibuhat sa Dios alang kanato. Sayon kaayo sa kinabuhi nga magpunting sa tanang kalisdanan nga atong giatubang ug, tungod niini, mawad-an og kadasig, masulob-on, mahigawad ug usahay masuko pa gani. Mas lisod nga molantaw lapas sa mga krus ug palas-anon nga atong giatubang matag adlaw aron makita ang kadagaya sa grasya ug kalooy nga gihatag kanato sa atong Ginoo. Kon dili nato makita kana nga kalooy ug grasya, maglisod gayod kita sa tinuod nga pagkamapasalamaton.
Busa niining Adlaw sa Pagpasalamat, pamalandongi kining yano nga pangutana: Nakita ba nako ang tanan nga gibuhat sa Dios alang kanako? Nakita ba nako nga buhi sa akong kinabuhi ang Iyang madagayaong kalooy? Ang teksto sa Ebanghelyo sa ibabaw nagpadayag nga giayo ni Jesus ang napulo ka sanlahon, apan usa lamang sa napulo ang mibalik aron magpasalamat. Sama ka ba sa usa sa siyam nga wala magpasalamat? Kon mao, lagmit naglisod ka sa pag-ila sa tanang tinuod ug madagayaong panalangin gikan sa Dios. Kon mapaubsanon nimong maangkon nga naglisod ka sa hingpit nga pagkamapasalamaton, nahimo na nimo ang unang lakang aron makakita sa mas tin-aw ug ang unang lakang sa pagpalambo sa mas lawom nga pagkamapasalamaton nga angay nimong batonan. Ang pagkamapasalamaton nagpasabot nga tin-aw nimong nakita ang kamatuoran. Ablihi ang imong kaugalingon niana nga kamatuoran ug usbon sa Dios ang imong kinabuhi samtang pun-on ka Niya sa kalipay!
Ginoo, palihog pun-a ang akong kasingkasing sa dakong pagpasalamat. Tabangi ako sa pagtutok sa Imong walay kinutobang grasya ug kalooy. Tabangi ako nga makakita lapas sa mga pakigbisog sa kinabuhi ug sa mga palas-anon nga makapaluya kanako. Imbes nga magtutok niini, tabangi ako nga mas makamatikod pa sa tanan Mong nabuhat alang kanako ug sa tanan Mong padayong ginabuhat. Hesus, misalig ako Kanimo.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapilian sa mga Basahon sa Misa
(Sa mga nasod gawas sa USA, tan-awa ang pamalandong alang sa Huwebes sa Ikakatloan ug Upat nga Semana)




