Cebuano

Pag-ila sa Kabubut-on sa Dios 

Enero 16, 2021
Sabado sa Unang Semana sa Ordinaryong Panahon
Mga Basahon alang sa Karong Adlawa

Paminaw sa Iningles

Samtang milabay siya, nakita niya si Levi, anak ni Alfeo, nga naglingkod sa buhatan sa buhis. Miingon si Jesus kaniya, “Sunod Kanako.” Ug mitindog siya ug misunod kang Jesus. Marcos 2:14

Unsaon nimo pagkahibalo sa kabubut-on sa Dios alang sa imong kinabuhi? Sa iyang bantog nga espirituhanong sinulat, Ang Espirituhanong mga Pagbansay, gipresentar ni San Ignacio sa Loyola ang tulo ka paagi aron mahibaloan nato ang kabubut-on sa Dios. (Tan-awa ang mycatholic.life/ignatius alang sa dugang kasayoran.) Ang unang paagi mao ang labing tin-aw ug labing tino. Kini usa ka higayon diin ang tawo makasinati og “katin-aw nga walay luna alang sa pagduhaduha” tungod sa usa ka talagsaong grasya sa Dios. Sa paghulagway niini nga kasinatian, gihisgotan ni San Ignacio ang kinutlo sa ibabaw isip usa ka pananglitan niini nga kasinatian.

Diyutay ra ang gisulti bahin niining pagtawag kang Levi sa Ebanghelyo ni Marcos, nga nasulat usab sa Ebanghelyo ni Mateo (Mateo 9:9). Si Levi, nga nailhan usab nga Mateo, nagpadayon sa iyang trabaho sa pagpangolekta og buhis sa iyang buhatan. Mopatim-aw nga kining duha lamang ka yanong pulong ang gisulti ni Jesus kang Levi: “Sunod Kanako.” Tungod niining duha ka pulong, gibiyaan ni Levi ang iyang kanhing kinabuhi ug nahimong sumusunod ni Jesus. Ngano nga gibuhat man kini ni Levi? Unsa may nakapakombinsir kaniya sa pagsunod kang Jesus? Tin-aw nga labaw pa sa duha lamang ka pulong nga pagdapit ni Jesus ang nakapakombinsir kaniya sa pagtubag.

Ang nakapakombinsir kang Levi mao ang usa ka talagsaong grasya sa Dios nga naghatag sa iyang kalag og “katin-aw nga walay luna alang sa pagduhaduha.” Sa usa ka paagi, nasayod gayod si Levi nga gitawag siya sa Dios sa pagbiya sa iyang kanhing kinabuhi ug sa pagdawat niining bag-ong kinabuhi. Walay taas nga panaghisgot, walay pagtimbangtimbang sa mga bentaha ug disbentaha, walay dugay nga paghunahuna bahin niini. Nasayod gayod si Levi, ug mitubag siya.

Bisan panagsa ra kita makasinati og ingon niini nga katin-aw sa kinabuhi, importante nga masayod kita nga usahay molihok gayod ang Dios niining paagiha. Usahay tin-aw kaayo ang pagsulti sa Dios nga wala kitay pagduhaduha ug nasayod kita nga kinahanglang molihok kita. Dakong gasa kini kon mahitabo! Ug bisan dili kanunay mosulti ang Dios kanato sa ingon niini ka tin-aw ug diha-diha nga paagi, importante nga ilhon nato nga usahay mosulti gayod Siya kanato niining paagiha.

Pamalandongi karong adlawa kining pagtawag kang Levi. Hunahunaa kining kasigurohan sa iyang kasingkasing nga gihatag kaniya niadtong higayona. Sulayi paghanduraw kon unsa ang iyang nasinati ug kon unsa kaha ang gihunahuna sa uban bahin sa iyang pagpili sa pagsunod kang Jesus. Ablihi ang imong kasingkasing niining mao rang grasya; ug kon mobati ka nga daw nakigsulti ang Dios kanimo uban sa ingon niana nga katin-aw, pag-andam ug pagkinabubut-on sa pagtubag nga walay pagpanuko.

Minahal kong Ginoo, salamat sa pagtawag Kanamo nga mosunod Kanimo nga walay pagduhaduha. Salamat sa kalipay nga nahimo kong tinun-an Mo. Hatagi ako sa grasya nga kanunayng masayod sa Imong kabubut-on alang sa akong kinabuhi, ug tabangi ako sa pagtubag Kanimo uban sa bug-os nga pagtugyan sa kaugalingon ug pagsalig. Hesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway sa ibabaw: Ang Pagtawag kang San Mateo, ni Giovanni Paolo Panini