Cebuano

Ang Atong Panig-ingnan sa Pagkabalaan – Huwebes Santo

Abril 1, 2021

Huwebes Santo, Misa sa Panihapon sa Ginoo (Tuig B)

Mga Pagbasa Karong Adlawa

Dugang nga mga Pag-ampo ug Pamalandong alang sa Triduum

Bidyo

Paminaw sa Iningles


“Nasabtan ba ninyo kon unsay akong gibuhat alang kaninyo? Gitawag ninyo ako nga ‘Magtutudlo’ ug ‘Ginoo,’  ug husto kamo, kay mao man gayod ako. Busa kon ako, nga Ginoo ug Magtutudlo, naghugas sa inyong mga tiil, kinahanglan usab nga maghinugasay kamo sa inyong mga tiil. Gihatagan ko kamog panig-ingnan nga sundon, aron buhaton usab ninyo ang akong gibuhat alang kaninyo.” Juan 13:12–15

Gusto ba nimong mahimong balaan? Tingali dili ang tanan motubag dayon niini nga pangutana sa usa ka kinasingkasing nga “Oo.” Makapasubo nga alang sa uban, ang pagkabalaan daw makalaay ug dili madanihon. Ang daotan madanihon kaayo kon ang pagtan-aw niini naglibog ug taphaw lamang. Busa unsa man ang imong tubag niini nga pangutana? Gusto ba nimong mahimong balaan?

Sa atong pagsugod karon sa Balaang Triduo, mosulod kita sa labing balaan nga mga adlaw sa tuig sa Simbahan. Maglakaw kita uban sa atong Ginoo latas sa Iyang kataposang paghimaya karong adlawa samtang Iyang gisaulog ang Paskuwa uban sa Iyang mga tinun-an ug misulod Siya sa Tanaman sa Getsemani aron magpaabot sa pagdakop Kaniya. Ugma, mouban kita Kaniya latas sa mga estasyon sa Iyang Krus. Sa Sabado, magpabilin kita sa hilom nga pag-adorar sa Iyang lubnganan samtang nagpaabot kita sa Pagkabanhaw.

Sa Ebanghelyo nga gikutlo sa ibabaw, gihatagan kita ni Jesus ug sulondan sa pagkabalaan pinaagi sa pagpamatuod sa Iyang mga buhat. Siya nga Dios sa Uniberso, ang Magbubuhat sa tanan, ang Walay Kataposang Anak sa Dios, ang Ikaduhang Persona sa Labing Balaang Trinidad, nagpaubos sa Iyang kaugalingon ug mikuha sa dagway sa usa ka ubos nga sulugoon pinaagi sa paghugas sa mga tiil sa Iyang mga tinun-an. Dayon Iyang gitanyag kanila ang Labing Balaang Eukaristiya sa unang higayon, sa wala pa Siya molakaw aron atubangon ang mga naglutos Kaniya.

Ang sulondan nga gihatag ni Jesus kanato usa ka propetikanhong buhat diin gisultihan kita Niya nga ang tinuod nga pagkahalangdon, sa ato pa, ang tinuod nga pagkabalaan, makaplagan diha sa pagpaubos. Ang pagkabalaan matuman sa atong kinabuhi kon dili na nato ipunting ang atong panan-aw sa atong kaugalingon ug higugmaon nato ang uban isip ilang mga sulugoon.

Walay usa kanato nga mao ang Manluluwas sa Kalibotan, apan ang matag usa kanato kinahanglang mahimong instrumento sa Iyang buhat sa pagluwas alang sa uban. Sa atong pagdawat sa gasa ni Jesus, kinahanglan dayon kitang modangop sa uban ug magpaubos sa atong kaugalingon sa ilang atubangan. Kinahanglan nato silang tabangan nga makita ang atong gugma ug ang ilang dignidad. Kinahanglan nato silang alagaran uban sa pagpaubos ug unahon sila. Pinaagi niini, mahimo nato silang dapiton nga sundogon kita samtang nagsundog kita kang Cristo. Sa ingon, ang atong mapaubsanong pagsundog kang Jesus mahimong paagi diin dapiton ni Jesus ang uban nga mosunod Kaniya.

Pamalandongi karong adlawa ang pagdapit ni Jesus: “…kon unsay Akong gibuhat alang kaninyo, mao usab ang inyong buhaton.” Gihatag ni Jesus ang tanan kanato, busa kinahanglan usab natong ihatag ang tanan ngadto sa uban. Kinahanglan kitang moalagad nga dili mag-ihap sa kabug-at sa sakripisyo. Kinahanglan nato silang higugmaon, nga unahon ang ilang mga panginahanglan kaysa sa atoa. Kinahanglan kitang mahimong sulondan sa gugma ni Cristo alang kanila. Pamalandongi ang pag-alagad ni Jesus karong adlawa ug sa tibuok Triduo, ug itugyan ang imong kaugalingon sa pagkinabuhi sumala sa pagdapit sa atong Ginoo kanimo.

Akong mapaubsanong Ginoo, hinaot nga ang Imong ngalan dayegon ug simbahon labaw sa tanang butang. Hinaot nga pagabayawon Ka pinaagi sa Imong pagpaubos ug mapaubsanong pag-alagad. Diha sa Imong mapaubsanong buhat, hinigugma kong Ginoo, makita ko ang Imong lawom nga gugma alang kanako ug alang sa tanan. Hinaot nga masundog ko kanang mapaubsanong gugma sa akong kaugalingong kinabuhi aron ang akong pagsundog Kanimo makatabang sa pagpaambit sa Imong makaluwas nga gugma ngadto sa uban. Jesus, misalig ako Kanimo.

Dugang alang sa Semana Santa

Pamalandong sa pag-ampo alang sa Huwebes Santo

Dugang nga Basahon: Huwebes Santo

Dalan sa Krus

Mga Balak alang sa Semana Santa

Rosaryo – Mga Misteryo sa Kasakit (uban sa Balaang Kasulatan)

Litanya sa Pagkamapainubsanon

Paghiusa sa Pag-antos ngadto sa Krus

Pag-ampo sa Hingpit nga Pagtugyan sa Kaugalingon

Pag-ampo sa Pagtahan

40 ka Adlaw sa Tiilan sa Krus

Mga Santos/Kasaulogan Karong Adlawa

Mga Kapilian sa mga Basahon sa Misa

Mga hulagway nga gipakita sa ibabaw: Ang Paghugas sa mga Tiil, dibuho ni Palma il Giovane


Pangandam alang sa Pasko sa Pagkabanhaw!

Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021

Adlaw-adlaw nga mga Pamalandong sa Diyosnong Kalooy:
365 ka Adlaw Uban ni Santa Faustina