Disyembre 16, 2020
Miyerkoles sa Ikatulong Semana sa Adbiyento
Mga Basahon sa Adlaw
Tan-awa ang among mga kapanguhaan alang sa Adbiyento!

Paminaw sa Iningles
Ug si Jesus mitubag kanila, “Lakaw ug isugilon kang Juan ang inyong nakita ug nadungog: ang mga buta nakakita pag-usab, ang mga bakol nakalakaw, ang mga sanlahon nahinloan, ang mga bungol nakadungog, ang mga patay gibanhaw, ug ang Maayong Balita giwali ngadto sa mga kabos.” Luke 7:22
Usa sa labing gamhanang paagi sa pagmantala sa gahom sa Ebanghelyo nga nagbag-o sa kinabuhi mao ang mga buhat nga gihimo sa atong Ginoo. Niining kutay sa Ebanghelyo, gipunting ni Jesus ang Iyang mga buhat aron tubagon ang pangutana kon kinsa Siya. Miadto Kaniya ang mga tinun-an ni Juan Bautista aron mangutana kon Siya ba ang Mesiyas nga umaabot. Ug mitubag si Jesus pinaagi sa pagpunting sa kamatuoran nga nabag-o ang mga kinabuhi. Ang mga buta, mga bakol, mga sanlahon, mga bungol ug mga patay nakadawat sa mga milagro sa grasya sa Diyos. Ug kini nga mga milagro gihimo aron makita sa tanan.
Bisan tuod ang mga milagro ni Jesus sa lawas makapahingangha gayod sa tanang paagi, dili nato angay tan-awon kini nga mga milagro isip mga buhat nga nahitabo kausa lamang sa dugay nang panahon ug dili na mahitabo karon. Ang tinuod mao nga adunay daghang paagi diin kining mao gihapong mga buhat nga nagbag-o sa kinabuhi padayon nga nahitabo karon.
Sa unsang paagi kini nahitabo? Sugdi sa imong kaugalingong kinabuhi. Sa unsang paagi ka nabag-o pinaagi sa gahom ni Kristo? Giunsa Niya pag-abli ang imong mga mata ug mga dalunggan aron makita ug madungog Siya? Giunsa Niya pagwagtang ang imong mga palas-anon ug espirituwal nga mga sakit? Giunsa Niya pagdala kanimo gikan sa kamatayon sa pagkawalay paglaom ngadto sa bag-ong kinabuhi sa paglaom? Nabuhat ba Niya kini sa imong kinabuhi?
Kitang tanan nagkinahanglan sa gahom sa Diyos nga nagluwas kanato. Ug kon ang Diyos molihok diha kanato, magbag-o ug mag-ayo kanato, ug mag-usab sa atong kinabuhi, kinahanglan una natong ilhon nga buhat kini sa atong Ginoo alang kanato. Ikaduha, kinahanglan usab natong sabton nga gusto sa Diyos nga ipaambit nato sa uban ang matag buhat ni Kristo sa atong kinabuhi. Ang kausaban sa atong kinabuhi kinahanglang mahimong padayong pagpamatuod sa gahom sa Diyos ug sa gahom sa Ebanghelyo. Kinahanglan makita sa uban kon giunsa kita pagbag-o sa Diyos, ug maningkamot kita nga sa mapaubsanong paagi dayag nilang makita sa atong kinabuhi ang Iyang gahom.
Pamalandongi karon kining hitabo sa Ebanghelyo. Hunahunaa nga kining mga tinun-an ni Juan mao ang daghang tawo nga imong mahimamat matag adlaw. Handurawa sila nga moduol kanimo, nga nagtinguha nga mahibalo kon ang Diyos nga imong gihigugma ug gialagaran mao ba ang Diyos nga angay nilang sundon. Unsaon nimo pagtubag? Unsaon nimo pagpamatuod kang Kristo Jesus? Isipa nga imong katungdanan ang pagkahimong usa ka bukas nga basahon diin ang Diyos magpaambit pinaagi kanimo sa gahom sa Ebanghelyo nga nagbag-o sa kinabuhi.
Ginoo, nagpasalamat ako Kanimo sa dili maihap nga mga paagi sa Imong pagbag-o sa akong kinabuhi: giayo Mo ako sa akong mga sakit sa espiritu, giablihan Mo ang akong mga mata ug dalunggan sa Imong kamatuoran, ug gibanhaw Mo ang akong kalag gikan sa kamatayon ngadto sa kinabuhi. Gamita ako, hinigugmang Ginoo, isip saksi sa Imong gahom nga makabag-o. Tabangi ako sa pagpamatuod mahitungod Kanimo ug sa Imong hingpit nga gugma, aron makaila ang uban Kanimo pinaagi sa paagi sa Imong paghikap sa akong kinabuhi. Hesus, misalig ako Kanimo.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Ang Pagdasig sa mga Apostoles ni James Tissot




