Cebuano

Usa ka Kahibulongang Kamatuoran

Huwebes, Disyembre 17, 2020
Adlaw sa Semana sa Adbiyento
Mga Basahon sa Adlaw

Mga Antipona nga “O” sa Adbiyento
Disyembre 17–23

Paminaw sa Iningles

Si Eleazar mao ang amahan ni Matan, si Matan mao ang amahan ni Jacob, ug si Jacob mao ang amahan ni Jose, ang bana ni Maria. Gikan kaniya natawo si Jesus nga gitawag og Kristo. Mateo 1:15–16

Ang kataposang linya sa teksto sa Ebanghelyo sa ibabaw naghatag kanato og daghang butang nga mapamalandongan karong adlawa ug sa tibuok umaabot nga semana. “Gikan kaniya natawo si Jesus nga gitawag og Kristo.” Pagkakahibulongan gayod sa kamatuoran nga atong gisaulog! Ang Dios Mismo miangkon sa atong tawhanong kinabuhi, nasinati Niya ang pagpanamkon, pagkatawo, pagkamasuso, pagkabata, ug uban pa. Isip tawo, nasinati usab Niya ang pagdumot, pag-abuso, paglutos, ug pagpatay Kaniya. Sa makausa pa, pagkakahibulongan gayod sa kamatuoran nga atong gisaulog!

Sa mosunod nga walo ka adlaw, ang mga pagbasa sa Misa mas direktang magpunting niining kahibulongang kamatuoran. Atong pamalandongan karon ang kagikan ni Kristo Jesus ug atong makita nga Siya naggikan sa kaliwat ni Abraham ug ni David ug nga ang Iyang mga katigulangan mao ang bantogang mga Maghuhukom, mga Hari ug mga Saserdoteng Levita. Sa umaabot nga mga adlaw sa pagpangandam alang sa Pasko, atong pamalandongan ang tahas ni San Jose, ang tubag sa atong Mahal nga Inahan ngadto sa anghel, ang Pagduaw ni Maria kang Isabel, ang kakulang sa pagtuo ni Zacarias ug ang hingpit nga pagtuo sa atong Mahal nga Inahan.

Sa atong pagsulod niining oktaba sa dihadihang pagpangandam alang sa pagsaulog sa pagkatawo ni Kristo, gamita gayod kini isip panahon sa tinuod nga espirituhanong pagpangandam. Bisan tuod ang tibuok Adbiyento usa ka panahon sa pagpangandam, kining kataposang mga adlaw angay nga ilabinang ipunting sa dagkong mga misteryo nga naglibot sa Pagpakatawo sa Dios ug sa pagkahimugso sa Batang Kristo. Kinahanglan natong pamalandongan ang mga tawo nga gipili sa Dios aron suod nga makaambit niini, ug angay natong palandongon bisan ang kinagagmayang mga detalye kon giunsa pagkahitabo kining milagro sa tanang milagro.

Pamalandongi karong adlawa ang tinuod nga hinungdan sa Adbiyento ug Pasko. Kining kataposang semana sa dili pa ang Pasko sagad mapuno sa pagkabusy ug sa ubang matang sa pagpangandam, sama sa pagpamalit, pagluto, pagbiyahe, pagdayandayan, ug uban pa. Bisan tuod adunay hustong dapit alang niining tanang ubang pagpangandam, ayaw pasagdi ang labing mahinungdanong pagpangandam—ang espirituhanong pagpangandam sa imong kalag. Paggahin og panahon uban sa Balaang Kasulatan karong semanaha. Tagamtama ang asoy. Hunahunaa ang kahibulongang kamatuoran nga hapit na natong saulogon.

Akong minahal nga Ginoo, nagpasalamat ako Kanimo sa Imong pag-anhi aron mopuyo uban kanamo, ug nagpasalamat ako Kanimo niining panahon sa Adbiyento diin makahimo ako sa pagpamalandong diha sa pag-ampo sa tanan Nimong gibuhat alang kanako. Palihog himoa kining kataposang semana sa dili pa ang Pasko nga usa ka panahon sa tinuod nga pagpangandam diin mamalandong ako diha sa pag-ampo sa katingalahang kamatuoran sa Imong Pagpakatawo. Hinaot nga kining kataposang semana sa pagpangandam dili mausik kondili magamit hinuon ingong pundasyon alang sa usa ka mahimayaon ug mainampuong pagsaulog sa balaang gasa sa Pasko. Jesus, nagsalig ako Kanimo.

Tan-awa ang among mga kapanguhaan alang sa Adbiyento!

Mga Pamalandong sa Balaang Kasulatan

Mga Antipona nga “O” sa Adbiyento
Disyembre 17–23

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway sa ibabaw: Ang Pagkatawo ni Hesus ni Federico Barocci