Enero 8, 2021
Biyernes human sa Epipaniya
Mga Pagbasa Karong Adlawa

Paminaw sa Iningles
Ang balita mahitungod Kaniya labi pang mikaylap, ug dagkong panon sa katawhan nagtigom aron maminaw Kaniya ug aron mamaayo sa ilang mga balatian, apan Siya mopahilayo ngadto sa mingaw nga mga dapit aron mag-ampo. Lucas 5:15–16
Kini nga mga pulong nagtapos sa matahom ug gamhanang sugilanon sa usa ka tawo nga puno sa sanla, nga miduol kang Jesus, mihapa sa Iyang atubangan ug nangamuyo nga ayohon siya ni Jesus kon mao kini ang Iyang kabubut-on. Yano ra ang tubag ni Jesus: “Buot Ko. Mahinlo ka.” Ug dayon gibuhat ni Jesus ang dili mahunahuna nga Iyang buhaton. Gihikap Niya ang tawo. Siyempre, dihadiha naayo ang tawo sa iyang sanla, ug gipadala siya ni Jesus aron magpakita sa saserdote. Apan ang balita mahitungod niining milagroha paspas nga mikaylap, ug tungod niini daghang tawo ang padayon nga nangadto aron makakita kang Jesus.
Sayon rang mahanduraw ang talan-awon sa mga tawo nga naghisgot niining milagroha, naghunahuna sa ilang kaugalingong mga balatian ug sa mga balatian sa ilang mga minahal, ug nagtinguha nga mamaayo pinaagi niining magbubuhat og mga milagro. Apan sa teksto sa ibabaw, makita nato nga si Jesus mibuhat og usa ka butang nga makapainteres kaayo ug adunay propetikanhong kahulogan. Samtang nagtigom ang dagkong panon sa katawhan ug dako kaayo ang ilang kahinam mahitungod kang Jesus, mipahilayo Siya kanila ngadto sa usa ka mingaw nga dapit aron mag-ampo. Nganong gibuhat man Niya kini?
Ang misyon ni Jesus mao ang pagtudlo sa Iyang mga sumusunod sa kamatuoran ug paggiya kanila ngadto sa Langit. Gibuhat Niya kini dili lamang pinaagi sa Iyang mga milagro ug mga pagtulon-an kondili pinaagi usab sa pagpakita og panig-ingnan sa pag-ampo. Pinaagi sa pagpahilayo aron mag-ampo nga mag-inusara ngadto sa Iyang Amahan, gitudloan ni Jesus kining tanang madasigong mga sumusunod kon unsa ang labing mahinungdanon sa kinabuhi. Dili ang mga milagro sa lawas ang labing mahinungdanon. Ang pag-ampo ug ang pakig-ambit sa Amahan sa Langit mao ang labing mahinungdanon.
Kon nakaugmad ka na og usa ka lig-on nga kinabuhi sa adlaw-adlaw nga pag-ampo, usa ka paagi sa pagpaambit sa Ebanghelyo ngadto sa uban mao ang pagtugot nga ilang masaksihan ang imong pagkamatinud-anon sa pag-ampo. Dili aron makadawat sa ilang pagdayeg, kondili aron mahibalo sila kon unsa ang imong giisip nga labing mahinungdanon sa kinabuhi. Kon magmatinud-anon ka sa pagtambong sa adlaw-adlaw nga Misa, sa pag-adto sa simbahan alang sa adorasyon, o sa paggahin lamang og panahon nga mag-inusara sa imong lawak aron mag-ampo, mamatikdan kini sa uban ug mapukaw diha kanila ang usa ka balaang tinguha sa pagsabot, nga mahimo usab nga mogiya kanila ngadto sa usa ka kinabuhi sa pag-ampo.
Pamalandongi karong adlawa ang imong misyon sa pagsangyaw sa Ebanghelyo ngadto sa uban pinaagi sa yanong pagtugot nga ilang mailhan ang imong kinabuhi sa pag-ampo ug debosyon. Pasagdi nga makita ka nilang nag-ampo, ug kon mangutana sila, ipaambit kanila ang mga bunga sa imong pag-ampo. Tugoti nga modan-ag ang imong gugma sa atong Ginoo aron ang uban makadawat sa panalangin sa imong balaang pagpamatuod.
Ginoo, tabangi ako nga magmatinud-anon sa pagkinabuhi sa tinuod nga pag-ampo ug debosyon matag adlaw. Tabangi ako nga magpabiling matinumanon niining kinabuhi sa pag-ampo ug magpadayon sa pagpalawom sa akong gugma Kanimo. Samtang nagkat-on ako sa pag-ampo, gamita ako isip saksi sa uban, aron ang mga labing nagkinahanglan Kanimo mausab tungod sa akong gugma Kanimo. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Ang Pag-ayo sa mga Sanlahon sa Capernaum, dibuho ni James Tissot




