Cebuano

Kupot kang Jesus Karon!

Abril 6, 2021
Martes sulod sa Oktaba sa Pasko sa Pagkabanhaw
Mga Pagbasa Karong Adlawa

Paminaw sa Iningles

Miingon si Jesus kaniya, “Ayaw na pagkupot Kanako, kay wala pa Ako makakayab ngadto sa Amahan. Apan adtoa ang Akong mga igsoon ug ingna sila, ‘Moadto Ako sa Akong Amahan ug inyong Amahan, sa Akong Dios ug inyong Dios.’” Juan 20:17

Si Maria nga taga-Magdala usa sa unang mga tawo nga gipakitaan ni Jesus. Dako kaayo ang iyang debosyon ngadto Kaniya, ilabina tungod sa dakong kaluoy nga Iyang gipakita kaniya sa dihang gipasaylo Niya ang iyang dayag nga mga sala ug gipapahawa ang pito ka demonyo gikan kaniya. Human niadto, si Maria nahimong matinud-anong tinun-an ug usa sa pipila nga nagpabiling matinumanon Kaniya, bisan sa dihang nagbitay Siya sa Krus.

Sa unang adlaw sa semana, ang Domingo human sa Paglansang sa Krus, miadto si Maria sa lubnganan aron dihogan ang lawas ni Jesus sumala sa batasan sa mga Judio. Apan sa iyang pag-abot, wala na didto ang lawas ni Jesus. Ug sa dihang mipakita si Jesus kaniya samtang naghilak siya, wala dayon niya Siya mailhi, kay anaa na Kaniya ang Iyang bag-ong lawas nga gihimaya. Apan sa dihang gitawag ni Jesus ang iyang ngalan, Maria, nailhan niya Siya. Apan imbis nga gakson siya, miingon si Jesus, “Ayaw na pagkupot Kanako…” Nganong misulti man si Jesus niini?

Bisan tuod matahom ug balaan ang pagkasuod ug debosyon ni Maria kang Jesus, wala pa kini mahingpit. Gitinguha niya ang iyang Ginoo nga iyang nailhan ug gisunod. Gusto niyang mahibalik ang iyang kanhing relasyon kang Jesus. Apan tungod niini, miingon si Jesus, “Ayaw na pagkupot Kanako…” Mas labaw pa ang gitinguha ni Jesus. Gisultihan Niya siya nga ang iyang relasyon Kaniya hapit nang mausab ngadto sa mas maayo. Dili na Siya basta iyang kauban dinhi sa yuta; hinuon, sa dili madugay, magpuyo na Siya sulod kaniya, mopuyo sa kinahiladman sa iyang kasingkasing, mahiusa kaniya, ug mahimong iyang Pamanhonon hangtod sa kahangtoran. Apan mahitabo lamang kini sa dihang makakayab na si Jesus ngadto sa Amahan sa Langit aron hingpiton ang Iyang diosnong misyon sa kaluwasan.

Usahay, mangayo usab kita sa atong Ginoo og mga pabor nga alang lamang sa lumalabay nga kinabuhi. Bisan tuod kinahanglan gayod kitang mosalig Kaniya alang sa “among kalan-on sa matag adlaw,” nga nagpasabot sa tanang batakang panginahanglan sa kinabuhi, kinahanglan natong masabtan nga ang mga gasa nga gustong ihatag sa Dios kanato labaw pa kaayo sa bisan unsang butang niining kalibotana. Ang labaw sa kinaiyahan nga gasa sa grasya, ang gasa sa Pagpuyo sa Labing Balaang Trinidad sulod nato, ang gasa sa pagkahiusa sa atong Ginoo—mao kini ang hinungdan nga gibuhat kita ug mao ang kataposang tumong ug tinguha sa atong Ginoo.

Pamalandongi karon kining mga pulonga nga gisulti ni Jesus kang Maria: “Ayaw na pagkupot Kanako, kay wala pa Ako makakayab ngadto sa Amahan.” Apan pamalandongi kini uban sa kahibalo nga karon, si Jesus tinuod nang mikayab ngadto sa Amahan. Busa, karon gidapit Niya kitang tanan sa pagkupot Kaniya samtang naghari Siya sa Langit. Pamalandongi ang lawom nga tinguha sa kasingkasing sa atong Ginoo nga mokupot ka Kaniya uban sa tibuok mong pagkatawo. Gusto Niyang mopuyo sulod nimo, mahiusa kanimo ug magbag-o kanimo sa tanang paagi. Kining balaang panaghiusa gipahimuslan na karon ni Santa Maria nga taga-Magdala hangtod sa kahangtoran, ug kining mao gihapong gasa gitanyag usab kanimo. Kupot Kaniya ug ayaw gayod pagbuhi, kay kini mao ang imong kalipay nga walay kataposan.

Akong Ginoo nga nabanhaw ug mikayab sa Langit, naghari Ka na karon sa Langit sa hingpit nga himaya ug kahalangdon. Biraha ako ngadto sa Imong mahimayaong kinabuhi ug dapita ako sa pagkupot Kanimo sa tibuok kong kasingkasing. Gidapit Ko Ikaw, minahal nga Ginoo, sa pag-anhi ug pagpuyo sulod nako aron makakupot ako Kanimo hangtod sa kahangtoran. Jesus, misalig ako Kanimo.

Dugang pa alang sa Pasko sa Pagkabanhaw

Ikalimang Adlaw: Nobena isip pagpangandam alang sa Domingo sa Diosnong Kalooy

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mapamalandongong pag-ampo alang sa Pasko sa Pagkabanhaw

Rosaryo – Mga Misteryo sa Himaya (uban sa Balaang Kasulatan)

Litaniya sa Diosnong Kalooy ni Santa Faustina

Pagsalig sa Diosnong Kalooy

Pag-ampo alang sa Tuig sa Kalooy

Koronilya sa Diosnong Kalooy

Tanang Santos/Mga Kapistahan

Santos sa Adlaw – San Vicente Ferrer, Pari
(Dili saulogon isip liturhikanhong handomanan karong tuiga kay natunong kini sa Oktaba sa Pasko sa Pagkabanhaw)

Mga Kapilian sa mga Basahon sa Misa

Hulagway sa ibabaw: Ang Pagpakita ni Kristo kang Maria Magdalena Human sa Pagkabanhaw, dibuho ni Alexander Ivanov


Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021

Adlaw-adlaw nga mga Pamalandong sa Diyosnong Kalooy:
365 ka Adlaw Uban ni Santa Faustina