Cebuano

Pagsalikway sa mga Saad nga Walay Kapuslanan

Marso 31, 2021
Miyerkoles Santo
Mga Basahon Karong Adlawa

Bidyo

Paminaw sa Iningles


Ang usa sa Napulog Duha, nga ginganlag Judas Iskariote, miadto sa mga pangulong pari ug miingon, “Unsay ihatag ninyo kanako kon itugyan ko siya kaninyo?” Gibayran nila siya ug katloan ka pirasong plata, ug sukad niadto nangita na siyag kahigayonan sa pagtugyan kaniya. Mateo 26:14–16

Ang tinguha sa salapi mahimong gamhanang pagdasig sa pagbudhi sa atong Ginoo. Niining bahin sa Ebanghelyo, daw tin-aw nga ang pagbudhi ni Judas naggikan sa iyang tinguha sa salapi. Lagmit aduna siyay pagtuo sa atong Ginoo bisan sa usa lamang ka sukod, kay kon wala pa, dili unta siya mahimong Iyang tinun-an. Apan bisan kon aduna may pagtuo si Judas, ang iyang tinguha sa salapi daw milabaw sa bisan unsang pagtuo nga anaa kaniya.

Usa sa mahinungdanong mga leksiyon nga atong makat-onan gikan kang Judas mao nga ang tinguha sa salapi adunay dakong gahom sa pag-impluwensiya sa atong mga desisyon. Daghan kaayo sa mga bantogang santos ang nagtudlo kanato nga ang dalan ngadto sa pagkabalaan nagkinahanglan, una sa tanan, sa pagputli sa tanan natong dili hustong mga pagbati ug kahiligan. Ug tungod kay ang pagkahigot sa salapi maoy usa sa labing kusgan nga mga pagkahigot nga ginasagubang sa daghan, mahinungdanon nga putlion kining tinguhaa sa kinabuhi sa matag usa kanato.

Tinuod nga ang materyal nga mga kabtangan dili daotan kon gamiton kini sa pagtuman sa kabubut-on sa Diyos. Apan ang tinguha sa pagbaton og dugang pa, labaw pa sa gikinahanglan, kanunayng makapahanap sa atong katakos sa tin-aw nga pag-ila sa kabubut-on sa Diyos ug sa pagkinabuhi alang lamang sa Iyang himaya.

Sa dihang nabudhian na ni Judas ang atong Ginoo ug nadakpan na si Jesus, hinumdomi nga si Judas “nagmahay pag-ayo sa iyang gibuhat.” Ug samtang gihusay si Jesus, mibalik si Judas ngadto sa mga pangulong pari ug miingon, “Nakasala ako sa pagbudhi sa dugo nga walay sala,” nga daw naningkamot sa pagpahunong sa paghusay. Apan nagsugod na ang mga panghitabo nga mosangpot sa kamatayon ni Jesus ug dili na kini mapugngan. Busa, giuli ni Judas ang salapi ug, sa makapasubo, milakaw aron magbitay sa iyang kaugalingon (Tan-awa ang Mateo 27:3–5).

Ang tinguha ni Judas sa salapi nakapahanap sa iyang panghunahuna. Ug ang iyang sala naghimo kaniya sa kanunayng ginahimo sa sala. Human dayon niya mahimo ang sala sa pagbudhi, nakita ni Judas ang mga sangpotanan niadtong iyang pagpili. Ug kining mga sangpotanana nakapasubo kaniya pag-ayo. Nakat-onan niya nga ang pagpili sa sala mosangpot sa usa ka saad nga walay kapuslanan. Nakaamgo siya nga ang katloan ka buok salaping pilak dili ikabaylo sa bili sa iyang kalag. Apan siyempre, bisan niadtong higayona, mahimo pa untang maghinulsol si Judas ug makadawat sa kalooy sa Diyos. Apan wala niya kini buhata. Hinuon, iyang gitapos ang iyang kinabuhi diha sa hingpit nga pagkawalay paglaom.

Pamalandongi karong adlawa ang gipakita sa kinabuhi ni Judas. Himoa siyang basihanan sa imong pagpamalandong ug pagsusi sa kaugalingon niining Semana Santa. Unsa man sa imong kinabuhi ang imong gitinguha labaw pa kay sa atong Ginoo? Unsang tentasyon ang nakapahanap sa imong panghunahuna ug nagdala kanimo sa mga pagpili nga nahibalo kang mosangpot sa kawalay kapuslanan? Paningkamoti karong adlawa nga wagtangon ang matag dili hustong tinguha sulod kanimo ug, sa baylo, maalamong pilia ang kabubut-on sa Diyos. Ayaw tugoti nga magpadayon ka sa pagtuo sa mga bakak nga nagpugong kanimo sa paghimo kang Jesus ug sa Iyang balaang kabubut-on nga mao lamang ang bugtong sentro sa imong kinabuhi.

Akong balaang Ginoo, Ikaw ug Ikaw lamang ang angay mahimong sentro sa akong kinabuhi. Ikaw ug Ikaw lamang ang labing bililhon sa kinabuhi. Tabangi ako nga biyaan ang tanang kalibotanong mga tinguha sa kinabuhi aron dili ako mahulog sa mga tentasyon nga mosangpot sa mga saad nga walay kapuslanan, ug aron akong dawaton sa tibuok kasingkasing ang matuod ug makapatagbaw nga mga saad nga gikan Kanimo. Jesus, misalig ako Kanimo.

Mga Kapanguhaan alang sa Kwaresma

Mga Pag-ampo alang sa Semana Santa

Dugang nga Pagpamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Kwaresma

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway nga gipakita sa ibabaw: Si Judas nga Nagdawat sa Bayad sa Iyang Pagbudhi, dibuho ni Giotto di Bondone