Cebuano

Pagtuman Lamang sa Atong Tahas

Enero 9, 2021
Sabado human sa Epipaniya
Mga Pagbasa Karong Adlawa

Paminaw sa Iningles

“Rabbi, kadtong kauban nimo sa pikas sa Jordan, nga imong gipamatud-an, nagbunyag na karon ug ang tanan nangadto Kaniya.” Juan 3:26 

Daghan na kaayog mga sumusunod si Juan Bautista. Padayong miduol kaniya ang mga tawo aron magpabunyag, ug daghan ang nagtinguha nga molapad ang iyang ministeryo. Apan sa dihang gisugdan ni Jesus ang Iyang kaugalingong dayag nga ministeryo, ang pipila sa mga sumusunod ni Juan nasina. Apan husto ang tubag ni Juan kanila. Iyang gipasabot kanila nga ang iyang kinabuhi ug misyon mao ang pag-andam sa mga tawo alang kang Jesus. Karon nga gisugdan na ni Jesus ang Iyang ministeryo, malipayong miingon si Juan, “Busa hingpit na kining akong kalipay. Kinahanglan nga Siya motubo; ako kinahanglan mokunhod” (Juan 3:29–30).

Kining pagkamapainubsanon ni Juan usa ka dakong leksiyon, ilabina alang niadtong aktibong naglihok sa apostolikanhong misyon sa Simbahan. Kasagaran kaayo, kon moapil kita sa usa ka apostolado ug ang “ministeryo” sa uban daw mas paspas nga molapad kay sa atoa, mahimong motungha ang kasina. Apan ang yawe sa pagsabot sa atong tahas sa apostolikanhong misyon sa Simbahan ni Kristo mao nga kinahanglan natong tinguhaon ang pagtuman sa atong tahas, ug sa atong tahas lamang. Dili gayod nato angay tan-awon ang atong kaugalingon nga nakigkompetensiya sa uban sulod sa Simbahan. Kinahanglan mahibalo kita kon kanus-a kita molihok sumala sa kabubut-on sa Diyos, ug kinahanglan mahibalo kita kon kanus-a kita moatras ug motugot sa uban nga motuman sa kabubut-on sa Diyos. Kinahanglan natong buhaton ang kabubut-on sa Diyos, walay sobra, walay kulang, ug walay lain.

Dugang pa, kanang kataposang pamahayag ni Juan kinahanglan kanunay molanog sa atong mga kasingkasing sa dihang gitawag kita nga aktibong moapil sa apostolado. “Kinahanglan nga Siya motubo; ako kinahanglan mokunhod.” Kini usa ka hingpit nga sumbanan alang sa tanan nga nag-alagad kang Kristo ug sa uban sulod sa Simbahan.

Pamalandongi karon kadtong balaang mga pulong sa Bautista. Ikinabuhi kini sa imong misyon sulod sa imong pamilya, taliwala sa imong mga higala ug ilabina kon nag-apil ka sa usa ka apostolikanhong pag-alagad sulod sa Simbahan. Ang tanan nimong buhaton kinahanglan magtudlo ngadto kang Kristo. Mahitabo lamang kini kon ikaw, sama kang San Juan Bautista, makasabot sa talagsaong tahas nga gihatag sa Diyos kanimo ug modawat nianang tahasa lamang.

Ginoo, gitugyan ko ang akong kaugalingon Kanimo aron mag-alagad ug maghimaya Kanimo. Gamita ako sumala sa Imong kabubut-on. Samtang gigamit Mo ako, hatagi ako sa pagpaubos nga akong gikinahanglan aron mahinumdoman ko kanunay nga Ikaw lamang ang akong gialagaran ug ang Imo lamang nga kabubut-on ang akong gituman. Luwasa ako gikan sa pangabugho ug kasina, ug tabangi ako nga magmalipayon sa daghang paagi nga Ikaw naglihok sa akong kinabuhi pinaagi sa uban. Hesus, misalig ako Kanimo.

Tan-awa ang among mga kapanguhaan alang sa Pasko!

Mga Pamalandong sa Balaang Kasulatan

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway sa ibabaw: Nagkita si Hesus ug si Juan Bautista sa ilang pagkabatan-on, dibuho ni Matteo Rosselli