February 24, 2021
Wednesday of the First Week of Lent
Readings for Today
Paminaw sa Iningles
Video Version
Samtang nagkadaghan pa ang mga tawo nga nagtigom, miingon si Jesus kanila, “Kini nga kaliwatan usa ka daotang kaliwatan; nangita kini og timailhan, apan walay timailhan nga ihatag niini gawas sa timailhan ni Jonas.” Luke 11:29
Daw nagkalainlain ang mga tawo sa panon. Una, dihay mga mituo kang Hesus sa tibuok nilang kasingkasing. Ang Napulog Duha, pananglitan, mibiya sa tanan aron mosunod Kaniya. Ang Iyang inahan ug ang uban pang balaang mga babaye mituo Kaniya ug mga matinud-anon Niyang sumusunod. Apan taliwala sa nagkadakong panon, daw daghan ang nagduhaduha kang Hesus ug nangitag pamatuod kon Kinsa gayod Siya. Busa, nangayo sila og timaan gikan sa Langit.
Ang usa ka timaan gikan sa Langit unta mahimong dayag nga pamatuod kon Kinsa gayod si Hesus. Tinuod, daghan na og milagro nga nahimo si Hesus. Apan daw dili pa kini igo. Nangayo pa silag dugang—ug kanang tinguhaa usa ka tin-aw nga timailhan sa katig-a sa kasingkasing ug kakulang sa pagtuo. Busa dili mahimo ni Hesus ug dili usab Niya buot nga ihatag kanila ang timaan nga ilang gipangayo.
Hinunoa, miingon si Hesus nga ang bugtong timaan nga ilang madawat mao ang timaan ni Jonas. Hinumdomi nga ang timaan ni Jonas dili kaayo madanihon. Gilabay siya gikan sa sakayan ug gilamoy sa usa ka balyena, diin nagpabilin siya sulod sa tulo ka adlaw sa wala pa siya iluwa sa baybayon sa Nineve.
Susama niini ang timaan ni Hesus. Mag-antos Siya sa mga kamot sa mga pangulo sa relihiyon ug sa sibil nga mga awtoridad, patyon ug ibutang sa lubnganan. Ug unya, human sa tulo ka adlaw, mabanhaw Siya. Apan sa Iyang Pagkabanhaw, wala Siya mogula nga naggilak sa mga silaw sa kahayag aron makita sa tanan; hinunoa, human sa Iyang Pagkabanhaw, nagpakita Siya ngadto sa mga nagpadayag na og pagtuo ug mituo na Kaniya.
Ang leksiyon alang kanato mao nga dili kita kombinsihon sa Diyos bahin sa mga butang sa pagtuo pinaagi sa gamhanan ug samag sa Hollywood nga publikong mga pagpadayag sa Iyang pagkahalangdon. Hinunoa, ang “timaan” nga gitanyag kanato usa ka pagdapit nga mamatay uban kang Kristo aron personal natong masugdan ang pagsinati sa bag-ong kinabuhi sa Pagkabanhaw. Kining gasa sa pagtuo anaa sa sulod sa atong pagkatawo, dili usa ka butang nga dayag sa publiko. Ang atong pagkamatay sa sala usa ka butang nga personal natong buhaton sa sulod sa atong kaugalingon, ug ang bag-ong kinabuhi nga atong nadawat makita lamang sa uban pinaagi sa pagpamatuod sa atong nausab nga mga kinabuhi.
Pamalandongi karon ang tinuod nga timaan nga gihatag sa Diyos kanimo. Kon usa ka sa daw naghulat og dayag nga timaan gikan sa atong Ginoo, ayaw na paghulat. Tan-awa ang krusipiho, sud-onga ang pag-antos ug kamatayon ni Hesus, ug pilia ang pagsunod Kaniya pinaagi sa pagkamatay sa tanang sala ug kahakog. Pagpakamatay uban Kaniya, sulod sa lubnganan uban Kaniya ug tugoti Siya nga mopagula kanimo nga nabag-o ang imong kinasuloran niining Kwaresma, aron mausab ka pinaagi niining usa ug bugtong timaan gikan sa Langit.
Akong Ginoo nga gilansang sa krus, akong gitutokan ang krusipiho ug nakita ko sa Imong kamatayon ang labing dakong buhat sa gugma nga sukad nahibaloan. Hatagi ako sa grasya nga akong gikinahanglan aron mosunod Kanimo ngadto sa lubnganan aron ang Imong kamatayon modaog batok sa akong mga sala. Hatagi ako og kagawasan, minahal kong Ginoo, niining panaw sa Kwaresma aron hingpit akong makaambit sa Imong bag-ong kinabuhi sa Pagkabanhaw. Hesus, misalig ako Kanimo.
40 Days at the Foot of the Cross – Reflection Seven – A Lowly Servant of the Lord
Mga Kapanguhaan alang sa Kwaresma
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
Featured image above: Tauberbischofsheim altarpiece By Mathias Grünewald
