Disyembre 2, 2020
Miyerkoles sa Unang Semana sa Adbiyento
Mga Basahon Karong Adlawa

Paminaw sa Iningles
Unya gikuha niya ang pito ka buok pan ug ang mga isda, nagpasalamat, gipikaspikas ang mga pan, ug gihatag kini sa mga tinun-an, nga maoy nanghatag niini ngadto sa panon sa katawhan. Nangaon silang tanan ug nangabusog. Gitigom nila ang nahibiling mga tipik—pito ka bukag nga puno. Mateo 15:36–37
Kini nga linya nagtapos sa asoy ni Mateo bahin sa ikaduhang milagro sa pagpadaghan sa mga pan ug mga isda. Niini nga milagro, gipadaghan ang pito ka pan ug pipila ka isda aron mapakaon ang 4,000 ka lalaki, wala pay labot ang mga babaye ug mga bata. Ug sa dihang nakakaon na ug nangabusog ang tanan, pito ka bukag nga puno ang nahibilin.
Lisod pakamenoson ang epekto niining milagroha sa mga tawo nga didto gayod niadtong higayona. Tingali daghan kanila ang wala gani masayod kon diin gikan ang pagkaon. Nakita lamang nila ang mga bukag nga gipasa-pasa, mikuha sila og igo nga makabusog kanila, ug gipasa ang nahibilin ngadto sa uban. Bisan tuod daghan kitag mahinungdanong leksiyon nga makuha gikan niining milagroha, atong pamalandongan ang usa niini.
Hinumdomi nga ang katawhan nagpabiling kauban ni Jesus sulod sa tulo ka adlaw nga walay pagkaon. Nahingangha sila Kaniya samtang nagtudlo Siya ug padayong nag-ayo sa mga masakiton diha sa ilang atubangan. Sa pagkatinuod, dako kaayo ang ilang katingala nga wala silay gipakitang timailhan nga mobiya Kaniya, bisan pa sa kagutom nga dayag nga ilang gibati. Kini usa ka matahom nga hulagway sa angay natong paningkamotang maangkon sa atong sulodnong kinabuhi.
Unsa may “makapahingangha” kanimo sa kinabuhi? Unsa may imong mahimo sulod sa daghang oras nga dili mawala ang imong pagtagad? Alang niining unang mga tinun-an, ang ilang pagkaila sa mismong Persona ni Jesus mao ang adunay ingon niining epekto kanila. Ikaw kaha? Nasinati na ba nimo nga ang pagkaila kang Jesus diha sa pag-ampo, sa pagbasa sa Balaang Kasulatan, o pinaagi sa pagpamatuod sa laing tawo nakadani pag-ayo kanimo hangtod nga ang imong tibuok pagtagad natuon sa Iyang presensiya? Natutok na ba pag-ayo ang imong tibuok pagkatawo sa atong Ginoo nga halos wala ka nay laing gihunahuna?
Sa Langit, ang atong walay kataposang kinabuhi igugol sa walay hunong nga pagsimba ug “pagkahingangha” sa himaya sa Dios. Ug dili gayod kita kapoyon sa pagpakig-uban Kaniya ug sa pagtahod nga may kahingangha Kaniya. Apan dinhi sa Yuta, kanunay kaayo natong malimtan ang milagrosong paglihok sa Dios sa atong kinabuhi ug sa kinabuhi sa mga tawo sa atong palibot. Hinuon, kanunay kaayo nga ang atong tibuok pagtagad matuon sa sala, sa mga epekto sa sala, sa kasakit, sa eskandalo, sa pagkabahinbahin, sa pagdumot ug sa mga butang nga mosangpot sa pagkawalay paglaom.
Pamalandongi karong adlawa kining unang mga tinun-an ni Jesus. Ilabinang palandonga ang ilang katingala ug dakong pagtahod samtang nagpabilin silang kauban Niya sulod sa tulo ka adlaw nga walay pagkaon. Kini nga pagdani sa atong Ginoo kinahanglan motuhop ug mopuno sa imong tibuok pagkatawo sa ingon nga si Jesus lamang ang bugtong sentro sa imong kinabuhi. Ug kon Siya na ang sentro, ang tanan mahimutang sa hustong dapit ug ang atong Ginoo motagana sa imong daghan pang ubang panginahanglan.
Ginoo ko ug Diyos, gihigugma Ko Ikaw ug nagtinguha nga mas higugmaon pa Ikaw. Pun-a ako sa kahibulong ug balaang pagtahod Kanimo. Tabangi ako nga mangandoy Kanimo labaw sa tanang butang ug diha sa tanang butang. Hinaot nga molalom pag-ayo ang akong paghigugma Kanimo aron makasalig ako Kanimo sa tanang panahon. Tabangi ako, minahal kong Ginoo, nga himoon Ikaw nga sentro sa tibuok nakong kinabuhi. Hesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Ang Wali sa mga Bulahan ni James Tissot
Mga Pamalandong sa Adbiyento ug Pasko
Libro nga humok og hapin & Elektronikong libro
Amazon.com – Google Play – iTunes – Barnes and Noble





